抱歉,發生點錯誤。
重新載入
參與綠腳丫活動 BB街巿購物大挑戰讀書會
SiuB_Fan
2014-06-11
1523
0
分享
收藏
剛剛過去的星期日很特別,我們參加了一個很特別的活動。我們去與小朋友去了大埔廣福邨的街市去購物。可能你會問,去購物有甚麼特別?的確,一般去購物並沒有甚麼特別,甚麼一些社區中心也可能有舉辦,甚麼提升兒童自信、溝通能力訓練等。但如果主題是去了解傳統社區的人和物,關心舊式社區小店的生存,遊玩一些我們父母輩小時候的遊樂場,爬兩層樓高的滑梯呢?香港人甚麼也急速,小朋友的成長也需要急速,還記得我們小時候是怎樣成長的嗎?還記得每天在遊戲場跑跳爬的日子嗎?

今次活動舉辦的組織叫「綠腳丫親子讀書會」,是哈比學堂的新嘗試。詳細留待之後介紹,或者可以上佢地網頁,facebook了解多一點。如果你係喜歡與孩子一同閱讀繪本的父母,你就更加要了解一下。今次我地參加的「BB街巿購物大挑戰讀書會」,內容介紹係咁的:
1. 傳統涼茶鋪美味涼茶競選
2. BB街巿購物大挑戰
3. 舊式辦館導賞及待用食物箱設計、繪畫
4. 玩轉懷舊遊樂場
負責今日活動的係兩位義工姐姐,我地準時去到廣福邨,食個午餐就去集合了。人數唔多,大概有六個家庭,六七位小朋友,大家都大概係三至五歲。
一開始當然係講故事啦!講左一本繪本,名叫「媽媽買綠豆」,內容係關於小朋友與媽媽一同去市場購物的經歷,切合今天的主題內容。大家都好留心聽呢。
媽媽,買綠豆
跟住就每一位小朋友派發一張工作紙,一共有4項活動。要去唔同地方格價、買野、數下有幾多店鋪已經無營業及計劃一下有甚麼適合捐贈給長者。出發前義工姐姐仲提醒我們把經歷留給小朋友,希望家長盡量放手呢。對我地來說當然無問題,解釋下文字的內容,就由小朋友帶住我地出發。


要抄低不同的價錢,究竟小店、7-11還是超市平一點?
任務二,數算下有幾多間店鋪已經無再營業。則係有幾多鋪頭已經丟空執笠了。
 最後我地數到有33個位已經無營業,差不多有整個街市的三份二呢。
最後係購物啦。我地買左一個膠筲箕、三兩綠豆、四隻雞翼,買雞翼叔叔仲讚小朋友有禮貌。

分享下買左乜野先
小朋友返晒來,就係大家分享下經驗,總結一下的時候。每個人講下自己做左乜,買左乜。再由義工姐姐講解一下活動的意義,今日香港小店的生存情況等等。當然,今場的小朋友太細了,又真係深左少少。不過小朋友回到家,隔一日我問佢,佢都仲識答我係小店買野會平一點,係超級市場就一定要買六包。其實佢地都明白一點,只係生活經驗太少,未能融會貫通,呢一方面就係家長的責任了。


我個人幾喜歡咁隨意的安排,搵到乾淨地方就坐低,一齊分享,一齊玩。社區係應該咁運用的,而咁樣的模式,亦証明到社區係可以屬於大家的。你試下係商場中間坐低傾計…
係時候諗一諗,動腦筋,如果要送一些物資俾長者,可以送乜呢?小朋友好有心的,佢提議送飯、麵、水果一些自己喜歡而又好味的東西。咁我地就唯有話俾佢知,因為要放係到等人攞的,唔可以放一些會變壞的東西,所以要買一點可以放耐一點的東西。
 大家一齊設計食物箱

 買好物品了,大家一執好佢,等來拿取的長者可以方便取用。

根據綠腳丫的義工所講,物資會放係糧油食品店門口,他們會代為監督長者拿取的情況,確保不會被濫用,而亦會分兩日拿出來,不是一次過的。希望可以為需要的長者做一點事情吧。
 你估下小朋友做乜咁開心?
 因為涼茶鋪的主人俾冰咁多位小朋友玩,係咁熱的天氣下,佢地當然開心啦!
哥哥仔仲請佢地飲東瓜茶。

最後就係爸爸最喜歡的環節,懷舊遊戲與遊樂場。大家去下洗手間,補給一下之後就去玩了!小朋友玩左拋手巾、有隻雀仔跌落水,佢地都玩得好開心。而最開心既就係下面的遊樂場了!

