鬧鐘遲咗響，搞到我倆趕頭趕命咁梳洗換衫出門口，十二點半準時到達Restaurant Petrus。先小人後君子，一嚟就問清楚張coupon係咪真係用得先，confirm咗可以用，我同拾爺就安心報上名來，等人帶我哋入去坐。

餐廳裝潢一流，好有古典貴氣！我哋獲安排坐上高一級嘅位置，所以就算離窗遠啲，仍然可以睇到個海景。不過……今日雖然冇落雨，但天陰陰咁，大殺風景！

餐枱上除咗應有嘅餐具外，仲有一盒已放六種鹽嘅靚靚盒同枱花。

打開餐牌，set lunch嗰版只得法文同英文，其他散叫嘅嘢食就有中文，不過睇到一個湯都要成$290，我諗只有有錢佬先會叫。今日啲lunch set好似唔多啱食咁……同拾爺揀咗好耐……

Order完嘢食後，有個waitress捧住籃麵包向我哋略作簡介後，就問我哋食邊隻，我同拾爺都揀咗兩隻軟包嚟食。

左上同右下顯示嘅係我同拾爺揀咗嘅麵包，左面嗰隻好普通，唔夠暖添， 右面嗰隻就超好味！我同拾爺都分別食咗四個呢！(因為我哋一食完，就會有waiter捧住籃包嚟問你要唔要。)呢個包真係做到外脆內軟架，好味過出面好多 麵包舖整嘅多多聲！餐廳供應咗兩款牛油俾我哋用作搽麵包之用，淨色嘅係普通牛油，另一款就係紫菜味。拾爺嫌後者太鹹，我就覺得佢同淡淡嘅麵包幾夾，雖然都 係鹹咗啲，但有啲味，食得開胃啲嘛！而且，呢隻味都幾特別呀！

個笑容滿臉嘅waitress仲有同我哋介紹咗鹽盒入面嘅其中兩隻鹽﹕

左面嘅鹽加入樟木，最好用嚟配海鮮；右面就加咗乾蔥，配肉就最正！

以下係我哋叫咗嘅嘢食﹕

Entries:

- Blue crab in white wine jelly, cauliflower cream

由於我滴油不沾，呢個用香檳整成嘅啫喱盒實在唔太對我個胃……而且個黑加倫子醬好酸……蟹肉冇乜味，好普通嘅一道菜……但賣相又確係令人賞心悅目嘅！

- Fregola sarda pasta with artichokes and cockles

好食！係繈麵包之後又一大驚喜！我本身好怕食一粒粒豆類嘅嘢，但呢道菜好正，啲豆煙煙韌韌咁，加埋個超美味嘅sauce，食到停唔到口！而且呢道菜暖暖地又唔會太熱，唔怕燙口，食得開懷又放心！

Potages

- Coco bean and olive oil soup, roast salted cod in chlorophyll

上菜嘅方法好得意，佢先上隻放咗料(即係鱈魚)嘅碟，然後先再喺我面前倒湯，齋係呢個過程已經覺得好 正！不過……呢隻湯唔啱我……就連拾爺都唔太buy……我唔識講，佢唔係難飲，但真係唔好飲！送俾我，我都唔希罕再飲一次，但又唔會係死都唔飲嗰隻囉。佢 個texture好sandy，唔知係餐廳有心定係呢隻豆一定係咁，個湯一啲都唔滑，每啖都好嚡口，好似有啲極細小嘅沙粒不停磨住條脷咁，即係好似紅豆沙 咁呢。成個湯其實冇乜味，好淡好淡……

- Lentil soup with petit sale and burnt bread jelly

拾爺呢碗又係同一上菜方法，不過，佢係用碗嚟裝之餘，啲料係一大堆豆ssss。拾爺以為我唔會鍾意飲呢碗湯，但我哋交換飲時，我哋都一致認為呢碗好味啲。雖然唔係咩特別正嘅嘢，而且個味好濃，但同另一個比，佢已經贏成條街喇！

