間中睇到D就腳既二人餐，若然食用日期會長少少既，就會買定，方便同朋友相聚，唔駛點踱食乜。



今次我買咗呢間，$188 + 食完俾 $20 服務費。即係$208，兩個人係銅鑼灣黃金地段食個二人晚餐，都算係咁啦。



第一次踏足金百利，都幾多食店架喎。如果我唔係早就有目標，真係有選擇困難症。入到去見到裝修簡單，擺設頗有中國古風。

好適合帶鬼佬黎食

連牙籤筒都襯返晒個環境。



好似草蓆既檯面，餐具亦幾靚下。都叫做乾淨企理。



個餐係連紅/白餐酒或汽水既，我地都唔飲酒既，所以要咗忌廉。佢地老實不客氣，成罐上，仲好，易處理又唔造作。

先上素鵝，出乎意料地好食，全腐皮製作，中間心有鮮腐竹feel，都幾厚，唔似行貨。外層就脆脆地，又唔會燶，亦唔油，推介!

我地要咗白菜餃子，亦唔錯，我就唔會咁斯文，成隻放入口，皮尚算好食，餡亦有肉汁，唔油。

驚尖椒會太辣，所以要咗木須肉(即木樨肉)。我以前睇書就話係京城，因為對太監有忌諱，飯店菜餚不提"蛋"字，所以炒蛋叫木須肉云云。

而維基百科側說:

木樨肉，常被訛傳名為木須肉、苜蓿肉等。其菜以豬肉片與雞蛋、木耳等混炒而成，因炒雞蛋色黃而碎，類似木樨而得名。清人梁恭辰在其《北東園筆錄·三編》中記載：「北方店中以雞子炒肉，名木樨肉，蓋取其有碎黃色也」。

我地呢碟呢，真係配料多於一切。菠菜、木耳、銀芽、肉絲、蛋只得好少，美味可口。

北京烤鴨上檯，我先醒起好似有個湯架喎。問侍應，佢話係喎，未上添! 我地貪心D，一塊薄餅包兩件鴨，趁熱，都唔差。有多既皮，我就拎D木須肉黎包，一樣好食。

最失敗就係個蕃茄蛋花湯咁遲先上，事關佢係味道最清淡既，要味蕾黎一次反高潮似乎唔係咁好。呢個湯係全素黎，入面仲有幾片薄薄既青瓜，原本係開胃前菜，變成單尾!

跟住上埋甜品，桂花酒釀丸子。我從都冇興趣食呢D甜品既，所以對此不能置評。我只知道佢唔夠熱唧。

總括黎講，係個湯同甜品差D，其餘食物質素在上準之上，係可以安哥既地方，冇睇過佢地既餐牌，但要我貴少少帶老外朋友黎食呢，我係願意既。記住訂位喎，七點幾已經坐滿人架啦。

============================================

感謝 May姨Blog 提供以上資料

May姨Blog的網誌: http://maylibibi.blogspot.hk/

============================================