7月1日,係小甫貓同老公既結婚七週年紀念日

由第一年既浪漫慶祝,到第三年既三人行慶祝,再到第七年既求其食餐飯慶祝

都可以話..好現實...哈哈

講真..有餐飯食下,有慶祝都好了

到第幾十週年時,可能大家都忘記左係結婚週年了...kaka

雖然係7月1日係幾易記

回想係七年前既今日...

大家飲到啤啤夫...

伴郎仲飲到入院...

老公返到屋企不醒人事

一個兄弟幫手拎晒所有禮服呀,水果籃呀,酒樓送既野呀,同埋手飾等等

一口氣拎晒,直衝上三樓...

夜麻麻,係老公不醒人事時,我係到慢慢拆人情...

依啲回憶....希望幾十年後我都仲記得

好..講返今日...

今日下午去左APM唱K..

而家啲K..下午已經好full,要等

難怪..我見唱完出尼既人..

有一班婆婆媽媽...

再出尼..有一班小學生...

真係同當年我地只有年青人去既KTV好唔同了

不過真係既...我都係帶悠悠去開佢既兒歌演唱會呢...

唱完K,就食晚餐

為咗唔洗等位,六點左右就快啲搵食了

去左依間Made in HK

環境都唔錯

我地座左Bar枱位,都幾好

至少唔會隔離泊住另一枱人,點傾計都得

先尼餐湯同餐包

湯OK,包乾硬咗啲呢

另外悠悠話要飲酥皮湯

酥皮湯都好快上枱喎

熱辣辣,好好味呢

我點左個安格斯牛柳配紅酒汁

唔錯,牛肉幾軟,但唔夠滑

老公點左雜扒

佢話係花園餐廳貨色

但賣$208囉

不過條腸就幾好味既

我地仲加咗$28點左個葡汁蔬菜

依個菜得好少

而且汁還汁,菜還菜,只係就咁淋上面

早知道個扒有跟咁多菜就唔加啦

埋單四百幾,

OK啦..食物質素普通

不過環境我幾中意

我中意座高枱

硬係覺得對腳"fing fing"吓,感覺好悠閒咁呢..哈哈

咁就叫做慶祝完畢?

未既.....

食飽飯去左東海堂買左個細細地既北海道芝士蛋糕返去慶祝下啦

今年自己懶無整cake...買個現成算啦...

七週年快樂喇~~~~