好姊妹high tea聚會！

呢個high tea其實應早於六月中就去咗架喇，可惜我病咗太耐，搞到要推遅到而家先去得成……雖然坐唔到窗口位，但今日天氣唔錯，遠望個環境，都令人舒服。

(要人哋四個人share一個menu睇……)

我哋叫咗一個high tea tower ($258 for two)同一個stone fired pizza ($198)，因為我仲未咳好，所以二人餐入面嘅鹹點佢哋唔敢同我爭，哈哈！

Pizza唔太好食，拾爺睇相已經知個邊唔脆……

至於個high tea tower一樣，平平無奇……其中……

左下個鬆餅「治廷」一食就嗌難食！佢話又硬又乾……搞到我唔敢掂……但「田寧」就話覺得ok，後尾發現上層有butter同jam，塗咗食應該會好啲掛！
右 下﹕當我心思思想食macaroon但又怕食完會咳死時，我想先搞清楚佢係咪綠茶味，咁樣咳死都咳得抵啲呀！於是就問路過嘅侍應佢係咩味，點知個侍應竟然 答我﹕呢個係macaroon馬卡龍嚟架！我真係啤一聲！而家我個樣係咪似鄉下出嚟未見過甜品，我有冇大鄉里到連macaroon係咩都唔知﹖！「亞仙」 話好明顯有問題嘅係個侍應。(問多佢一次係咩味，係咪綠茶，佢先如夢初醒答我係。我當然將成件放咗入口啦，唔好食……)

上兩幅係「亞仙」身先士卒去食嘅甜點，結果佢大嗌好甜！甜到好似食緊粒方糖咁，於是，剩番最後一件時，我就貪得意拎咗兜糖同件甜點合照！「亞仙」見狀，專登挾起一粒放隔離，話要強調強調喎！我怪佢嘥咗人哋粒糖！

埋單$502，擺明食環境！埋完單後，我哋就行出露台影吓相，四個傻婆又做埋啲白癡嘢，因為搵過waitress揸機，結果換嚟hea影……於是，我哋自己影落玻璃到，一把年紀玩自拍！

約定下個月慶祝「治廷」生日，下次去City Art食半自助餐！

============================================

感謝 honeyhinbaby 提供以上資料

honeyhinbaby的網誌: http://honeyhinbaby.wordpress.com/

============================================