12 JULY 2009 (SUN)

係我同大家分享今日活動之前，有一番激氣嘅說話一定要講：依個都唔知係乜天文台，成日都估計錯誤，又話今日狂風暴雨，睇吓....暴就係暴，不過係暴晒，全日都勁好天，攪到人地等左好耐入迪迪尼都要改期，真係激C我啦！

好啦....發完勞騷，講番今日個行程先。

由於冇得入迪迪尼，同埋信錯天文台，所以我同大肥豬都決定搵啲室內活動，最後....我地就又出尖沙咀，打算去太空館睇高清節目。可能係假期關係，又係買唔到飛，又睇唔到添，所以就改另一個活動，就係去扮吓有藝術人，去香港藝術館行吓啦！

一行到藝術館就見到俾好多LV 海報包住，因為佢地做緊個『路易威登:創意情感』展覽~

諗住LV展就會有好多LV野睇，點知.....原來都係得少少嘅一個展覽室，好少野睇，加上又唔俾影相，所以都失望~

既然入得藝術館，當然唔只行LV展，基本上好多唔同展區我地都行晒。不過個個展區都唔俾影相，加上我真係冇乜藝術細胞，所以都悶悶地呀！

反而有幾個國畫同陶瓷公仔嘅展覽室大肥豬就好有興趣，睇左好耐先走呀...哈哈~

不過成個藝術館有樣嘢我係最感興趣，就係啲枱椅~

驟眼睇好似係木製，但睇真啲...係紙製，真係好得意呀！

============================================

感謝 小肥豬 提供以上資料

小肥豬的網誌: http://kinseymama.mysinablog.com/

============================================