雖然佢喺賣傳統上海菜，但環境又唔會太「老餅」，一啲都無老派上海菜館嘅影子，相反，一室燈光柔，而最為人知嘅標記喺一幅又一幅嘅中國大頭娃娃油畫，唔同表情，扮得古靈精怪。依間分店個鋪位幾大，好闊好深，一半左右喺卡位，闊落舒服，另外嘅就喺可郁動嘅二人枱，即喺2、4、6人……都得，不過人多就唔太鍾意坐「長枱」，唔多方便傾偈嘛！

唔好嫌小弟嘅食評煩，篇篇都好似打報告咁，次次都講一輪餐牌有咩食，皆因都希望讀者有多啲參考。上海婆婆嘅菜式分為：冷菜（有19款，拉平均都喺$40-$50）、湯羹、豆腐、蔬菜、海鮮、豬牛、雞鴨、飯麵、手造拉麵、點心（繼冷菜，另一種多選擇類別，足足22款）、甜品及飲品。主餐牌印刷相當精美，部份菜式更有圖片參考，實在睇相都覺得十分吸引。

醉乳鴿 $85

依個醉乳鴿喺冷菜中最貴嘅一款，其他都唔過$65。雖然都有醉雞，但醉乳鴿就比較少食，原隻醉乳鴿斬好後砌番晒出嚟，務求話你知貨真價實，足一隻乳鴿，睇落隻乳鴿仲幾大隻添。因喺乳鴿關係，感覺比食醉雞啲肉仲嫩，酒香入肉，皮又幾爽，脂肪極少，微微酒香無冚過乳鴿鮮味，有水準。

油炆筍 $38

朋友話好想試，其實我都想。冰冰涼涼嘅鮮竹筍條，入口果真爽脆得嚟有咬口，條條掛滿醬油。雖然睇落做法簡單，但味道上恰到好處。

砂鍋醃篤鮮 $88

因為食餐晏，初時都無打算點湯羹，不過，老婆一句想飲啖湯水，即刻做嘢。湯羹類共有7款，砂鍋雲吞雞怕食唔晒，酸辣湯又經常飲，最後揀個醃篤鮮。個湯唔止大鍋，仲有唔少料，主打嘅新鮮五花腩同金華火腿就走唔甩啦，加埋好多小棠菜、竹筍、百頁結。湯底奶白，味道鹹鮮，竹筍依然爽脆，百頁結又有豆香，連渣帶湯，我哋4個人每人分到兩碗以上，所以，實在好飲又抵飲。好飲唔喺得個講，我哋真喺清晒見鍋底。

京蔥手切牛肉包 $30

廿多款點心，好幾款我哋都好有興趣，一向去「唯一麵家」（尤其尖沙咀厚福街嗰間）都例點佢個北京餡餅咁滯，晌度見有款類似嘅點心，加上張相影得幾靚，又喺「婆婆推介」，投佢信心一票。外觀煎得幾好樣，雖然個包身無官方相片做得咁薄，但生煎得底面均香脆；至於餡心，手切牛肉認做真唔錯，幾香濃惹味，質感軟腍，卻又有咬口，都值得捱介，況且，$30一客有3個，平均$10個算抵食啦。

上湯小籠包 $30

到上海鋪食小籠包有少少成為指定動作，皆因都想比較吓其他店嘅出品，睇睇依個亦喺「婆婆推介」嘅質素又如何！首先，睇落個樣唔算好薄透，亦嫌佢收口個摺位有少少厚，不過，幾鍾意佢墊片青瓜片，減少黏連嘅機會。其後咬落，其實個皮又唔算厚，餡肉蒸得剛好，又富湯汁，豬肉餡打得鬆化，亦唔覺佢肥，整體做得唔失禮。

干燒蝦球 $108

十多款海鮮類菜式，原本相中炸脆鱔，因為之前曾晌上海婆婆336食過，覺得好好味想推介一下俾朋友，不過佢哋對鱔唔多啱，故此揀咗干燒蝦球。叫得蝦球唔會細隻得去卣，果然，又大隻，又爽口，食落幾鮮味，而個汁醬無想像中咁重口味，少少酸，中等辣度，會令人覺得幾開胃。因為啲汁都偏多，建議不妨加碗白飯送汁唔好嘥。

雪菜肉絲炒年糕 $58

飯麵同手造拉麵真喺好多選擇，夾埋成30多款，實在唔知揀咩好，所以，就由朋友發辦，果然喺傳統啲，點咗雪菜肉絲炒年糕。一碟炒年糕份量不少，年糕炒得軟糯煙韌，雪菜帶出嘅鹽味啱啱好，肉絲唔太多，不過，都喺覺得啲肉絲陪襯多啲啫。

估唔同今次嘅飯腳幾擦得，所以，都仲有「胃置」食少少甜品。甜品選擇一共6款，都喺上海館子嘅經典甜點。

黃金南瓜餅 $35

一客有4件，啱啱夠分，唔使爭又唔使讓。南瓜餅確然炸得黃金，色澤「勻巡」，外型漲卜卜，再撒上沙糖花生碎。南瓜餅外皮質感煙糯，咬落唔黏牙，淡淡南瓜味，而內裡豆沙餡又綿又沙，清甜不膩，好味，真想再點多一客。

酒釀丸子 $35

其中一位朋友極鍾意食酒釀丸子，所以點一客，我哋各人試少少，佢就包底。酒釀幾夠酒香，淡雅不俗，又帶有桂花幽香，亦無過甜弊病，丸子煙韌度恰當好處，朋友話合格有餘。

雖然飯市頗多人，幾近坐滿，翻枱都幾快，不過，服務都幾到位，斟茶遞水，上菜換碟，都殷勤爽快。埋單先知，唔收茶芥，不過就有加一，但食咗咁多嘢每人平均都喺$140左右，值得再會「婆婆」。

個人評分
味道：8/10
環境：8/10
服務：8/10
抵食：8/10
平均每人消費：HK$140

餐廳資料：
上海婆婆 Shanghai Po Po
葵芳興芳路223號新都會廣場186-188號舖
2687 3100