EXP依刻已有700多篇食評，相片無數，所以，環境嘢就唔多講，只喺人流不絕，無他嘅，晌又一城食嘢，相對低價位，質素唔錯，又食得輕鬆，EXP實在喺一個幾好選擇。

點菜責任，一切由契女老豆發辦，因為大人食乜都無所謂，小朋友就要稍稍就一就。

芝麻雞翼 $46

一客4隻，唔喺全隻，喺雞中翼連尖，不過，屬較大呎碼。炸得幾香脆，外皮加上芝麻，多份芝麻香，雞肉亦都幾滑。

西柚蝦蕎麥麵 $73

食完隻「熱氣」雞翼，依個蕎麥麵就嚟得啱啱好，蕎麥麵本身清爽，入口涼快。配料除有6集去殼鮮爽嘅凍蝦，仲有西柚肉及芒果果，前者酸香多汁，後者清甜完熟。

香草鮮茄雞肉長通粉 $67

雖然做法、配搭都非常簡單，但滿滿茄香，長通粉又煮得咬口，已經相當穩打穩紮。後加少少香草羅勒（金不換），香味卻唔喺好突出。

m.a.x. concepts… $71薄 / $81普通

佢哋有個EXP薄餅，算喺店家嘅招牌薄餅，不過，又有另一款以美心副線m.a.x. concepts為名嘅薄餅，中文譯為「正」，真喺唔多明佢個意思？可能想指個薄餅好正啩？個薄餅大概8吋直徑大，蕃茄醬底，內有菠蘿、青椒、磨菇、芝士，最吸引當然喺薄餅面上一大堆嘅巴馬火腿，令整個薄餅嘅味道鹹香有層次，而個批底較似食緊麵包。

芝士忌廉汁焗魚柳飯 $79

個外觀睇落焗得唔失禮，面層嘅芝士半溶，個忌廉汁又幾香，魚柳都OK，唔會有咩雪味，亦幾滑，而個焗飯又用上炒飯底，一啲都唔馬虎喎。

幾個朋友，輕輕鬆鬆食一餐，不過小契女就有啲唔乖，成日搞搞震，整古做怪！

個人評分
味道：8/10
環境：7/10
服務：7/10
抵食：7/10
平均每人消費：HK$76

餐廳資料：
EXP
九龍塘達之路80號又一城UG層23號舖
2265 8298