大堂中間多數喺4-6人枱，兩側就喺4人卡位，一室淺啡色，無乜太多奢華裝飾，感覺幾順眼。

好多人都知，幾間金滿庭都一向排滿人，所以，我哋都訂定個房，仲揀晚市第一節（5:45-8:15pm），寧願早少少食，費事等人交枱要再等；再者，我哋當中有小朋友，都唔想搞得咁夜。雖然話訂咗個「房」，但喺無遮無掩全開放性，其實我哋都唔介意，反正一行人連大連細共11人，坐得落，又無咩嘢唔見得人，只喺咁嘅「貴賓房」都仲要收最低消費$1,800，跟坐大堂無咩分別，只喺比人張枱大啲，覺得唔多合理由啫。

最低消費

基本收費，茶水巾芥$11位，餐前小食$15碟，我哋11人收4碟錢，另收切餅費$50個，又唔算貴。

菜式分類為招牌烤鴨、冷盤、肉類、海產河鮮、蔬菜、豆腐、飯麵、包點、甜品等多項，少部份圖文並茂，當中亦有唔少人氣菜式推介。而另一張「廚師推介」餐牌，卻又反而興趣不大。

餐前小食 $15碟

雖然焗收$15碟，但都算抵俾，因為起碼唔喺幾粒花生、菜脯，而喺有醉雞、菜紫碎花生鹹魚仔、醬油四季豆，味道唔錯，又各有不同。晌等大家期間，食吓小食，刨吓餐牌。

五福臨門大拼盤 $290

金滿庭嘅冷盤向來都做得幾出色，幾受歡迎，冷盤一共有30多款式，各有特色，如果夠人多，不妨點個五福臨門大拼盤，夠睇頭，$290可以自由揀5款，不過，有幾樣貴嘢就唔包其中，例如：油爆蝦、五香芝麻雞……等等。款款本身要60、70蚊，其實，夾埋都只可能喺平幾十。

 - 四喜烤夫（$58）：烤夫、雲耳、金針，烤夫綿腍，雲耳爽脆，味道簡單，但有益有營養；
 - 雞絲粉皮（$68）：雞絲非手撕，切得工整，粉皮柔滑，芝麻醬拌勻下，加上白芝麻，香甜好味；
 - 脆皮素鵝（$72）：脆而不油，幾有腐竹味道；
 - 蔥油海蜇（$78）：海蜇口感冰爽，充滿蔥油香味；
 - 香春皮蛋伴豆腐（$58）：皮蛋灑上香蔥，蛋心綿密，而豆腐香滑，加上少少肉鬆，又幾特別。

北京烤鴨 $360

成11人，當然要叫成隻先夠食啦，因為喺北京烤鴨，喺皮連肉，雖然無見到成隻鴨嘅真身，但睇啲外皮幾金黃，齋食一件試吓，皮脆肉香。一隻鴨切成兩大碟，跟兩籠薄餅，配甜鴨醬、青瓜、京蔥及薑蓉，想點搭就點夾。兩籠餅皮上到枱唔算好熱，一塊疊一塊，過多陣凍咗就好易黐埋晒，要趁快食。

生菜片鴨崧 $55

點北京烤鴨，可加$55變兩食，有生菜片鴨崧、鴨骨湯或醬爆鴨骨之選，但睇嚟只有前者最有「肉」食。鴨殼起肉切粒，加埋筍粒、松子仁嚟炒成一碟鴨崧，幾香幾惹味，只喺嫌生菜太少。

花香玫瑰骨 $84

賣相艷紅，猶如一碟生炒骨，味道真喺幾好喎，唔太甜，又有一朕玫瑰花香味，肉排入口鬆化，外層粉漿又唔太厚，掛滿汁。

油爆帶子 $185

收得近兩舊水一碟，啲帶子真喺無流料，又大隻，大過個5蚊銀有多，又厚肉，食落鮮甜爽口，輕輕油爆一下，鮮味盡保留，伴碟嘅西蘭花色澤翠綠，口感清脆。

鳳梨魚柳 $92

個鳳梨魚柳跟個花香玫瑰骨有啲異曲同工，做法好相似，雖然伴碟有好多菠蘿（都喺罐頭貨色），但啲魚柳上，菠蘿味唔算好突出，但肉質就挺滑溜。相比起早前晌「潮庭」食嘅菠蘿醬燒蝦球，我鍾意後者個蝦球多啲。

奶油津白 $72

津白（紹菜）一向俾人感覺喺啲平價菜，不過，一講到奶油津白，津白又變得好不一樣，經過廚師巧手，清甜嘅津白，淋上細膩柔滑嘅奶油茨汁，一樣成為滋味菜式。如果灑多啲金華火腿碎上面就仲好，滑溜中多份鹹香！

千張豆腐 $98

依道菜，真喺食手功都抵番晒，豆腐切得厚薄均一而工整，環形鋪晌玻璃碟上，賣相一流。中間再加有蝦米、冬菇、蔥粒，連豆腐夾埋一齊食，要咬口有咬口，要軟滑有軟滑。因為有細路仔關係，我哋要求走辣，否則，應該仲惹味。

招牌炒飯 $98

講真，今晚啲服務麻麻哋，搵人招呼加茶添水真喺唔容易。而且，出菜亦都好求其，出完個五福臨門大拼盤，跟住竟然就嚟碟招牌炒飯，然而，個炒飯又的確值得叫「招牌」嘅，飯粒分明，又炒得夠爽身，帶子粒、蔥粒、蛋碎，再加埋一大撮蟹籽，令個炒飯美味豐富。

包點就無叫，反而最後點幾款可以方便共享嘅甜品，順便湊夠最低清費個數。

高加豆沙 $13 /個

每個高加豆沙都好大個，外皮鬆鬆軟軟，內裡豆沙蓉填得滿滿，清甜不膩，好味。唯一要挑，糝糖霜可以做得靚仔啲，唔使咁隨便囉。

豆沙窩餅 $48

又喺豆沙系甜品，只因細路哥鍾意油炸嘢，窩餅皮炸得金黃香脆，豆沙唔使再多講，清甜，好食。

杞子蘆薈桂花糕 $35

一向都幾鍾意佢哋個杞子蘆薈桂花糕，就算公司晌銅鑼灣店開午餐例會，都梗會點一客打包拎返公司益同事。一客有9件，雖然蘆薈就唔喺好多，但桂花香十足，糕身挺而不削，感覺冰涼清潤。

席間又講起好多往事，又喺一連串那些年嘅話題，好多甘苦與共嘅經歷；雖然依家各散東西，各有各嘅家庭，各有各要面對嘅事情，不過，對於依理中學同學，相信若邊個有咩難關，我都覺得彼此可以繼續喺甘苦與共嘅老友！

個人評分
味道：8/10
環境：7/10
服務：6/10
抵食：8/10
平均每人消費：HK$200（只計9個大人）

餐廳資料：
金滿庭京川滬菜館 Modern China Restaurant
九龍灣偉業街33號德福廣場2期6樓603號舖
2798 9066