朝早完咗學校活動，就約定拾爺去荔枝角嘅「程班長台灣美食」開餐，雖然下個禮拜就出發去台北，到時想食幾多台灣菜都得！但……今日出開嚟睇樓，就順便試吓啦！

去到程班長門口，嚇親，好多人等緊！！！入到去，又見另一條龍排緊點餐，於是就問其中一人點拎飛，個女人話佢唔知囉……好彩後面對couple教我搵個包咗橙色頭巾嘅「美美」拎飛，「美美」講普通話架，仲要係好正宗嘅台灣腔添呀！拎到飛，40號籌，當時先叫到28號……幸好都唔係等咗好耐，因為呢間餐廳唔係sell環境，坐位擠迫到你一食完就想走！

同拾爺等緊時已經決定要咩，一叫我哋個籌，我哋就跟「美美」入去，得到餐牌一份同原筆一支，決定好食乜，就自行行出去點餐。我哋食時，人龍開始散，所以點菜都唔駛排隊。負責收錢同落單嘅姐姐又係講國語，佢收完錢後，就俾張單同一個有號數嘅排俾我，叫我番位前自己拎餐具。

我哋點咗﹕

紅燒半筋半肉麵 ($52)﹕餐牌有顯示一隻辣椒，但其辛辣程度實在唔止一隻辣椒，我只係食麵已經覺得好辣……本來係打算同拾爺一人一半，但因為太辣，我只能淺嚐幾口……麵，唔太好食……牛筋同牛肉都不過不失，我欣賞個湯底，雖然我自己食唔到辣，但其實佢真係幾惹味！

滷肉飯 ($28)﹕賣相好似好乾咁，但其實食落啲滷肉又唔會覺得乾，只係……我食開嘅滷肉飯都有滷汁，呢個卻係用油嚟濕潤啲飯……好唔健康……同埋滷肉略鹹。

牛肉捲餅 ($32)﹕總得個捲餅片未熟透，硬得嚟見到白色粉，口感仲要好實添……

============================================

感謝 honeyhinbaby 提供以上資料

honeyhinbaby的網誌: http://honeyhinbaby.wordpress.com/

============================================