抱歉,發生點錯誤。
重新載入
太子小廚餐廳 Prince Kitchen:人情世太
山區麵包王
2014-04-13
1227
0
分享
收藏
晌表哥屋企附近有間茶記「太子小廚餐廳」(長沙灣順寧道),都食過好幾次,不過因為都無乜特別,就只寫過一篇下午茶食評咁大把。而咁啱晌葵興有間茶記又叫做「太子小廚餐廳」,由於見佢啲餐牌都無話有分店之類,估計都只不過喺同名同姓。是日同老婆嘅午餐,就揀咗晌度食。
依家啲茶餐廳好鍾意用埋啲「小廚」、「小館」做個名,實質無變,依然喺乜都有得賣、食物過百款嘅茶記。太子小廚地方都幾大,環境夠乾淨企理。左右兩側卡位好坐啲,通道又夠闊落;但中間細圓枱就排得頗密,感覺會有啲窄,不過,有得5、6個人一齊,細圓枱始終喺最好選擇,方便傾偈。
老婆鍾意食粉麵多過食飯,所以,粉麵餐啱佢多啲。正宗泰式粉麵套餐,單拼$30,加餸每款$6,話就話「套餐」,其實唔包嘢飲,要冷熱飲品加$3,特飲就加$5,另外湯底改冬蔭公湯又加$3。為顧及港人口味,粉麵可揀河粉、米粉、米線、金邊粉、粉絲、檬粉、粗麵、幼麵、紅薯粉,連米線、紅薯粉都有,可預期有幾「正宗」。
bowl什錦金邊粉 $30
個泰式粉麵撇開「正宗」兩個字,本身個味道都唔錯,$30一大碗金邊粉,粉質幼細滑溜,湯底清香,而「什錦」有墨魚丸、豬肉丸、豬頸肉、札肉、豆卜、蘿蔔,下少少金蒜、蔥粒提味,餸料唔少,質素亦唔差,大熱天時涼住冷氣食碗熱辣辣粉麵,其實感覺都幾爽。
嚟到食晏,小弟多數都慳慳哋揀啲快靚正嘅「快餐」為目標。是日快餐,一共有5款,賣$37 / $40,原來啲碟頭飯都喺即叫即炒嘅貨色,仲附送埋例湯或啡茶,而是日例湯喺粟米合掌瓜豬骨湯。
bowl中式牛仔柳飯 $37
5款快餐揀咗A款「中式牛仔柳飯」,一來牛肉依家成本幾貴(雖然啲牛仔柳都只喺雪藏貨),二來小弟都算算哋食肉獸,加上中式牛仔柳味道酸酸甜甜,較開胃。早前睇過網上啲評論,話啲人食餐晏幾十蚊就嫌貴,但幾十蚊個甜品就話抵,有啲嘢好難一刀切嚟評論,始終一件「產品」都牽涉好多成本,不過眼前依碟飯就絕對喺抵食,啲飯多到呢兩個人都夠食,牛仔柳亦都唔少,軟腍酸香,又多洋蔥,如果多啲汁就仲好,總之抵食夾大件啦。
bowl奶茶
茶記嘅奶茶點都要試番一杯,依度嘅奶茶幾得,個茶底夠芳香馥郁,質感幼滑如絲,甚有質素嘅茶記奶茶!
除咗上述午餐、泰式粉麵餐,仲有越式撈檬餐、常餐、三文治、多士、公仔麵、小食及其他碟頭飯餐;至於晚上嚟,又可以點吓家常小菜(配白飯,例湯或啡茶)。
 越式撈檬餐、常餐。
三文治、多士、公仔麵。 
碟頭飯 
家常小菜
「人情世態」,多指人與人之間嘅交往情分,不過,有時遇到啲抵食、用心嘅小店,亦喺一種情分啊!
個人評分
味道:7/10
環境:6/10
服務:6/10
抵食:8/10
平均每人消費:HK$34

餐廳資料:
太子小廚餐廳 Prince Kitchen
葵涌青山公路432號至436號A1至B1舖
2481 2234


=============================================

感謝 山區麵包王 提供以上資料

山區麵包王的網誌: http://garycwm.blogspot.hk/


=============================================

~END~
人均 $34.00
商店 太子小廚餐廳 Prince Kitchen (葵涌店)