真喺越夜越美麗，人氣依然咁鼎盛，幸好流轉快，等10分鐘左右就有枱。

雖然佳記甜品款式多，黑糯米、涼炒、西米露、布甸、大菜糕、杏仁豆腐、啫喱、湯圓、燉品、糕點、馬蹄露……等過百款，不過，一班死佬車到過嚟，為都喺為兜「B仔涼粉」，當生果食又得，當甜品食都得，得咗！

B仔涼粉 $70

我哋咁大棚人，當然要叫兩大兜啦，雖然都唔喺第一次食，但送到嚟，仲要喺兩大兜，都總喺有種嘩嘩聲嘅感覺。普通涼粉底，兜住成座生果山，一下子都未必數得出有幾多種生果，不過，食食吓你就知有香蕉、奇異果、水蜜桃、蜜瓜、哈蜜瓜、西瓜、大樹菠蘿、椰果、蘆薈、木瓜、龍眼、菠蘿共12種，架床疊屋，堆到滿一滿，又七彩繽紛，鮮艷奪目，難得堆得手勢好，送到上枱都無跌過一粒生果。

咪覺得佢$70賣得貴，我哋咁多人食都好夠分，有啲人仲可以食夠兩碗，除平均每人都喺當齊頭$15，你食其他款式糖水都要廿幾蚊啦。仲要一次過可以隨心食鍾意嘅生果，甚至只食生果唔食涼粉又得，人多食嘢就喺有咁嘅好處喇。

講味道，當然以新鮮水果較好食啦，尤其蜜瓜、哈蜜瓜、西瓜、大樹菠蘿、木瓜依幾款，夠熟夠香，特別天然、鮮甜，其他有啲罐頭貨嘅，大家都明甜就一定夠使甜，但喺浸透糖水嘅死甜。小弟特別喜歡食涼粉淋上大量花奶，食起嚟香夾滑，附送嘅兩大碗花奶，最後一滴都清埋去唔好嘥。

服務一欄俾得低分，無他嘅，去到雖然人多，但啲店員只識叫你等等，其實佢哋淨喺送糖水都走唔停，邊得閒招呼啲客仔，依個我都明白同體諒，不如佢哋同啲客講自己搵位得架嘞，唔使啲人棟篤企呆等！

個人評分
味道：7/10
環境：6/10
服務：5/10
抵食：8/10
平均每人消費：HK$15

餐廳資料：
佳記甜品 Kei Kee Dessert
元朗又新街置富中心7號舖
2479 4743