|
大都烤鴨
|
|
honeyhinbaby
2013-07-09
619
0
|
分享
收藏
|
約咗一班中同食飯，為國泰預祝生辰。六點準時到達「大都烤鴨」，只見餐廳 內一班侍應聚埋一齊開會，門口棟住六點先會服務嘅牌，問題係，已經過咗 六點，佢哋都未肯開門……呢間餐廳好aggressive架，平日都做兩輪生意，打嚟book枱時，只可以揀六點開始食，又或者係八點，而家佢六點俾唔到 枱我哋，我哋係咪可以八點唔交枱先﹖！ 入到去，餐廳本來安排我哋坐通道卡位，我要求坐後少少，成功！坐低冇耐，餐廳已經送上收費前菜﹕
未試過到供應水果做前菜嘅餐廳，不過，我鍾意食水果多過其他鹹酸嘢！只係……呢個前菜收費唔平，以人頭計，位位$8！啲水果唔太新鮮同靚，餐廳賺死了！
搞咗一輪，終於confirm叫咩餸，四個女人都係煩架喇，哈哈！ 水晶鴨舌 ($68)﹕賣相唔錯，但味道一般嘅一道菜。其實呢道菜式好易整，我有信心自己都整到。 乾煸四季豆 ($68)﹕Jenny好鍾意食，我就略嫌佢個調味重手咗……
荷香包鴨飯 ($78)﹕呢道菜本來喺鴨架拾食到都有得揀架，價錢仲平好多添！但waitress只准我哋喺拾食中揀一款，想再食其他就要用原價，結果，我哋選擇咗呢 個用原價。餐廳先送上一整碟俾我哋過目，再拎埋一、二邊幫我哋分做四碗，抱著大大期望去食，結果非常失望！啲飯好濕！落得太多水喇！濕到我真係冇mood 去完成佢！我出名大食同為食，就算肚皮爆破，只要係好食嘅嘢都會有力量去食埋佢，但呢碗飯……我係食唔哂囉……
烤北京填鴨 — 半隻 ($198)﹕招牌菜果然係招牌菜！一口咬下已片嘅鴨皮，聽到清脆一聲，好耐冇食過脆皮啦！最正係，佢脆得嚟，唔係油炸般硬，只屬微脆。齋食鴨皮真係油膩咗啲，夾塊麵粉皮同水果(有哈蜜瓜！)，味道剛好！
大紅三杯烤鴨架 — 2位用 ($55)﹕總覺得味道有少許辣，但食得辣嘅打工達人堅持唔辣……`呢個菜都幾惹味，只係調味太重，我都係傾向淡口味啲。
金陵驢打滾 ($42)﹕慳妹堅持要食甜品，其實我當時已經好飽……呢個金陵驢打滾入面嘅紅豆餡料唔怕好甜，適合我呢啲不嗜甜者！但係……糯米落得太多水！成嚿嘢好濕！太濕！唔及格！
埋單$589，茶錢都要$12一位，但啲茶又唔係靚喎……本來呢餐要六百幾蚊架，但我有K11會員卡，所以有9折。為咗北京填鴨，呢間餐廳可以番兜！
感謝 honeyhinbaby 提供以上資料 honeyhinbaby的網誌: http://honeyhinbaby.wordpress.com/
|
~END~
| 商店 | 大都烤鴨 Empire City Roasted Duck |