之前去過嘅銅鑼灣店、旺角店、荃灣店，以及今次嘅尖沙咀店，都喺一出��門成層都喺餐廳，同樣洋溢一片異國情調、神秘色彩，別緻嘅吊燈，清真磨菇尖頂嘅圖案，都喺店內嘅標誌之一。皮座卡位，闊落舒適，最鍾意喺佢個椅背架得特別高，增加前後座嘅私隱度。

先後嚟過好幾次，對餐牌有一定認識，揀番啱老婆口味，佢收工行過嚟之時已點定菜，等佢一到就有得食。知佢幾鍾意食沙律及餃子，所以，各揀一客，加碗忌廉湯俾佢，要一客米線，唔夠先再追加！唔講唔知，原來沙嗲王經營已有20多年歷史，滋味無國界，以菜式多元化、多國化見稱，中、西、越、泰、意、法、葡、日樣樣都有。

幾款沙律中，水耕菜苗什菜沙律、魚籽薯仔沙律及鮮芒果蝦沙律都特別註明採用水耕菜苗，感覺更有益健康。

鮮芒果蝦沙律 $47

雖然個蝦沙律賣相麻麻哋，但$47咁嘅價錢，非常足料，好多原隻鮮蝦，又好多芒果肉，混合埋羅馬生菜及水耕菜苗，實在抵食。再者，鮮蝦爽口，芒果肉清甜，沙律菜亦新鮮爽脆，性格比高。

鮮茄芝士焗餃子 $37

一客有6件餃子，以鮮蕃茄做個汁，幾鮮活，而且個質感較水，唔似加咗茄汁、茄膏嚟做，少啲添加就仲健康啲啦，配合埋烘焗得香濃嘅芝士，簡單嘅焗餃子就已經OK啦。

老婆一向愛湯之人，不過，依度無老火湯，退而求其次幫佢選個海鮮忌廉湯鍋，落單時都有啲遲疑，因為「湯鍋」會唔會好大份，但見佢又只喺賣三十零蚊，應該唔會太大啩。

海鮮忌廉湯鍋配蒜蓉包 $33

嘩，送到嚟又真喺唔講得笑，成個小型瓦鍋，份量實在唔少，絕對夠晒我哋兩個人飲，而且又喺好足料，蜆、蝦、蟹柳，撈起一大堆，鮮味中規中矩，至少唔會有雪味；而忌廉湯質感唔錯，幾順滑，偏奶香味，不過，兩片蒜蓉包都烘得過燶，要扣分。

冬蔭功扎肉鮮蝦米線 $51

餐牌中推介嘅冬蔭功扎肉鮮蝦米線，曾經食過一次，所以翻兜再食。冬蔭功作為湯底，味道唔差，一樣集酸、辣、鮮於一身，呷一口，濃郁而富層次，附送青檸一件，唧埋青檸汁就更酸香。配料有札肉、鮮蝦、溏心蛋、洋蔥、銀芽，幾樣都用料不賴，札肉夠挺實，鮮蝦大隻又爽彈，溏心蛋做得有水準，「流心」效果一流，凝香蛋味濃。米線食落滑溜有彈性，都好襯啲冬蔭功湯，令淡味嘅米線更好食！

晌沙嗲王點過任何食品（$27或以上），都有飲品半價優惠，小弟當然點番杯凍飲消消暑、解解渴啦！

青檸柑梅蜜 $15

原價$30，依家半價就有得飲，大大樽冰凍夠解渴，味道酸酸咪咪好醒神，有點青檸，又有點梅味，本身加入咗蜜糖，但如果可以再加多少少就更啱個人口味。

之前細佬慶生日飯點嘅嘢，全部細細份，可以試多啲，今次點親嘅啱啱相反，都喺大大份，份量俾想像中多，平靚正，夠抵食。

個人評分
味道：8/10
環境：7/10
服務：7/10
抵食：9/10
平均每人消費：HK$100

餐廳資料：
沙嗲王 Satay King
尖沙咀加拿分道20號加拿芬廣場5樓
2152 1181