3 AUGUST 2014(SUN)

哈哈哈...我都話科學園係一個好地方，短短三個月我地已經係第四次入嚟啦！

不過今次有少少唔同，因為我地係應科學園公關姐姐嘅邀請，參加「 探索科學‧趣味坊」~

我地仲著住套靚靚親子裝，係唔係好靚呢？我自己就勁鐘意啦....哈哈哈~

我地早左少少去到科學園，所以就周圍行吓先，見到個波波大象，好可愛呀~

我地由公關姐姐安排，第一個參加嘅工作坊就係去整風車啦！

首先導師姐姐就向我地講解風車同風力發電嘅原理，原來科學園入面其中一座大樓上都有個大風車，係用嚟進行風力發電。嘩....大風車真係好想睇吓，希望下次入嚟可以有機會去睇吓啦！

之後就開始教我地整風車，我地好留心地聽導師姐姐教我地整呀~

完成啦...靚唔靚呢~

同場都有經濟日報嘅記者姐姐同攝影師哥哥係度，小小豬仲有幸變身成為小模特兒添！唔知小小豬嘅相會唔會刊登係報紙上面呢，真係令我有少少期待呀~

之後我地就去製作萬花筒，雖然個步驟就比風車多左啲啲，不過小小豬都算好努力咁去完成呀~

參加完兩個工作坊之後，我地就去走訪傳統小食攤檔，食龍鬚糖及懷舊吹波糖。其實依兩款懷舊食品我細個時都好鐘意食，不過依家真係好少見到，尤其係個又味又好玩嘅吹波糖，都真係好耐冇見啦！

我地先嚟吓叔叔表演拉龍鬚糖先，真係三兩吓功夫就已經可以有得食啦~

第一次食嘅小小豬開頭都有啲驚訝，食完一粒之後就仲想再食添。不過由於小小豬對花生有敏感，剛才食嗰一粒係叔叔專登整嘅冇加花生，所以就只此一粒，等我下次有機會見到再買俾小小豬食啦~

好期待嘅吹波糖呀~

整糖姨姨話小小豬細個，應該唔夠力吹起個波波，所以叫見嚟吹。哈哈哈....有得玩我當然非常樂意幫小小豬依個忙啦！我都真係好耐冇玩過，真係好懷念呀~

哈哈哈...小小豬好乖咁同我分享粒波波粒，緊係啦..因為可以快啲食完，就可以食手上另一粒棒棒糖嘛(當然佢嘅奸計係唔成功呀)~

食完糖糖之後，我地又去參加另一個工作坊，就係自製可再生能源工藝品。

依啲咁高難度嘅玩意我當然係唔在行，唯在派出大肥豬去陪小小豬整啦！

睇佢兩父子幾留心聽張SIR講解~

其實依個模型對小小豬嚟講都真係有啲難度，所以好多細少嘅工序就由大肥豬負責，容易嗰啲就俾小小豬整啦~

經佢地兩父子合作之後，製成品終於完成啦！只要用強力電筒照吓個太陽能板，個風車就會轉啦~

之後我地就去睇夏日奇趣表演，其實個表演都幾多唔同種類，有扭汽球、撞撞球，仲有一個魔術師姐姐表現添呀~

我地真係好留心咁睇表演。小小豬仲睇得不知幾開心，佢最鐘意就係魔術師姐姐，成日都扮姐姐表演變糖糖呀~

最後一個工作坊就係馳騁四驅車天地，依個可以話係小小豬咁多個工作坊之中最鐘意嘅一個~

鴨仔哥哥講解完四驅車嘅原理之後，就到我地整啦！工作人員一盒盒咁派俾我地時，我都好擔心要自己砌最部四驅車~

哈哈哈...原來唔係，我地只需要放上電芯、兩部分嘅大零件同埋車身，所以依啲任務就交俾小小豬負責啦~

整好晒就可以去放車啦....睇佢幾心急~

放車時個樣又幾肉緊，因為小小豬好擔心佢部車會飛出路軌呀~

玩完依個工作坊之後，其實今日科學園為我地安排嘅活動都已經完結，餘下就係我地自由時間。

依個時間亦都係小小豬等左全日嘅活動，就係去玩彈彈床啦~

開開心心又過左一個下午，其實整個「 探索科學‧趣味坊」都仲有三個小工作坊因為時間關係我地今日玩唔到，好似雜耍、魔術學堂同埋撞撞球，有機會希望可以再帶小小豬入嚟玩過呀！

嚟緊8月10日、8月24日* 及8月31日都會有依個活動，有興趣嘅朋友仔可以入去玩一轉啦！

More Information :
Website：http://www.hkstp.org/zh-HK/News-Media-Events/Events-Seminars/2014/Explore-the-FUN-of-Science-%281%29.aspx#.U-ucdqNyy1Y
Facebook：https://www.facebook.com/HongKongSciencePark

MY FACEBOOK~


MY WEIBO~

 

MY E-MAIL~

 

 

其他博客區
※※ SINA ※※

※※ MyBB星級Blogger ※※

※※ She.com ※※

※※ WeShare ※※

※※ U-Blog ※※

※※ SeeWide ※※

※※ BlogSpot ※※

※※ BK Milk 親子語 ※※

※※ Cook 1 Cook 星級廚師 ※※