講真架..自從搬入將軍澳,又有埋悠悠之後

出城真係會係一件辛苦事

將軍澳人流比較少,街道又比較闊落好行

一出去旺角尖沙咀依啲地方呢..真係想死

行人路又迫,人又多,馬路又多車,行行下又有人推貨拉喼呀

拖住個小朋友會變得辛苦,所以真係好少出城

今日老公話好想去九龍城行下,

九龍城..人少啲..都可以喎

而且我地都中意去睇啲特別食材呀,食品咁..

下午收工就同佢地會合食個午餐

去到九龍城..梗係食泰菜架啦

無做功課,求其入一間,見佢都幾多人

佢有兩個鋪位,仲要有樓上喎

一入去座底,抬頭就可以睇到菜單啦

兩父囡都話唔餓,於是只叫咗三樣野

雞肉河粉

依個唔錯,河粉好滑,又唔會好淋,

雞肉又幾好,唔會鞋口

跟住尼個串燒

有雞,豬,牛,燒得好惹味,配埋個汁好正

再叫個悠悠至愛既薄餅

鬆脆好食!!

食飽想話帶悠悠去公園玩,但又落雨..

唯有走入九龍城廣場行下

九龍城廣場係我由細行到大既地方

細細個媽咪就成日帶我地尼

到今日當然唔同晒啦...

行行下見到最近好勁人氣既韓國蜂蜜雪糕

即刻走去試下先....

感覺........未就係雪糕同蜜糖囉

雪糕無特別..係普通雪糕..蜂蜜都無特別,係普通蜂蜜....

跟住我地就走出街行喇

真係逐條街慢慢行

我地中意去睇凍肉店呀,泰國店呀,連膠袋店都唔放過..哈哈

行到4點幾好攰,又走去嘆個甜品先

依間甜品店店面好細,得幾張枱

老公叫既...有啲涼粉,西米,椰汁咁既野....

我既係柚子果凍配芒果柚子汁

好食呀..個汁好食..柚子果凍真係用鮮柚子汁做既,不過就可以再滑啲

悠悠既係兒童餐...

係分量比較細架..果然配合小朋友

悠悠一見到就話食依個了...

咁又出左半日城,洗咗幾百蚊啦