噚晚得知爸爸今日睇報告，於是今朝打俾佢，約佢同媽媽一齊飲茶。打俾爸爸時，佢等緊睇醫生，我同拾爺急急換衫，未出門口，爸爸再打嚟，表示已經睇完……我著佢同媽媽多等我哋一陣，再同拾爺急急出門。好彩，去到月台就有車，轉車時，又係一去到就有車，唔駛等，到尖咀後，即時打俾爸爸，佢同媽媽剛好行到去佐敦，於是兩老就搭一個站嚟會合我哋。

本來想同兩老去海景軒開餐，點知餐廳full咗……於是，改去天寶閣。

論環境，天寶閣比香宮差得多，雖然地方較大，但所擺放嘅枱亦較多，各枱嘅距離較近，空間感不及香宮。而且，上次我與爸媽三個人獲安排嘅枱，仲要比今次同埋拾爺一齊四個人嘅大呢！呢到啲人講嘢都聲大大，好嘈吵，冇香宮咁予人高級餐廳嘅感覺。論價錢，呢到嘅收費竟然比香宮仲要高少少，但人家係米芝蓮二星，呢到最多只獲得一個「多獎食府」嘅名銜。就睇吓佢有咩能耐收費高過人！

爸爸開咗壺鐵觀音，拾爺就要普洱，兩種茶都好普通。尤其上次喺香宮都係飲鐵觀音，更將今次飲到嘅比下去。人家茶錢$25位，還好呢到收得平少少，$23位，如果唔係，就太不自量力了！

雖然呢個可能只係酒樓用自己嘅布包起茶葉嘅作法，但感覺好似用緊茶包，唔鍾意！

點咗幾個餐廳顯示為得獎嘅推薦點心，才剛聽到隔離枱嗰三個嘈之巴閉嘅女人提到呢到上菜好快，我哋嘅點心就一次過上哂嚟。但張枱真係好細，唔太夠擺……

喜上眉梢天寶鮮蝦餃 ($58)﹕好大粒嘅蝦餃！用料好足！而且蝦肉好彈牙！但冇鮮味……而且，粒粒蝦餃嘅用料不一，一籠四粒，一半有筍一半冇……蝦餃略嫌濕咗少少……

鞠躬報喜蠔皇叉燒包 ($46)﹕賣相同味道皆一般，叉燒係就係一嚿嚿落足料，唔係俾啲碎濕濕嘅嚟hea客，但呢一嚿嚿嘅叉燒，食落去又乾又硬，完全唔得juicy！麵包又唔夠軟熟，完全唔值呢個售價！

連贏韮王鮮蝦腸粉 ($64)﹕一睇賣相已經產生反感，腸粉皮太厚了吧！一口咬下，更覺其又濕又韌！每次帶爸爸去食好嘢，佢都會點腸粉，香宮、名閣等等，爸爸都激讚腸粉夠滑，但呢間嘅腸粉，爸爸一食完就話整得唔好！哼，佢竟然仲收得貴過其他酒樓！

食完第一輪後，waitress唔止一次走嚟確認我哋嘅菜係咪上哂，好似想趕人走咁……

拾爺未飽，於是我哋再點兩樣嘢﹕

興旺XO醬炒腸粉 ($58)﹕以為XO醬會被撈勻於腸粉中，點知上枱係呢個模樣都算喇，但我哋點都食唔出啲腸粉係炒出嚟，根本就係蒸……而且，啲腸粉硬到唔似新鮮整……令人極度失望！自家製嘅XO醬亦唔見得特別好食，反而食呢個時，爸媽同時提起香宮食到嘅XO醬，大家都讚不絕口，搞到拾爺好想去試呢！

源源生煎黑芝麻流沙包 ($48)﹕生煎但唔流沙……真想叫佢回水！味道好一般，不值一試！

埋單$408.2，用HSBC或Hang Seng或AE白金卡都有85折。

總結﹕呢個價錢，去香宮都係差唔多，但食物質素同環境都好好多，所以，唔會再幫襯！

============================================

感謝 honeyhinbaby 提供以上資料

honeyhinbaby的網誌: http://honeyhinbaby.wordpress.com/

============================================