|
Common Grounds：夜闌人靜訪精品咖啡小店
|
|
山區麵包王
2014-07-08
916
0
|
分享
收藏
上環永和街嘅日與夜真喺好唔同，依條如後巷嘅小街，日頭熙來攘往，夜晚夜闌人靜。今晚走到嚟永和街，目的就只有一個，輕輕鬆鬆晌精品咖啡小店Common Grounds嚐嚐佢嘅西餐嘅滋味。其實小店唔難搵，晌永和街近電車路嘅一邊，不過，入夜整條街顯得較幽靜，其次，店面本身又唔太起眼，所以，先有種隱蔽感。
既然叫得小店，地方唔會太大，成個場應該唔過30個位，而門外亦架設咗兩張「可吸煙」枱。一室深灰地磚襯白色牆身，粉藍色膠椅配黑色玻璃枱，加上少少掛畫做裝飾。雖然覺得少少欠缺個性，但小店希望以食物質素取悅客人，也可以講喺用不著花太多錢晌裝修上。
沙律菜搭蟹籽混入香草油醋汁所做成嘅田園沙律，應該喺幾穩陣之作，不過，當中嘅紫生菜有啲爛，味道又有啲苦，否則，可以先帶嚟一個清新嘅前菜。
橙紅色嘅忌廉湯味道唔錯，唔太酸，又幾有鮮茄酸香，不過，質感略嫌較稀身，所以，畫花所落嘅忌廉都化開晒，賣相未夠靚仔，相信可以再做好啲。
依道海鮮卷個賣相意外地咁靚，將龍脷柳捲起再直立擺放，好有立體感，加埋配菜及海鮮料，真喺睇落相當吸引。龍脷柳煎得挺香滑唔鬆散，海鮮包括魷魚、鮮蝦、蜆肉及青口，味道不過不失，但配以蟹籽忌廉汁，效果倒算不俗。
牛肋條已切成一條條，以紅酒汁燴煮，頗為入味，肉質亦都鬆化；最鍾意喺佢個汁，香濃以外，有唔少菇菌，配菜又加埋煎薯角，整體都幾好食。
飲品可以點唔同嘅特色餐飲或咖啡，依一杯Crispy Chocolate幾特別，朱古力味幾濃郁，亦唔過甜，拉花旁加有脆脆朱古力碎，所以，先睇落杯朱古力好似沖得唔平滑。
一向少飲凍啡嘅小弟，實在難頂外間嘅酷熱，所以，其實未嚟主菜，已先點餐飲涼快一下。杯鮮奶咖啡嘅味道都幾豐厚，又滲出焦糖香味，將面層嘅忌廉攪勻一下，口感更柔滑。
是日甜品喺指定嘅，檸檬奶凍散發著淡淡檸檬清香，感覺清新怡人，不過，一來奶凍面可以無需要加鮮忌廉，二來奶凍個質感太稀，似慕絲多啲。
服務方面，店員都做足基本，溫文有禮，只喺奇怪其實今晚客人唔多，但出菜覺得有點慢，或許喺要慢工出細貨。
個人評分
味道：7/10 環境：7/10 服務：7/10 抵食：7/10 平均每人消費：HK$0（試食邀請）
餐廳資料：
Common Grounds 上環永和街33號地下 2955 1005
感謝 山區麵包王 提供以上資料 山區麵包王的網誌: http://garycwm.blogspot.hk/
|
~END~
| 商店 | Common Ground |