攻略日期：2015-10-30
今時今日, 玩市集真的愈來愈立體化, 除了每個攤檔的質素, 原來環境, 配套都一樣很影響參觀者. 今日走到觀塘一個好開心的哈佬喂市集.
2008年開始網上賣泡芙的Annas: 「由細到大, 我都好鐘意焗嘢食, 嗰時仲讀緊書, 所以只係周末約網友地鐵站交收泡芙, (今日無泡芙嘅?), 因為E度無雪櫃, 所以無整」
由一邊讀書一邊賣泡芙, 到畢業後, 到蛋糕店工作吸收經驗, 2年前Annas終於變成全職蛋糕達人, 剛才吸引我停步, 正正就是Annas的燕麥曲奇, 足料, 好味, 又夠咬口. 好食!好食!
原來, Annas說最花時間就是製作蛋白餅, 「因為焦糖味要焗三個鐘, 雲尼拿味都要1.5個鐘, 咁期間我就唔可以做任何嘢, 只有個等字...」(完全明白, 即係我又upload相, 又upload片, 我部腦慢到唔可以做其他嘢一樣囉)
(點解你造咗咁大粒珍寶珠???) Annas笑笑口:「E啲係我改良咗嘅芝士蛋糕, 有檸檬, 朱古力, 綠茶三款味道...(我第一眼真係以為珍寶珠).
Annas續說:「好多人買嚟做散水餅呀!」.(係呀!! 真係好喎, 我希望我都可以好快幫襯妳買嚟做散水餅啦)
Line 及 Minions 是 Annas早前的作品, 「暫時未有再做其他公仔, 雖然InSideOut好Hit, 但我仍然未接受到紅, 藍, 綠的色素問題, 我都唔想我D客食到成口色素」
「郵心出發」, 是Diana與3位同學合力營運的義工組織. Diana:「我哋做咗3年, 因為我讀輔導心理學, 所以大家如果有任何疑難, 唔開心, 都可以寫底, 寄給聖誕老人...由聖誕老人去為你分擔, 之後再回信畀你...」
(哦!明白..即你們就充當顏聯武角色, 扮聖誕老人回信, 真係好似做電台咁喎), Diana:「似呀!我好鍾意聽收音機架, 將來有機會真係好想去電台做Phone-in節目, 幫人解決煩惱」(我以前都想, 不過無人要, 希望你未來會成功)
(咁...E家你收咗幾多封寄畀聖誕老人嘅信呀?) Diana:「今年係第三年攪, 我哋10月頭先開始, E家已經超過200封」(嘩!咁米要好多個聖誕老人??)
Diana:「慢慢回囉, 不過其實回信過程都可以學到好多嘢, 好似學識點樣安慰失戀嘅人, 鼓勵失落嘅人...自己都可以運用課堂學到嘅幫到人」
(你哋要唔要自己貼經費架?) Diana:「雖然每封信成本$3只係小數目, 但係如果有幾百封, 數目都唔少... 不過, 以$3可以服務到一個人, 其實我覺得真係好值得, 咁最好當然有人捐助我哋繼續營運, 咁就更加理想」 ~加油Diana!!
大半年前Tai去學造皮, 但因為支持環境的Jodi不想以皮作為手作, 於是改為以水松木作為原材料造.
原來水松木皮質地非常韌, 我最初也不敢大力開合, Jodi說:「唔怕架, 你大大力佢都唔會爛, 我係屋企想撕爛佢都撕唔開架」(真係似我D皮咁韌喎)
電話套是試作版, Tai:「因為電話套要有一個殼撐住水松木, E個係因為自己個套爛咗, 我哋就用水松嚟加工, 變成自用版本先, 希望好快會搵到中間個殼, 先可以成事」
由造紙樣到一個銀包登場, Jodi大約只需時1天時間便完成, Tai:「因為佢之前用咗3日做咗個長銀包, 所以有經驗, E個就快好多...(好快手喎), 其實算慢, 我自己個皮腰包都係做一日呀!!」(我之前做個袋, 做咗7日...)
(嘩你哋都設計咗好多花紋喎), Tai:「無呀! 全部都係原裝花紋, 未有加工, 遲D先啦, 因為仲搵緊合適顏料, 創造一下先的花紋, 咁就無咁單調」
其實, 今次Halloween Town的宣傳算少, 若果我不是早前在其他市集認識了Angel, 她邀請我來, 我也不知道...
場地正正就在「東廣場」樓上, 地方不算大, 但由一班年輕人佈置得非常有哈佬喂氣氛, 萬聖節正日, 更免費為所有檔主化一個鬼妝添...(如果免費幫埋參觀者就更開心啦)
剛才...突然還有三位鬼舞者進場大跳勁舞, 調暗一點場燈, 感覺會更Hit!!
市集另一邊還設有一個鬼屋...Angel:「阿仁, 入去玩吓啦...」, 我答:「我影一影相就得...(心諗:我好驚!!)」(因為老仁家, 心血少囉)
現時市集愈來愈多, 估不到愈來愈有主題, 年輕人第一次攪市集, 當然還有不少進步空間, 但今次的哈佬喂市集...都算很鬼馬!!
活動詳情：
地址: 觀塘成業街7號寧晉中心15D - 地鐵站B2出口步行3分鐘
日期: 10月30日及31日(共兩日)
時間: 31/10: 中午12時至晚上10時
