其實名門位處荔枝角懲教署職員宿舍裡面，跟荔枝角收押所喺完全分隔開，所以，基本上喺可以出入自如。而餐廳裡面嘅佈局跟一般較時尚嘅中菜館分別亦唔大，L型大堂，又有啲廂房，卡位就覺得較為闊落好坐，然而大廳中嘅大圓枱就感覺有啲逼。

是晚菜單由老婆朋友一手搞晒，小弟樂得清閒，坐享其成。聽佢講，打去同個經理講低個人數，預算，就會傳真個菜單俾你過目，唔啱再改，少少私房菜形式，而且實價包晒茶芥加一等等。就以今餐為例，6道菜，1個飯，加兩道甜品，實價$1,688，我哋想食多啲蔬菜，另外加多個南乳齋煲（$47），埋單平均每人$217，撐得飽飽咁走。

招牌杏汁白肺湯

一睇兜湯渣，就知有幾足料。潤肺養生嘅杏汁白肺燉湯不愧店家招牌，奶白嘅燉湯，杏味清香無苦澀，白肺清洗透徹無異味，軟腍彈性，沾少少豉油幾好食呢。

蒜茸粉絲蒸元貝

一道頗大路又唔太花巧嘅海鮮菜式，元貝蒸得無過火，入口又有鮮味，已過一關先；蒜茸下嘅份量啱啱好，有蒜香而唔會搶晒元貝鮮味；粉絲索滿蒜汁，惹味咬口。雖然睇落簡單，要做得恰到好處亦唔喺講咁易。

豉油皇山葵鴛鴦蝦

鴛鴦蝦就喺將大蝦分別做出兩個唔同嘅味道：豉油皇（左）、山葵（右），前者煎得鹹鮮，蝦肉爽彈；後者嘅山葵唔喺落得好重手，有點點芥末嘅刺激，又唔會太過攻鼻。

石碢醬燒一字骨

大大件嘅一字肉排，排滿酸甜醬汁，惹味不在話下，而肉排既厚肉，又鬆化，仲以韓式石碢熱住，食到尾嗰件，都同樣咁滋味，唔會因攤涼咗，醬汁凝結而影響食味，值得推介。

清蒸海星班

經理話條星班約有1斤2兩，唔算大，亦唔算細。食鮮魚清蒸就喺最好，條海星班蒸得夠火喉，魚肉挺滑，又有魚鮮味，水準不俗。

菜膽新鮮雞

嘩！個菜膽雞好大碟，近乎瀉出嚟咁滯，經理話佢哋啲雞喺用新鮮走地雞，保證有雞味之餘，絕對鮮味，而且用上湯嚟打個茨汁，唔會淡口無味。確實，雞肉幾滑幾甜，生菜亦喺幾爽脆，不過，其實茨汁又唔使咁多嘅。

南乳齋煲

今晚個菜單設定有啲失策，因為除咗個菜膽雞有啲玻璃生菜以外，成個菜單都應該少咗一道素菜，故此，我哋額外多點一道南乳齋煲。雖然都只喺枝竹、木耳、珍珠筍、磨菇、紹菜……等等，但咁大煲都只賣$47，實屬抵食啦。不過，所以素菜都沾滿醬汁，但南乳香稍薄，水準個人計就只屬平平。

臘味糯米飯

店員介紹啲糯米飯喺真正生炒嚟做，絕無欺場，姑勿論真假，睇落飯粒分明，入口軟糯不黏，炒得夠乾身；唔單止份量超大，仲材料豐富，有潤腸、臘腸、臘肉、蝦仁，果然無欺場，抵讚嘅，是晚另一個心水推介。

紅豆沙

晌度食晚飯嘅例送糖水，大膽少少講句，何解做得咁行貨，無陳皮香，唔多夠起沙，質感又比較稀，雖然喺免費送，以上述所食過菜式嘅水準，個紅豆沙都唔應該咁差。

銀杏紅蓮

紅豆沙嘅失望，好彩只喺個別事件，因為跟住再嚟嘅銀杏燉紅蓮，認真唔錯。材料非常簡單，銀杏（白果）、去芯蓮子、大粒紅棗，整個糖水入口清潤、少甜，又夠滋補。

擂沙湯圓

因為是晚菜單為8人份，好多菜式如蒸元貝、鴛鴦蝦都喺一人一件，而擂沙湯圓都唔例外，只可以一人一粒，想食多粒都無呀，因為啲湯圓做得唔錯，外皮軟糯，麻蓉香甜。唯一挑剔，喺個擂沙湯圓跟個紅蓮銀杏分開上，食完後者，等咗好耐好耐先上個湯圓，實在無咁理想。

就算唔喺懲教署職員，一樣可以嚟幫襯，唔使做臥底扮晒阿Sir咁，閒日夜晚更唔需要訂位。如果你睇佢為一間中菜館，似乎無乜特別，不過，當作一檔私房菜，以依個價位其實幾抵食。所以，無論你喺「餓底」定「臥底」，都不妨過嚟試下。

個人評分
味道：8/10
環境：7/10
服務：7/10
抵食：8/10
平均每人消費：HK$220

餐廳資料：
名門
荔枝角蝴蝶谷道5號懲教署收押所職員宿舍H座P樓
2786 9746