亞頭要食太平館餐廳嘅梳乎厘，於是，我哋一行四人(女副校身體抱恙)定咗今日放學去食。亞頭揀咗佐敦店，訂咗12點45分嘅枱，由於佢同女俠都要監考至12點25分，我同小肥就做先頭部隊，12點15分就由學校出發。

去到太平館餐廳，講低訂枱時間同姓氏，就有人帶我哋去坐，waiter最初俾張門口四人枱我哋，話光猛啲，又大張啲，小肥正想坐低，我卻表示唔想坐門口……於是，waiter再帶我哋入去另一邊坐，佢俾張通道位嘅枱我哋，我見有卡位，就要求坐卡位，waiter話可以，不過佢怕卡位太迫，我哋坐得唔舒服。其實個卡位都夠四個人坐，只係冇咩位俾我哋擺袋。唔理喇，我想坐卡位多啲。

小肥一坐低，就即刻拎卷出嚟改……我都唔執輸，又拎一疊出嚟改。差唔多一點，亞頭同女俠到喇。我哋叫waiter俾menu，見有set lunch，除梳乎厘外，有齊我哋想食嘅嘢，但跟餐嘅雞翼只有四隻……於是，我哋點咗三個餐，再散叫雞翼，當然，亞頭要食嘅梳乎厘我哋一齊唔會漏啦。Waiter話雞翼要等半個鐘，梳乎厘時間較難預，因為而家係午市時間，佢叫我哋預35分鐘，我提議嘢食嚟齊後再order。

叫完嘢食，waiter先送上餐包。叫完嘢食，waiter先送上餐包。之後就到餐湯喇，但我哋明明係order兩白一紅，送上嚟時，卻變成兩紅一白……小肥即時出聲。

羅宋湯﹕辣咗啲……又「杰」咗啲……

豬脾飯 ($80)﹕豬脾同飯分開上，但兩碟都唔熱……只係微暖……加上呢到開行冷氣，所以，兩碟嘢都好快凍哂……唔好食……味道方面，豬脾嚡咗啲，個sauce又鹹咗啲……

烚鹹牛脷飯 ($80)﹕呢個好食！牛脷只係微鹹，食落唔嚡，最緊要係佢夠熱！(食食吓先記得要影相……)

瑞士雞翼 ($160)﹕唔夠熱，只係微暖……而且過鹹……咁就收$20一隻，真係可一不可再！

上瑞士雞翼後，我即時提亞頭要order梳乎厘，今次係經理嚟落order，佢話要等一個鐘……但亞頭好快就答佢照等，哈哈。結果，個梳乎厘真係差唔多一個鐘先到，經理過佢叫咗廚房加大火去整，所以都快咗5至10分鐘架！

梳乎厘 ($128)﹕好大個呀！味道確係唔錯！雖然內裡空氣多，所以先咁大，但食吓食吓都幾滯……蛋白嘛！呢個梳乎厘可一可再，但要至少四個人先好去食，哈！

我哋食到三點先走，出到去睇吓餐牌，已經做緊下午茶市lu，梳乎厘二人餐$128仲有嘢飲，其它set lunch都有afternoon tea嘅set，價錢當然平咗啦。

============================================

感謝 honeyhinbaby 提供以上資料

honeyhinbaby的網誌: http://honeyhinbaby.wordpress.com/

============================================