鐵做的爬鋼架!如果有成組正方體的仲正!爸爸當然立即傳授自己當年的百厭玩法俾小朋友啦。

咁高既滑梯真係唔多地方有的了!好懷念小時候係滑梯上跑跳的情況。依家玩返,其實自己反而有點擔心呢…真係人老左,細膽左了…
木做的一組攀爬玩具,行上去係一條仔圓木的感覺係唔同的。其實有不同的體驗,不同的遊樂設施,小朋友先可以有充足的經驗成長。依家的遊樂場係安全,但係個個一樣,你真係覺得你的子女玩得開心?有不同的體驗?外國的公園通常好簡單,幾組攀爬的設施,廣大的草或沙地,已經係小朋友成長最佳的場地,香港幾時可以咁樣做得到?我真係好想講,爬得高係唔會跌死的,反而恐懼於向上爬高的,長大成人後又點會有向上面對挑戰的勇氣?從來未跌過的小朋友,又怎會有跌下來的承受能力?爸爸媽媽們,放手讓你的子女爬多一點吧!由身體開始感受,是人類最基金的學習能力呢。
對於小朋友而言,又有甚麼比跑動,朋友來得享受呢?
對小朋友而言,又有甚麼比有朋友陪伴一起體驗來得愉快?(相片取自另一位家長)

對爸爸而言,很久沒有來這種舊式的街市,屋邨了。經常在新聞聽到舊邨重建,領匯問題等等。其實與自己有關的事可能太少,我們聽完後又有多少關心身邊環境的消逝?我們小時候的成長環境,社區鄰里,不是你今天仍深深記著的東西嗎?有時間,幫襯一下小店吧。那種人情味,那種方便不是超級市場或商場可以給你的。還記得小朋友去買三兩綠豆嗎?你不妨試下去超市問下可以買到嗎?
















---------------------------------------------------------------------------------------------------------------------

你有聽過綠腳丫嗎?你參加過他們舉辦的活動嗎?他們是一個由民間人仕創辦,利用兒童繪本,藉著故事,讓小朋友了解人與土地、社區之間故事的組織。在他們的facebook專頁,有以下的自我介紹:以下copy from綠腳丫facebook。
「綠腳丫親子讀書會」是哈比學堂2013年的一個新嘗試,故事爸爸媽媽將透過綠繪本,藉有生命的故事,帶孩子思考人與土地/自然的關係。歡迎家長帶孩子一起來玩故事。
Description
一)關於「綠腳丫親子讀書會」
「綠腳丫親子讀書會」是哈比學堂 2013 年的一個新嘗試,故事爸爸媽媽將透過綠繪 本,藉有生命的故事,帶孩子思考人與土地/自然的關係。歡迎家長帶孩子一起來 玩故事。

網址:http://www.hapischool.net/

二) 我們的使命
 1.正面親子文化實踐
 2.推動親子閱讀風氣
 3.家庭力量再造
 4.社區網絡凝聚

三) 核心價值
 1.共樂
 2.共學
 3.共創
 4.共享

四) 我們的工作
 1.舉辦讀書會 :給家長、孩子獲得從親近大自然和社區找到喜悅的經驗。
 2.建立資料庫 :給家長、孩子更多的親近大自然的機會。
 3.推廣綠繪本 :給家長、孩子多角度認識我們的城巿,學習守護腳下土 地的技能和態度。
 4.創造社區經濟:凝聚家庭力量,創造社區經濟。
 5.舉辦爸爸學堂:鼓勵爸爸在親子育兒承擔更多的責任。
 6.發起香港親子讀書共享平台:推廣親子讀書會文化。

有時間的話,不妨對他們了解多一點。也讓你的孩子多了解身邊的事物多一點。


============================================

感謝 SiuB_Fan 提供以上資料

SiuB_Fan的網誌: http://siutimfamily.blogspot.hk/


============================================

~END~
商店 綠腳丫