Texas Burger門面裝飾有點美式田園風格，小店地方唔大，主要都喺二人枱，互相拼湊成四人或六人枱，其實感覺有點逼。室內一組又大又亮嘅霓虹燈招牌，就喺晌電影常見，美國公路旁餐廳所掛嘅嗰款，紅得甚搶眼。單睇價錢，你就知佢哋定位於中高檔次嘅美式漢堡包店，所以，一般嚟幫襯嘅都喺啲情侶、中產家庭或三幾個上班族。

枱上嘅餐枱紙就喺餐廳嘅餐牌嚟，清楚列晒所有食物：前菜、小食、沙律、餐湯、漢堡、意粉、特別推介、甜品、奶昔、飲品，大可坐低慢慢睇、慢慢揀。此外，近門口嘅收銀處，頭頂上放有兩部大電視，圖文並茂播出店中食品。

由於朋友們喺少肉多菜之人，所以，揀咗一個素漢堡；而從食評所見，店家有一款迷你漢堡拼盤，可一次過試到3種口味，可惜只限星期五、六、日及假期（3:00-6:00pm），就算晌門外餐牌所見，都喺咁寫。

不過，門口另一邊發現「Today Special」竟然有迷你漢堡拼盤供應，真喺非常走運。原來，店員話見個迷你漢堡拼盤受歡迎，就久唔久晌Today Special加入依道菜式。

酥炸美國珍寶雞翼 $52

小食類有5款，離不開洋蔥圈、薯條、雞翼。一客珍寶雞翼有4隻，如鍾意食雞翼，不妨點夠8隻份（$92），雞翼的確好大件，新鮮熱辣，外皮酥脆甘香，肉質都夠汁多，再沾上墨西哥青椒燒烤醬，鹹鹹辣辣，非常惹味。而雞翼仲墊有少少菜絲及西芹條，啱食嘅唔好嘥，當喺清清熱氣。

煙三文魚及水煮蛋沙律 $53

沙律共有3款，包括傳統嘅「凱撒沙律」、「煙三文魚及水煮蛋沙律」及「香烤奇津蝦芒果沙律」，我哋一口氣點選咗後兩者。個水煮蛋沙律賣相幾唔錯，個沙律底有沙律菜、水牛芝士、蜜餞核桃、紅洋蔥、車厘茄，再配以羅勒香醋油，整體個味道唔錯，醋香中夾雜羅勒香味，而且，沙律菜夠凍夠爽脆。中央將煙三文魚捲成車呔形，再放上水煮蛋，睇起嚟立體啲又有啲別出心裁，不過，啲煙三文魚食落怪怪哋，有少少唔夠新鮮嘅感覺，還幸個水煮蛋做得有水準，蛋黃流心凝香！

香烤奇津蝦芒果沙律 $63

沙律底跟個水煮蛋沙律差不多，都喺沙律菜、紅洋蔥、車厘茄依幾樣，配香芒沙律汁，酸酸甜甜，叫人越食越開胃，但就唔覺有咩烤甜椒，而且芒果肉又比預期中少，不過，3隻炸蝦就又大又爽，值得一讚。兩款沙律可謂各有特色，小弟就稍稍鍾意後者多啲，主因都喺啲煙三文魚令個沙律嚴重失分。

素食漢堡 $77

既然叫Texas Burger，喺輪到漢堡出場嘅時候喇，店內恆常嘅漢堡一共有8款，價錢由$68到$83，而個迷你漢堡拼盤非晌主打餐牌內。

先品嚐個「素食漢堡」，雖然喺「素食」，但個外型跟其他漢堡無乜兩樣，從餐枱紙所見，素食漢堡材料都幾豐富，以罌粟籽麵包為本，有自家製素食漢堡扒、牛油果、生菜、蕃茄、蒙特利傑克芝士，配法式香蒜醬，配搭上已經有一定吸引度。好不容易幾漢堡直切，睇得見材料十足，一層疊一層，件素漢堡扒咬落唔鬆散喎，味道以芝士及法式香蒜醬襯托下，真喺唔錯添，加埋其他蔬菜，感覺好健康。

迷你漢堡拼盤 $72

睇出面個介紹牌，都唔知佢有薯仔波做伴菜，如果啲薯仔波再撒點淮鹽或五香粉，味道更好。3個迷你漢堡分別喺「慢燒香脆豬腩肉配紅卷心菜沙律」、「2安士牛肉漢堡配德州燒烤醬」及「炸鮮嫩白魚柳配自製他他醬」。小巧嘅迷你漢堡，比起正常嘅漢堡食起嚟方便好多，而3款中，以豬腩肉漢堡覺得最特別，有咬口，配紅卷心菜沙律，中和晒一齊油膩感；而牛肉漢堡喺預期嘅感覺，肉質鬆化，又富肉汁，配燒烤醬相當惹味；至於白魚柳漢堡，魚柳炸得外脆內嫩，雖無乜多大驚喜，但仍在水準之內。

Coke $12

飲品有唔少選擇，但嚟到咁富美式嘅餐廳，無理由唔試佢哋嘅奶昔，之但喺，總有人唔多喜歡奶昔嘅質感，覺得佢似溶晒嘅雪糕咁，一罐可樂，或許就喺一種慣常。

Tropical Forest $43

奶昔共有4款，我哋試咗其中兩款，初時揀Tropical Forest見佢成份有菠蘿，原來喺鮮菠蘿片，裝飾用。淡黃色嘅Tropical Forest其實喺將石榴、芒果、熱情果、青檸雪糕打勻，味道好清新，以酸味為主導，石榴味較為突出，芒果味似乎似有還無，然而，質感夠厚夠杰，又夠大杯，爽晒！

Berry Lover $49

睇個名你就知杯奶昔有咩成份，粉紅色嘅Berry Lover以士多啤梨雪糕、紅桑子、藍莓打成，再加上忌廉、士多啤梨、藍莓作為裝飾，賣相份外吸引。比起Tropical Forest，依杯Berry Lover主題更明確，啖啖莓香，帶微酸，冰涼清爽。一啖包，一啖奶昔，悠然自得真喺無乜形容錯！

唔覺唔覺都食得幾飽，甜品只好留待有機會再試，對個朱古力軟蛋糕最感興趣。題外話，點餐後店員會將食物送上，一般用餐嘅基本服務都會有，但喺卻免收加一服務費，抵讚！

個人評分
味道：7/10
環境：7/10
服務：8/10
抵食：7/10
平均每人消費：HK$140

餐廳資料：
Texas Burger
天后電氣道109號地舖
2805 7811