Lab Made 分子雪糕專門店 Lab Made Cafe (荃灣店)

Lab Made Cafe 是Lab Made分子 雪糕 旗下的cafe品牌，除有招牌的分子 雪糕 外，亦有其他特色 甜品 及多款 咖啡 飲品選擇，十分適合在這裡悠閒享受一個美好時光。以下係探險家《山區麵包王》為大家作出的實地報導：「Lab Made Cafe 分子雪糕專門店：分子雪糕過聖誕」唔喺第一次幫襯Lab Made，但新開嘅荃灣店應該最就腳，事關喺小弟出沒較多嘅地區之一。不過，是日嚟到，感覺有好多唔同，原來……荃灣店已進化為Café，分子雪糕當然唔少得，更賣埋件裝蛋糕及飲品，實在啱晒我哋啲甜品迷，下午茶又多個選擇，周六、日有時間可以過嚟迤吓！由於店子晌商場中間位，由千色店天橋一直走過嚟就見，啱啱扶手電梯對下，唔難搵。而且，地方頗闊落，有十零個座位供堂食。從餅櫃所見，因為話喺試業關係，暫時蛋糕款式唔多，但做得精緻，配搭特別，例如：烤白朱古力海鹽蛋糕及香蕉吉士蛋糕，此外，又有啲天然低卡鮮果汽水，都喺下次要一試嘅目標。今期嘅分子雪糕口味有夢之薑餅人、樹頭蛋糕、聖誕雪人及希臘乳酪雪糕配紅酒煮無花果醬，明顯前3者都喺為聖誕而推出嘅限定，最為欣賞喺Lab Made標榜用料全天然，適合現代人講求健康。另外，冬日呈獻，更推出兩款熱飲：Lab Made特選Valrhona 熱朱古力及薑汁好立克。夢之薑餅人 $44以英式蛋諾雪糕配肉桂同薑餅人，咩叫蛋諾（Egg Nog）?小弟都要請教一下店員，原喺喺蛋酒，不過，既然叫得非酒精嘅蛋諾，當以取其概念，唔會食到酒味。作為聖誕限定，賣相絕對襯到足，薑餅人配「士的」。雪糕初初兩三啖感覺有少少平淡，但食落先有一朕蛋香味，因為見佢成份列有蛋同吉士，而質感頗柔滑，食到尾仲有少少驚喜位，就喺雪糕底下加咗啲鮮紅莓醬，令個英式蛋諾雪糕變得唔平淡；個薑餅人幾脆身，下面啲餅碎有薑味及肉桂味，兩者都突出而平衡，慢慢細嚼，原來仲有啲薑糖粒晌裡面，不過因為剪得好細碎，都唔易察覺到。樹頭蛋糕 $44店內嘅電子屏幕介紹喺法式栗子雪糕配樹頭蛋糕，所以，大抵預期到個味道及賣相，不過，嚟Lab Made往往卻喺驚喜處處。比起個「夢之薑餅人」，「樹頭蛋糕」深得小弟歡心！先分享個法式栗子雪糕，栗子味好濃、軟滑，內有栗子粒；而樹頭蛋糕喺迷你朱古力卷蛋，雖然少少一件卷蛋，但無點欺場，卷蛋口感鬆軟，朱古力味香濃，皆因內裡朱古力忌廉輕盈，外層仲包住一層朱古力漿，啲細節位可見製作用心；至於依個雪糕嘅驚喜位，就喺雪糕面嘅糖漬栗子粒，唔喺栗子蓉，所以有咬口啲，雖然稍甜，但味道超正。薑汁好立克 $31近年去嚫快餐店就咖啡，茶記就要奶茶，好立克都已經好少飲，見店員推介個薑汁好立克，倒有啲興趣。首先，好立克以奶泡代替一般落花奶，感覺更幼滑，而薑味幾突出，卻又無搶晒好立克本身個味，算做得挺平衡，飲落又覺得寧捨暖身。雖然Lab Made嘅分子雪糕每期都只做兩個星期，試得嚟，上載埋食文，款雪糕都可能落咗畫，不過，次次嚟，次次都有驚喜，所以，都無需介懷喺唔喺咩限定，或者嚟到先知有咩款式可能仲有意外驚喜，就好似上次晌屯門嘅粟一燒，真喺創意夠抵死。個人評分味道：8/10環境：8/10服務：8/10抵食：7/10平均每人消費：HK$59餐廳資料：Lab Made Cafe 分子雪糕專門店荃灣眾安街68號荃灣城市中心一期2樓美食廣場1號鋪2670 0071