因為天后店比起灣仔店細好多，加上依晚坐滿人，睇上面張門面相就見，真喺唔太方便影環境相，所以，下圖環境相都喺事後補影。今趟人少少，唔點太多嘢，志在跟老友聚一聚！

金柚蝦球沙律 $92

記得第一次晌灣仔店食都無雕得咁靚，侍應話個師傅一時技癢，得閒雕咗幾個，因為唔喺枱枱客都有點依款沙律，整定最後一個送到我哋枱上。泰國金柚清甜多汁，大舊大舊柚肉，蝦肉又夠爽口，配合埋花生粒、魚乾仔、椰子乾片，材料十足，有口感，有層次，跟上次一樣咁好食。

椰汁紅咖喱牛肉 $88．焗蒜蓉包 $36

曼谷泰菜嘅咖喱菜式實在唔少，有黃咖喱、青咖喱、紅咖喱，可配雞牛豬，又有配雜菜、蝦球、魚柳……等等。依道紅咖喱牛肉，咪睇佢個樣唔喺幾紅，實質辣度十足，撈勻椰汁，稍稍中和，但辣勁依然，好惹味，牛肉亦都好腍滑；咖喱配蒜包都喺走唔甩嘅組合，焗蒜蓉包一客有5件，添上紅咖喱牛肉，咖喱味以外，又帶點蒜香，好食！此外，醬汁內仲有茄子、車厘茄、豆角等配菜作伴。

泰式炒通菜 $78

晌泰國好多人叫「飛天通菜」，因為嗰邊有大牌檔將炒完嘅菜飛嚟飛去上碟，真喺神乎其技。依道菜製作比較簡單啲，但所用嘅通菜好鮮味。不過，都喺較喜愛之前試過嘅泰式鹹肉椰菜苗，大抵因為鹹香惹味啲。

泰式蝦球炒金邊 $82

個金邊粉炒得幾有風味喎，味道酸酸甜甜，帶點點微辣，少少濕潤，加埋銀芽，多添幾分爽口；主打嘅蝦球好彈牙鮮甜，加上蛋絲、花生碎，唧少少青檸汁，真喺口感、香味都豐富晒。

香芒椰汁糯米飯 $52

「專燈」推介俾朋友試，因為個糯米飯唔單止煙韌軟糯，同時用上紫糯米及白糯米，喺其特色。配合濃厚嘅椰漿，清甜嘅芒果，作為一餐飯嘅作結就最好不過。最緊要都喺朋友讚好食嘛！
晌門面仲見佢有啲豐富啲嘅2人、4人、6人、8人餐，都喺個唔錯嘅選擇嚟。

好鍾意同啲朋友飯聚，談談近況，講講飲食，讓彼此晌忙碌嘅工作中抽抽身輕鬆一下。

個人評分
味道：8/10
環境：7/10
服務：7/10
抵食：8/10
平均每人消費：HK$110

餐廳資料：
曼谷泰菜 Bangkok Thai Restaurant
天后留仙街1-5號地下D舖
2566 9966