又一間都幫襯過好幾次，食評都有幾篇，所以，環境依啲多餘嘢唔講。一坐低就睇睇有咩午餐好食。依日所見，午餐分兩類，分別喺精選午餐及炒粉麵飯套餐：

精選午餐（$48-$54）：一共7款，送餐湯或沙律，以及咖啡或茶；
炒粉麵飯套餐（$46-$52）：一共8款，包是日小食一款，送餐湯或沙律，以及咖啡或茶。
午市好就好在無加一。

沙律

個沙律嚟咁多次都無變，照樣喺沙律菜、罐頭什果、車厘茄、紅腰豆，溝沙律醬，絕對無驚喜，亦有種倒模模式嘅感覺。

芝士白酒汁焗石斑飯 $48

雖然個侍應話焗飯製作需時，搞到我都等咗成20分鐘，啲朋友都食咗成大半先嚟我個焗飯。睇賣相，似乎唔錯，個白汁又加咗少少刁草，不過，面層個汁底，絕大部份都喺白汁，芝士好少，更喺唔太覺得有咩酒香；另一失望位喺飯底，唔喺炒飯嚟，只喺白飯而已，幸好啲飯粒唔點爛，否則就惡啃；啲石斑，即喺魚柳，質感就不過不失咁，卻喺薄得無乜肉地！

奶茶

雖然用上「黑白奶」茶杯，但唔代表啲乜嘢，因為，個奶茶有茶香，可惜唔夠滑。

其他朋友仲食咗精選午餐嘅蒜香蜆肉天使麵（$50）、松板牛肉飯（$48）及炒粉麵飯套餐嘅黑椒雞絲炒烏冬（$50）、鮮茄海鮮湯飯（$46），而炒粉麵飯套餐所送嘅是日小食喺咖喱角1隻。睇賣相，我就覺得個蒜香蜆肉天使麵及鮮茄海鮮湯飯幾掂咁款，不過，味道就只有佢哋先知得最真，聽朋友話，啲嘢唔錯。

即喺小弟最無眼光，揀咗款水準大跌嘅焗飯。仲有就喺，啲侍應做得有啲迤（hea），其實見佢哋走嚟走去忙過不停咁，唔可以話佢哋游手好閒，但梗喺好似唔上心咁，好似餐具叫幾次先俾齊，水又要叫先俾，總之依樣要追，嗰樣又要問！

個人評分
味道：5/10
環境：7/10
服務：4/10
抵食：6/10
平均每人消費：HK$48

餐廳資料：
又一間餐室
荔枝角寶輪街1號曼克頓山商場(曼坊)G08舖地下
2886 8778