見到團購有呢D早餐，$19，都抵既，早餐難食極都有個譜，就買兩份試下啦。

有成三個月期，點都抽到時間去食既，而且佢話係常餐，即係全日都食得。

早上八點至晚上十一點，點會食唔到吖?

就係咁，搵咗個星期日早上去試。

入到去都未夠九點，冇乜人，得幾個客。



連攞餐具都係自助既，好似太興咁，本身張檯就係放餐具地方，個侍應只係話有咩就自己拎，講完就閃。



每檯都有自助落單機，揀好食物就自己拍卡，各自俾錢，如果八通達唔夠錢呢..... 咁就梳哩啦，佢唔提供增值服務既，你自己去七仔搞掂先入過黎啦。



我地食團購餐，所以唔駛咁落單，有侍應姐姐同你收紙。我早聞呢間字號既服務態度麻麻，但今日所見呢位，又OK喎。

奶茶好快就到，味道都唔差喎!

我朋友既厚切餐肉煎蛋一丁麵

我既五香肉丁煎蛋一丁麵，老實講，大家都睇到碗麵既狀態啦，D麵仲係鬈髮既，即係灼得啱啱好，我都好少去茶記食一丁麵既，就係怕佢同我淥到個麵淋晒麻，呢度師父既淥麵功夫就真係有一百分喎。

憑心果句，隻蛋既黃唔夠挺，即係隻蛋唔算好新鮮。我反轉隻太陽蛋係湯度浸咗一陣，翻個過黎見到個黃既外層有變白少少既，好明顯即係D湯夠熱啦。抵讚!

更令我意想不到既係呢D五香肉丁粒，竟然唔係罐頭貨，好感動呀~~~

我基本上係冇檢查過碗野就食架啦，所以唔知佢俾咗幾多肉丁我。但我食到尾撩下，仲有好多肉丁粒喎。唔知自己係咪俾大集團刻薄得太耐呢? 認知入面，從來都冇咁多肉丁係一碗粉入面出現過架。



至於塊多士，碗麵到咗冇耐佢就上埋檯啦，雖然凍咗，但一樣係外脆內軟既。證明佢係剛烘好先上檯，而唔係烘咗好耐先奉客既。

呢間野賣點係潮，搵咗阿Bob做代言人，應該可以吸納到年青人市場既。而且價錢又唔算太高，比太興、翠華等平少少。可惜網上食評認真麻麻，如果唔係見佢咁平有個早餐，我都唔會無啦啦黎試。

============================================

感謝 May姨Blog 提供以上資料

May姨Blog的網誌: http://maylibibi.blogspot.hk/

============================================