Plats principaux

- North Atlantic cod, sweet onion puree and soya aromatised chicken jus

拾爺之前上Openrice，睇到好多食評都盛讚呢度嘅鱈魚，所以揀main course時，拾爺就豪不猶豫咁揀咗呢個。但其實呢個同之前嘅唔同架，點菜時我問過waiter點解冇鴨(另一受歡迎菜餚！)，答曰﹕我哋每兩個禮拜就 轉一次menu架喇，因為有啲客一個禮拜嚟兩、三次，怕佢哋食到悶。一個禮拜兩、三次囉，講緊嘅，係$500 per head嘅lunch喎！點解啲人可以咁有錢嘅呢﹖講番個菜，我同拾爺都覺得塊鱈魚太鹹……係咪法國人鍾情食較濃味嘅食物呢﹖頭先個湯又好重味，嚿紫菜牛 油又鹹，連鱈魚都鹹……雖然塊魚係就係鹹咗啲，但我幾鍾意佢個煮法，面層沾滿黑白芝麻，唔錯唔錯！另外，個炸洋蔥圈好好味！

- Lacquered slow-cooked pork breast, black truffle crushed potatoes

其實，我最初唔係揀呢個做main course架！因為我鍾意食肝鵝，所以就算呢度個set冇provide，我仍然想食吓個鴨肝。但另一方面，我又被呢道菜嘅black truffle吸引，結果，喺拾爺慫恿下，我叫咗佢。落order時，個waiter已經俾個心理準備我，話呢道菜雖則話係豬胸，但其實係類似東坡肉嘅 嘢。肥膏﹖冇難度！我不嬲都好鍾意食架啦，雞，我最鍾意食佢層皮同肥膏位！豬、牛、羊扒，我亦專揀有肥膏嘅位嚟食！(所以成日俾人鬧……我都知唔健康架 喇，但真係好難忍口……)

呢道菜一上枱，個賣相又係好吸引！Waitress話呢道菜配以black truffle sauce係好match嘅配搭，講到我食指大動！影完相後，我就即刻切嚟食，點知……食咗一啖，我已經滯到反胃！我承認頭先食咗四個麵包同一個 starter，再飲咗湯之後係飽飽哋，但佢呢道菜冇煮溶啲肥膏，而係任由佢哋保留結結實實嘅texture，再加上濃烈無比嘅black truffle sauce，係漏上加漏，驚滯你唔死嘅配搭！作為肥膏後援會會員嘅我都要投降……我有嘗試去再食，但食到第二啖，開始想嘔……鍚到我濃嘅拾爺，當然即時同我交換嚟食啦！

兩嚿肥豬肉雖然令人難以進食，但個配菜整得好好！咁大個女都未試過成塊black truffle咁食架！出面好多餐廳都會標榜自己用truffle煮食，但有幾多係俾靚嘢你﹖睇個價錢就知唔會好得去邊啦，所以嗰啲根本唔可以當係食過。 呢到就唔同喇，話哂米芝蓮二星喎，唔會俾假嘢你嘅！拾爺叫我食之前，聞一聞。一嗦，嘩！真係好鬼死香呀！香到唔捨得放入口呢！再食個薯蓉，內裡混入 black truffle，真係正到震！呢道菜配角仲好食過主角！

食完main course後，waiter入嚟問我哋要唔要dessert，我其實已經又滯又飽，食唔落喇……不過都有叫佢俾個menu我哋睇。但就真係得個睇字，冇叫到，因為睇到啲字都飽！

去完洗手間番位，見到枱面放上一碟petit fours﹕

好精緻嘅甜品！可惜……我哋都食滯咗喇，對住佢哋都提唔起食慾……於是叫waiter先上餐飲。個waiter知我被嚿「東坡肉」打敗咗，提議我飲吓檸檬嘢，其實佢唔叫我都會，因為我都唔飲咖啡同奶茶嘅，哈哈！我哋叫咗coffee同lemon tea﹕

飲住lemon tea嚟食碟petit fours都叫勉勉強強食我哂，呢碟咁精緻嘅甜品係隨餐附送嘅，不過就冇乜特別，你唔會食到想死，但亦唔會嘩嘩聲。

扣除$500 gift voucher後，簽多$490卡。以米芝蓮二星嚟講，呢個價錢其實好抵，去131或Sabatini都要呢個價啦！不過，雖則呢度環境同service 一流，食物質素實屬普通，可能係今日個menu唔啱我哋啦，但呢到對我哋呢啲窮人嚟講真係一啲都唔平，我哋應該都唔會再嚟架喇！今次唔係拾爺個「度叔」親 戚，我哋都唔會嚟，係咪都要多謝佢俾個籍口我哋食吓米芝蓮二星餐廳呢﹖

臨走前嚟幅相先，我件新衫靚唔靚先﹖

============================================

感謝 honeyhinbaby 提供以上資料

honeyhinbaby的網誌: http://honeyhinbaby.wordpress.com/

============================================