泰愛泰 Thai Love Thai：一反常泰 SeeWide

雖然喺星期日，早餐一樣好似平常咁都食得早，所以，到晏晝會頗肚餓，去茶記食碟大堆頭碟頭飯就一定飽晒。不過，今次就有少少唔同，早餐晌屋企整咗個小型全日早餐，甚飽肚，故此，嚟到午餐時段，唔算好餓，但亦都要食啲嘢，所以，兩公婆一反常態就改食輕省啲嘅粉麵，泰愛泰金邊粉就成為今次午飯飯堂。

泰愛泰屬小店經營，門面紅噹噹好易認，鋪內細細，紅牆紅膠櫈，近乎零裝修，成間鋪大概廿零個位，格局其實有啲似港式粉麵鋪。

因為目標清晰，指明要嚟食粉麵，當然瞄準粉麵餐牌。唔想煩嘅，「泰陰公雜錦湯河」（$35）就最直接，一大碗就包晒數款材料，又包嘢飲；否則，車仔形式嘅「泰愛‧泰陰公湯河」（$30）亦自由度大，點配搭都得，湯底、粉麵有多款選擇，同樣包普通嘢飲一杯（凍飲加$2，特飲加$4）。

泰陰公雜錦湯河 $35

老湯底選上泰式清湯，湯色清徹，味道幾鮮香，唔會淡茂茂；內裡嘅餸料包括：海蝦、牛丸、扎肉、豬頸肉，每樣兩至三嚿，不過餐牌例明嘅草菇就欠奉，幸而幾樣嘢都不俗，海蝦確喺鮮甜爽彈，扎肉又夠彈牙；加埋蔥粒、芫茜、金蒜，令成碗金邊粉味道的確好食。

泰愛‧泰陰公湯河 $30

而小弟就想試一試泰味濃湯，色澤深沉，有啲似食日式嘅「醬油」拉麵咁，味道幾醇厚，有濃郁醬油香，所以，啲湯我都清到近底；16款餸料揀嚟海南雞，如想額外加餸每款多俾$8，啲海南雞真喺幾得喎，肉質挺滑；揀咗檬粉，因為剩餘嘅選擇都喺普通啲，檬粉幼滑，爽雜銀芽、蔥粒，清爽過人。

其實兩個湯河嘅味道都OK，如想「加鹽加醋」，枱角嘅調味架可以幫到你。

熱檸水、椰汁冰

椰汁冰算喺特色飲品，要加$4，飲落感覺似椰奶加水，唔覺好特色，總之要杯龍眼冰好過，至少有啲龍眼咬吓。

除咗粉麵餐，仲有泰式米飯餐、泰式串燒及路邊小食，由於啲粉麵唔錯，我哋都會考慮再嚟試試佢其他菜式。

一頓簡單又味美嘅泰式粉麵，唔需要一反常態先至可以嚟食，希望小店保持水準，繼續做好啲出品，有份積極進取嘅「泰」度！

個人評分
味道：8/10
環境：8/10
服務：8/10
抵食：8/10
平均每人消費：HK$35

餐廳資料：
泰愛泰 Thai Love Thai
葵涌和宜合道寶星中心地下6號舖
2410 8789

=============================================

感謝山區麵包王提供以上資料

山區麵包王的網誌: http://garycwm.blogspot.hk/

=============================================

~END~

人均 $35.00

商店	(已結業)泰愛泰。金邊粉 Thai Love Thai


(0)	(0)	(0)