![]()
朋友問我生日飯想咩？
有選擇恐懼嘅我，朋友問：｢中西日韓泰越，你想食邊樣？｣
![]()
見到個越字諗起好少食到越南嘢，一於就試吓越南嘢，睇吓有咩選擇啦。
上去openrice一search見到｢ricepaper｣。
曾幾何時有諗過同男友一齊去食，但講講吓最後唔成事。
竟然都諗住食越南嘢，就一於揀ricepaper，唔諗咁多啦。
當日book咗19:30，去到諗住攞枱時話無我哋booking。
搵咗一輪先發現原來職員寫咗我哋個booking去星期日。
不過好在都即刻安排我哋入去坐，唔洗我哋排過，咪真係會blacklist咗佢。
![]()
冬蔭公湯
坐低後由於太肚餓，同朋友決定一於叫個冬蔭公湯頂住檔先，邊食邊等埋另一位朋友。
點知湯嚟到，份量係得一…杯…！
個冬蔭公湯係一人份量！待應俾低2隻碗仔我哋分。
杯湯有隻大頭蝦，蝦身有蝦頭咁大，仲有膏添。
個湯比起平時飲嘅冬蔭公湯唔同，少咗香茅、檸檬葉嘅香味，多咗好濃嘅蝦膏味。
若果鍾意蝦膏嘅朋友可能會鍾意，但我就覺得滯咗啲。
可能因為有隻大頭蝦，所以呢杯冬蔭公嘅價錢我覺得比較貴。
拎起咗隻蝦，再分2碗的話，1人係得半碗。
![]()
豬仔骨
呢個豬仔骨係有少少乾，蘸埋個汁嚟食的話幾好味。
本身枱面餐具只係有筷子、羹叉。
面對住呢個豬仔骨，好想要把刀。
拎到把刀返嚟都係搞佢唔掂，肉唔多，好難切。
最後都係要出動到手嚟食。
![]()
軟殼蟹米紙卷
聞說呢個係ricepaper嘅招牌菜。
好奇米紙卷係咩嚟，於是我哋揀咗呢個軟殼蟹嚟食。
我哋一致認為米紙卷入面捲住嗰堆basil好大陣味、唔好食。
同埋跟嗰個汁又係好難色，我哋全部都無蘸，改去蘸豬仔骨嗰個汁嚟食。
![]()
牛油雞翼
朋友話上次佢試過牛油雞翼好食，於是今次再叫。
朋友話牛油雞翼已經失咗水準。
雖然我係第一次食，但雞翼的確比較油膩，同埋個皮攤一陣就腍咗，更顯得佢油。
![]()
蒜蓉包
越式咖喱牛肉
見到餐牌有隻咖喱係越式，於是就揀咗呢個咖喱嚟食，叫多個蒜蓉包。
個咖喱都OK，牛肉同牛筋都好腍。
比起平時接觸得多嘅泰式咖喱少咗份香、濃，同埋無咁辣。
用蒜蓉包蘸啲咖喱汁嚟食幾好食。但啲法包真係太乾，同太硬，要浸多啲咖喱先好食。
而裝住蒜蓉包嗰個杯正正就係同冬蔭公湯嗰個一樣，可以想像下個杯有幾大。
![]()
心太軟．雲尼拿雪糕
朋友們趁我去toilet時靜靜雞叫咗個甜品，上面仲寫住Happy Birthday。
甜品嚟到嚇咗我一跳，birthday cake已經好多年無試過。
切｢蛋糕｣前朋友們都提我唔好切到落底，可惜多年無試過生日蛋糕嘅我，手快快就切到落底。
百無禁忌。
心太軟同雲尼拿雪糕，我比較鍾意個雲尼拿雪糕。
其實平時2樣嘢我都少食，但我覺得雪糕比較特別。
少何會話鍾意雲尼拿嘢嘅我覺得佢呢個雪糕幾香，所以我食好多雪糕。
![]()
食飽我哋趕住過隔離食甜品－抹茶雪糕。
好耐無食雪糕嘅我今日連食兩次雪糕。
成日路過citysuper都有見到呢間雪糕，但一直都係無食到。
雪糕好味，但周圍嘅環境令我哋置身於海外。
泰文、國語、英文，圍住我哋全部都係講緊第二種語言。
無論如何，有杯咁好味嘅雪糕做甜品ending，不錯～
腸胃好敏感嘅我，食到唔乾淨都會有好大嘅｢反應｣。
呢餐飯食到後半段時已經覺得個肚好唔舒服，但同枱嘅朋友佢哋完全無呢個問題。
今餐係我近呢6-7年來｢反應｣最大嘅一餐，真係好耐無試過。
同埋嘢食應該有唔少味精。
成餐飯不停要叫待應加水，飲完一杯又一杯。
兩個鐘後返到屋企我都仲係不停飲緊水。
總括嚟講呢間嘢真係唔平，而且我覺得大部份嘅價錢係去晒租同埋裝修度。
唔太食得出｢越南｣嘅感覺。
加上食到我肚痾同勁口渴，睇怕呢間嘢都係只此一次。
![]()
============================================
感謝 tabitachi 提供以上資料
tabitachi的網誌: http://tabitachi.wordpress.com/
============================================
| 