抱歉,發生點錯誤。
重新載入
興記 Hing Kee:十兄弟三聖大食遊
山區麵包王
2014-03-07
1968
1
分享
收藏
晌小弟嘅飲食日誌裡邊,「死佬飯局」喺其中一個必不可少嘅飯局組合,顧名思義,就喺一班撇低老婆仔女嘅死佬,出嚟大食大喝嘅麻甩飯聚。一年梗會搞幾次,十幾人難次次人齊,所以有小飯局,亦有大飯局。以前成鬼日去長沙灣新星打鞭爐,話要衝出深水埗,殺入香港嘅「大西北」,講咗成年,卒之成事,多謝一眾好兄弟嘅支持,今回大飯局就揀嚟屯門三聖村嘅「興記」。
未去興記,當然要先晌三聖村買海鮮。附近一列十多個海鮮檔,海鮮種類繁多,其中一個「死佬」孔Sir同啲判頭食開大茶飯,揀海鮮依啲工作當然難佢唔到,小弟都喺跟住尾去見識吓。
最後,晌關財記及發記唔覺唔覺買咗9樣海鮮,一共$2,900左右,下面自然逐一介紹。不過,個人最唔鐘意啲海鮮檔無標明價錢,下下都要問佢,雖然話嚟到食海鮮唔計較得咁多,但標明價嘅話,啲客睇啱咪買囉,又唔喺咩神秘嘢。

揀好海鮮,就「嗱嗱淋」拎去興記代煮,興記收費好簡單,代煮海鮮油料費收$52斤,包晒洗切,點整都得。理論上佢會逐袋海鮮同你秤,所以,其實晌買海鮮時,應該問海鮮檔要單,方便對個重量數,以及等自己心理有數,油料費大概要俾幾多。此外,興記又會問埋你想點整,如無心水,佢都可以俾啲意見點整先好食,絕對唔使你太操心。
興記自詡為海鮮燒臘飯店,所以,除來料加工代煮海鮮,又有馳名燒鵝及其他燒臘,數十款小菜,故此,今晚食海鮮以外,都預訂咗隻燒鵝,又額外加個扒芥菜膽及炒麵。除油料費,醬料每位收$10,星期六、日、公眾假期嘅晚市仲要收加一。結果,連埋汽水、啤酒,晌興記埋單喺$1,880,所以,夾埋成餐飯嘅消費約$4,800,除番10個人,每人$480左右。
順道講少少環境,有部份地方屬戶外,但搭晒帳篷有瓦遮頭唔使擔心,亦有份地方屬室內,喺由六角亭間出嚟,裝修到同間酒樓無分別。服務方面,OK啦,話好唔算好好,話差亦唔喺差。
講咗咁耐,都喺時候起筷,飲杯……

bowl馳名燒鵝$100 / 例牌、$200 / 半隻、$400 / 一隻
燒鵝晌興記都算幾出名,為求穩陣實食到,預訂咗一隻,雖然隻鵝幾大隻,但面對我哋10個麻甩佬,真喺一隻都只喺勉強夠。燒鵝即燒,送上枱時仲感受到股熱氣,燒得色澤亮麗金黃,入口皮脆熱辣,油潤甘香,但個人覺得肉有點嚡,未能滿分。
bowl象拔蚌刺身
買咗一條象拔蚌,我估都有兩斤重,按老闆介紹,可以兩食,蚌身可做刺身,而蚌膽用嚟白灼。刺身部份,切得好大塊,十分有睇頭,不過幾厚吓,入口唔夠爽,唯一就喺感受到一份海水嘅鹹鮮。
bowl白灼象拔蚌膽
第一次食白灼象拔蚌膽,雖然個賣相唔多討好,部份位置烏烏黑黑,但味道唔錯喎,有啲似食豬潤,加埋椒絲、薑絲、芹菜,沾點豉油,又幾好食架。

