小弟所收到嘅喺16粒裝，上網睇過一盒賣成$330，為起要成$20有多一粒朱古力，可不便宜喎，真多謝友人嘅厚愛。另外，仲有9粒裝（$200）同28粒裝（$550）。

內附一張朱古力說明圖，自圖索驥就搵得番各款朱古力喺咩味道，其實，單睇啲朱古力本身嘅設計，都已經喺一件幾得意嘅事，部份圖案做得挺別緻，味道又如何呢？下文再慢慢分享。

由於講明公諸同好，尤其跟家人分享喺自不然嘅人，故此，並非全部味道都有細嗜，只好概略講述吓，而且，食後感比較主觀及差異大。

榛子餅乾黑朱古力：小兔仔印花，好得人歡心，內餡夾有威化，口感鬆脆，而榛子配朱古力一向喺上佳組合；

野草莓黑朱古力：野草莓嘅酸味，更突顯黑朱古力嘅甘苦，猶如海鹽配焦糖，好味；
藍莓芝士牛奶朱古力：幼滑嘅牛奶朱古力內藏着好多藍莓芝士軟心，所以芝士味道十分明確；

芒果黑朱古力：芒果軟心都算不俗，配襯薄薄一層黑朱古力，甘苦中湧出一點甜蜜；
紅酒黑朱古力：紅酒味無期望中咁出，若隱若現咁，或許配上黑朱古力味道較剛烈；

茘枝玫瑰黑朱古力：依款朱古力真喺要慢慢細味，茘枝味、玫瑰味、甘苦味，要慢慢先嗒出韻味，平衡細膩；

綠茶黑朱古力：對比上面紅酒黑朱古力，配綠茶效果似乎比較理想，茶味夠濃但又唔會冚過黑朱古力味。

總括而言，agnès b嘅朱古力基本唔錯，牛奶朱古力幼滑，黑朱古力甘苦，個別款式又幾特別，好似香蕉牛奶朱古力、芒果黑朱古力、冧酒提子黑朱古力、櫻桃牛奶朱古力、茘枝玫瑰黑朱古力……等等，配搭有心思，出嚟嘅味道又夾到。但有一點值得留意，張說明卡只有24款朱古力，即喺你買28粒裝會有重複，但9粒裝相對試得少，所以，睇出食友花過心思揀16粒裝送俾小弟呢！

個人評分
味道：8/10
環境：- /10
服務：- /10
抵食：- /10
平均每人消費：HK$0（禮物）

餐廳資料：
agnès b. DÉLICES
沙田沙田正街18號新城市廣場3樓390號舖
2608 0229