遊完山梗係要玩水啦~其實當初點解吸引到我要揀去花蓮旅行，就係因為呢個海﹗去台東o個次家姐買o左D旅遊書，通常都係「花東、花東」咁通稱呢個地區~望見靚靚超藍o既太平洋就令我好想親歷其景了~

為o左要趕係關門前參觀，我o地先o黎「七星柴魚博物館」~

呢個博物館入場就免費，入面有展品、短片介紹花蓮海岸o既捕魚業同埋柴魚製作﹗所謂o既柴魚其實並非我o地廣東人煲花生粥o個D柴魚，而係比較似日本o個D「鰹魚節」o羅~柴魚其實就係鰹魚乾，要經過切件、風乾、熟成等等過程，製成品可以用o黎煮湯呀咁~間博物館點賺錢？哈，其實真係幾似去沖繩o個次o既菠蘿園，參觀完之後有個好大o既紀念品店，有勁多o野俾你試食，你jap jap jap之後，自然會買買買啦~我都買o左柴魚、柴魚麵豉、柴魚零食、tee之類o既東東，滿載而歸~

好在有陳先生架車咋，如果唔係都唔知點樣拎住咁多o野繼續行程﹗哈~

我o地去七星潭o既重點活動﹗

沿住太平洋海岸踩單車﹗租車都好平，100台幣就可以全日任踩~我o地去到時都四點半lu，最多可以踩兩個鐘~可惜天氣唔夠好啦，睇唔到我所期望o既超藍海~但係海邊吹住海風o黎踩單車都好爽o既~

亦要坐低影影海岸o既景色~不過個灘主要係石灘，其實都唔適合游水，所以即使天氣咁熱，大家都只係係岸邊玩~

難得搵到人同我o地影到張合照~(因為呢個時候陳先生當然冇跟住我o地踩單車，而係搵個地方hea啦~)

天氣熱，食雪糕o既興緻特別好~我平時都唔係點鍾意食雪糕o既~我今日揀o左情人果味~情人果即是咩味呢？﹗食落比較似青檸…有果肉添o架~其實七星潭o個度有好多好多熟食攤檔，幾乎有之前o個晚去o既夜市咁多﹗不過好在冇乜食其他o野o者，如果唔係之後就後悔咯…

踩呀踩，踩踩下條路都遠離o左海邊lu~正要考慮點行之際，哇，下起大雨﹗仲要越落越密…oh no no~

拿拿聲落車影埋呢幅拼貼畫就要極速踩番去還車啦~呢個應該唔係鯨魚…而係~

呢幅壁畫o既翻車魚﹗亦叫曼波~點解對呢款魚特別有興趣？話說「將太的壽司全國大賽篇」入面，第一回合就係用呢種魚o黎做比試啦~

之後我o地番去花蓮市逛街+dinner，好有趣的啊~因為去o左間靚靚餐廳~

待續

Google+

Rita Wu

============================================

感謝 Rita 提供以上資料

Rita的網誌: http://www.wufamilyblog.com/~rita/

============================================