bowl薑蔥炒肉蟹
肉蟹最大路都喺薑蔥炒好食,啲蟹買嘅時候仲生勾勾嘔緊泡,所以,啲蟹炒好出嚟,肉質新鮮,味道鮮甜,滿滿薑蔥香,食到要舐手指。「專燈」揀多件蟹鉗位,一流到爆!
bowl椒鹽瀨尿蝦
瀨尿蝦非用椒鹽莫屬,啲瀨尿蝦雖至有手臂咁大咁粗,但體形都唔太輸蝕,厚肉爽口,炒得好惹味,椒辣味就夠嘞,鹹度再多少少就更理想。
bowl砵酒焗美國桶蠔
買咗兩杯美國桶蠔,未煮嘅真物都幾大隻,煮完之後大縮水,真喺有疑惑喺咪我哋啲桶蠔,入口有點脆,明顯炸過,此外,砵酒味亦唔明顯,算喺今晚做得差嘅菜式。
bowl辣酒煮花螺
一買花螺,就想起辣酒煮,有少少慣性,其實花螺有唔少食法,如白灼花螺,紫蘇爆炒花螺,醬爆花螺,鹽焗花螺……等等。個花螺雖然喺辣酒煮,反而無個蟶子咁辣,但就確有酒香,肉質卻有少少韌,不過不失咁啦。
bowl油鹽水浸蝴蝶螺
晌買海鮮時第一次見食款蝴蝶螺,好奇佢喺點,所以就買啲試吓,海鮮檔老闆介紹油鹽水浸,味道唔錯。下午墊有粉絲,又有啲冬菜,啲蝴蝶螺打開其實好似啲蜆咁,食落爽脆,味道鹹鮮,都真喺唔錯。
bowl豉椒炒蟶子
買咗一紮蟶子皇,炒出嚟的確唔少,滿滿一大碟,而豉椒炒惹味十足,夠辣夠香,蟶子肥大,肉爽彈牙,超正,立時叫咗幾碗白飯分嚟撈汁撈蟶子食,好過魚翅撈飯,再俾多個讚!

bowl果皮蒸大連鮑魚
跑到老遠嚟食海鮮,預咗豪番晚,一人一隻鮑魚無走雞。最佳做法,果皮蒸啦,大大隻鮑魚,煙韌中有份爽彈,少少果皮香吊起鮑魚鮮味。
bowl蒜蓉蒸扇貝
蒜蓉跟扇貝真喺天作之合,大量粉絲鋪晌扇貝之上,再加入大量蒜蓉,做法簡單直接,但味道就惹味鮮香,扇貝厚肉挺實,蒜香突出,連啲粉絲都特別香滑。

bowl上湯扒芥菜膽 $68
食咁多道海鮮,一道上湯扒芥菜膽,清清哋,又健康,芥菜膽又做得爽脆入味,蒜子吸滿湯汁,亦都唔好錯過。
bowl韮王豉油皇炒麵 $70
死佬即喺死佬,點都要叫碟炒粉飯麵,雖然有干燒伊麵、瑤柱蛋白炒飯,但以豉油皇炒麵喺大家最想食。炒得夠乾身,又唔太油,不過,個人認為唔夠豉油香,兼且韮王落得好少。
飽餐一頓,再揸車過元朗食B仔涼粉,咁先稱得上大食遊。好難得,由讀書年代,出嚟打工,到結婚生仔,一班人後生時組隊一齊踢波,依家唔多走得郁就一齊睇波,飯局一坐低就有講有笑,晌whatsapp群組就更唔在講啦,日日短訊發來發去,講政治、講英超、講老細、講旅行……志在你知我未死,我知你仲食得走得,好不開心嘅一班人生死佬。

個人評分
味道:8/10
環境:7/10
服務:6/10
抵食:8/10
平均每人消費:HK$480

餐廳資料:
興記 Hing Kee
屯門三聖村熟食亭地下2號舖
2458 8637


=============================================

感謝 山區麵包王 提供以上資料

山區麵包王的網誌: http://garycwm.blogspot.hk/


=============================================

~END~
人均 $480.00
商店 興記 屯門三聖邨
特搜總編E2014-12-18 12:32:33
+ 追隨
舉報
恭喜!經過「SeeWide評審團」一致通過,你的發佈已被選為推薦攻略!你不但可以獲得200經驗值,更能累積200探險里數作為開展下次探險之旅的旅費!
回覆