約咗爸爸係環球大廈外面電車站等，我經過LV門口，見到有朱古力義賣，對腳行過咗架啦，但見到係聖基道兒童院既，咁就行返轉頭，乖乖地奉獻$30啦。有ｄ唔明，點解佢地promotion既手法係：「卅蚊一盒、五十蚊兩盒！」你估師奶shopping咩，買兩盒抵ｄ呀？基本上人地唔係為咗買個產品俾錢你架，做乜搞到咁唧？同埋人地走埋去，肯拎個荷包出黎，唔係下下要人同你一次買兩盒先叫好架麻。

因為想爸爸陪我去十蚊店買擦膠，所以就安排「咁啱」同佢去鵝頸橋街市熟食中心食飯啦。未食飯，經過炬利醬園間店，爸爸見到人地門口既花生咁大粒，就買咗一斤走啦。又見到一樽樽醃咗既蘿蔔，佢又想要喎，我話咪啦，仲要行街架。

黎到呢度，梗係食根記健康素食啦！要咗兩客三餸套飯，爸爸果份，我要咗茄子、炒雜菜、炒粒粒；我自己果份就要咗炒雜菜、冬菰粉絲煮黃芽白同素雞。是日例湯係綠豆花生煲蓮藕。我地傻下傻下，影完相就開始食，食食下見ｄ搭檯既女仔係將ｄ食物放上檯，然後還返個托盆俾人既，我先識得跟住做。個女侍見到我地開始醒啦，先過黎幫我收兩個盆走。我笑笑口話：「唔識還返個盆俾你地添！」呀姐都好好人，佢話我地食唔慣，第一次係咁架啦。雖然白飯係任食既，但都夠晒飽啦，一陣仲要行咁多路，費事飽到上心口啦。至於味道，一般啦，唔油既，湯都夠熱，但就唔夠Buddha Hut咁企理啦。

跟住梗係去買擦膠啦，掃咗十件呀我，今次發達啦，可以同隔離位一齊玩啦，咁如果Bibi要玩，我都唔會咁肉痛，因為大把係度。

第三站，維園花展！去到糖街果便入口，打晒蛇餅，好彩我呀，行去天后果邊入，排一、兩個就到我買入場券啦。

入到去少不免要影返幾幅相叫咗到此一遊架。

此行既目的，係去棒眾人媽打場既。所以，入去冇耐，我就死命拉爸爸去參賽展品果便行啦。爭ｄ兜勻全場先見到佢既作品，如果唔係事先見過相，靠睇ｄ字仔喎，睇怕真係要搵死我。好似玩尋寶遊戲咁，三款作品我都miss咗一個，唔忿氣，行多轉，終於搵到啦！

好可憐呀，梗係眾人媽打今日冇黎睇呢ｄ囝囝囡囡啦，佢地冇晒心機呀，頭dup dup添！

場內仲有ｄ特別少少既植物既，俾少少大家睇下啦。

呢盆炸醬草，同我整果盆咁上下咋喎！

入到去又點可以唔買多少野出黎架，除咗買咗包花泥之外，我仲買咗紫色糯米粟同大過我手板既靚靚既燈籠椒添。

爸爸話一場黎到，花都唔整返盆算點呀？所以就用$30買咗呢兩盆蘭花啦。問呀叔幾耐淋一次水喎？佢話一星期，爸爸靜雞雞話：「即係一星期玩完。」

============================================

感謝 May姨Blog 提供以上資料

May姨Blog的網誌: http://maylibibi.blogspot.hk/

============================================