其實華御結唔喺第一次食，之前已經試過，款式包括：和風蕃茄豚肉咖喱御結、駿河灣特產櫻花蝦御結、海鮮XO醬御結、紀州特產酸梅御結、香辣迷你帶子冬菇御結及香蔥吞拿魚蓉手卷，所以，今次自然試啲未試過架啦！

11:30am-3:00pm提供嘅午市套餐選擇有3款：

Set A（$39）任選2款御結 + 細碗裝自家熱湯（12安士）；
Set B（$52）任選1款御結 + 細碗裝自家熱湯（12安士） + 任何和風單品料理（大）/ 沙律１份；
Set C（$62）任選2款御結 + 細碗裝自家熱湯（12安士） +任何和風單品料理（大）/ 沙律１份；
仲可以追加，+$10任選1款御結 /任何和風單品料理（細），而+$7細湯轉為中湯（15安士）。

雖無慢慢研究，但御結（飯糰）大概都有多達廿款選擇，價錢由$10-$16不等，分白米飯系列、調味飯系列。睇佢啲單張，店方標明採用百份百日本新潟越光米。另外，所有產品均由營養師細心計算過所含熱量，啱晒要健美嘅女生們，或要控制體重嘅人士！

法式薯仔肉腸清湯 $18 / S、$25 / M、$32 / L

個湯味道唔錯喎，幾香洋蔥同薯仔味，不過湯料就似乎少咗啲，得一舊西蘭花及半條黑椒肉腸。份量上，12安士其實都好夠飲。

飯糰包裝底部印有食用方法3步曲，按部就班，應該都唔會點失手，況且，小弟話晒都已經喺有經驗人士。

金平炒牛蒡御結 $13

平時食得肉多，都想平衡少少，先揀個素飯糰試吓先。除炒牛蒡絲，仲有紅蘿蔔絲，有少少調味，味道唔會好濃，爽脆清甜，而飯粒渾圓，黏糯有咬口，紫菜又夠晒脆身，整體唔錯，只喺嫌佢好少牛蒡絲同紅蘿蔔絲。

三文魚醬油燒御結 $15

例牌專燈揭開影相，嘩！三文魚醬油燒御結比起炒牛蒡多好多料喎，埋滿成個面，三文魚混有醬油（可惜部份唔較勻「巡」），又加有好多白芝麻，寧舍有味道，同樣飯粒煙韌，紫菜爆脆，比起炒牛蒡好食啲。

以上價錢都喺食物嘅單價，夾埋要俾$46，依家套餐價只喺$39，平15%左右，唔算好多，至少較食麥記、快餐店健康啲啦。

個人評分
味道：7/10
環境：6/10
服務：7/10
抵食：7/10
平均每人消費：HK$39

餐廳資料：
華御結 Hana-musubi
金鐘夏愨道18號海富中心商場1樓46號舖
6491 5135