|
香宮
|
|
honeyhinbaby
2014-01-10
847
0
|
|
趁住考試日子有得早放，又同爸媽去食好嘢！爸爸今日覆診，佢睇完醫生嘅時間正好就係我放學之時，clinic又喺我校附近，時間夾到不得了！我哋相約尖咀港鐵站等，但我由尖咀紅線出口正打算行去尖咀個西鐵入口嗰邊時，就見媽媽站咗喺到大大聲講咩開電話呀之類，初時以為媽媽打過俾我但我冇聽所以佢鬧鬼我，但越聽越覺得佢唔係同緊我講嘢，原來我爸爸正喺我幾個身位之後……呢兩老被我隔住照樣溝通到，仲要無視我……原來爸爸想喺尖咀紅線出閘位等我，媽媽就覺得應該去番P出口等我，所以正打算一人企一個位置……但其實嗰刻我已經出現咗，只係佢哋睇我唔到…… 揀咗香格里拉入面嘅香宮午膳，呢間係米芝蓮二星餐廳！
去到reception講低自己個姓同book咗幾點幾多個人後，個reception (當時係男人，並非相中人。)竟然將我個英文名讀錯咗……我明明睇到佢電腦顯示個名係正確嘅，但佢將個女人名讀咗做個男人名……我即時更正佢！我唔係男人呀！>< 個waiter帶我哋去到張fit到5、6個人嘅圓枱坐低，我即時叫爸媽坐入邊，自己就坐近通道嘅位置。其實我打嚟時，有要求過唔要通道位，對方話佢哋啲位都好舒服，我就咁睇，其實差唔多張張枱都有人要坐通道位置，但有一張，我見都係得三個人，但可以三個都唔駛坐呢啲位，只係……餐廳冇留到俾我，俾個外國人坐咗……
坐低後，有個waiter走嚟問我哋要咩茶，爸爸就order咗鐵觀音，之後waiter送上每人一杯welcome tea，係菊花茶嚟嘅。
菊花茶﹕冇咩特別，都係菊花茶一杯咁囉，哈哈。 反而個鐵觀音幾好飲，味道好濃！不過，飲到後尾，茶色減退時，就開始有嚡口之感…… 媽媽負責點菜，佢好努力咁睇menu時，我就上網睇吓呢到有咩好食，餐廳自稱嘅signature dishes動輒百幾二百蚊per head……因為爸爸仲係好多嘢都唔食得，所以我哋只叫咗一樣都埋一件，其他就係媽媽隨心所點。 點菜後，餐廳送上開胃前菜同調味﹕
腰果﹕好脆！不過，唔會覺得好好食……
豉油﹕浸咗條辣椒，少辣。 XO醬﹕辣到我呢……但幾好味！媽媽同好鍾意！ 豆瓣醬﹕冇試到…… 坐咗一陣，我哋點嘅菜陸續上枱。
芋絲芝士網皮卷 ($42)﹕本身好鍾意食芝士，但呢個卷我都食唔到芝士味……外面嘅芋絲真係好「網」，又脆又硬，可惜唔係我杯茶……
稻草骨 ($80)﹕莫師傅招牌菜式之一！以為同東坡肉差唔多，但佢脂肪比例卻比一般東坡肉少！上層通常係我最鍾意但又最唔健康嘅肥死你肥膏，仲要係厚層嗰隻，但呢件稻草骨就算係最上層，都唔覺得佢肥，想食呢類食物，但又怕唔健康嘅人，呢道菜絕對滿足到佢哋嘅口腹之慾。雖然個稻草骨冇咩脂肪位可以食，但就成件都食得到，我意思係，佢好「淋」，完全冇因為係瘦身而難咬開，讚！至於個sauce，唔特別好味，但唔會太重口味，ok。
香宮鮮蝦餃 ($60)﹕味道ok，蝦餃皮唔會過濕，但煙韌度唔夠，我鍾意比較煙韌嘅口感。餡料都足，食到彈牙嘅蝦同爽口嘅筍。
鵝肝蟹肉小籠包 ($56)﹕食唔到鵝肝同蟹肉味……只覺得佢同普通嘅小籠包冇分別……始終覺得小籠包都係合江小鎮整得最好味！
香茜牛肉腸粉 ($56)﹕一睇個賣相就知個腸粉唔差，皮薄！而且，好少酒樓嘅牛肉腸係一塊塊牛肉，通常係用啲牛嘅唔知邊部份搞埋一堆嘅免治肉咁上……當然，以呢到米芝蓮二星之名，再收幾十蚊嘅價錢，當然唔會俾啲劣質食物啲客人架啦。爸爸好鍾意呢道菜，佢讚啲牛肉淋得嚟又好有牛味！因為爸爸而家好多嘢都食唔到，尤其係硬同韌嘅嘢，但佢竟然差唔多食哂成碟，所以啲牛都真係好淋！我只食咗好少 (想爸爸食多啲！)，味道ok，試唔真……太少了…… 食哂枱面上嘅食物，有個waiter就走嚟問我哋嘢食齊哂未，仲有冇嘢想叫，又或者要唔要甜品。我叫佢放低甜品menu睇吓，之後同爸媽傾偈時，又有另一waiter走嚟問我哋仲叫唔叫嘢食，我哋話唔叫，佢就收起哂我哋啲碗碟，好似想趕人走咁…… 坐多一陣，媽媽問我叫唔叫甜品，我叫佢揀，反正都唔會再嚟食嘢 (下次梗係試另一間啦！)，媽媽就點咗﹕
奶皇千層糕 ($42)﹕賣相好差！啲奶皇整到左一pat右一pat，明明應該層次分明嘅糕點，卻總有一邊只有奶皇……不過，媽媽話呢籠甜品上枱時，waiter一打開個蓋，即時香氣撲鼻！因為我去咗洗手間，所以有幾香真係唔知喇，但味道好一般…… 埋單$384.3，因為有Hang Seng Bank嘅credit card，所以已計咗個85折，睇睇張單，茶錢要成$25一位，所以嘛，啲鐵觀音咁香咁濃囉。
感謝 honeyhinbaby 提供以上資料 honeyhinbaby的網誌: http://honeyhinbaby.wordpress.com/
|
| 商店 | 香宮 Shang Palace |