那些年嘅中秋節，鍾意同一班朋友一齊過，年紀越長，更珍惜同家人相處嘅時光，中秋節，當然要陪屋企人啦！約咗爸媽同奶奶一齊食飯，餐廳係星期日先book嘅「合江小鎮」。本來以為咁遲book餐廳，應該要搵一輪先book到，點知，喺KC個website到睇到呢間餐廳，上Openrice睇吓，發覺得有得網上訂位，於是試吓訂啦，一訂就訂到，lucky！咁易book到枱係有原因嘅，間餐廳位置比較吊腳……

同爸媽同埋奶奶約好六點半喺灣仔等，打算打的去餐廳，但係……冇的士……打去餐廳求助，對方叫我搭叮叮，話去跑馬地嘅叮叮就啱，搭到去馬場正門落車。點知……見到馬場後，我問司機邊到落，佢第一句就話呢到係跑馬地，好似我上錯車咁……後尾有乘客教我哋總站落車後再搭回頭車……原來要咁複雜……搞到三位長老搭車又要搭嚟搭後，都係我唔好……

拾爺由學校出發，因為遲遲等唔到，行去地鐵站又塞人，佢叫我哋先去餐廳，但結果，我哋兩程叮叮所需嘅時間仲耐過佢由地鐵站行去餐廳囉。

終於，七點四、五個字到達餐廳，入去只有三幾枱客，唔怪得之咁易book到位啦。但餐廳都好好，我喺網上make booking時，講明話有老人家，唔想坐通道位，餐廳真係安排咗一角寧靜嘅位俾我哋。坐低後，見我哋一眾女仕拎scarf出嚟，即刻幫我哋較細個冷氣。

前菜 ($20)

怪味酥腰果 ($20)

大意嘅我，冇留意間餐廳食川．揚菜，好多菜式都帶辣，爸爸都唔食得……我哋儘量點唔辣嘅菜﹕

蒜泥白肉 ($68)﹕賣相精緻，味道唔錯，媽媽喜歡。薄薄嘅豬肉卷成一柱，內有青瓜，感覺清新。

淮揚小籠包 ($52/4件)﹕只有四件，當然三大長老食先啦，剩番一件我叫拾爺食埋佢。爸媽食完都讚好食，力主我哋多叫一籠，結果我都有得食。果然好味！不過，呢隻小籠包嘅包法同鼎泰豐唔同，頂部唔夠厚，我以前者嘅挾去食，結果一挾頂部，湯汁溢出……為求快快飲落肚，無法細賞味道……但湯汁唔錯，餡料亦好味！


外婆紅燒肉 ($118)﹕拾爺至愛！呢道菜個sauce唔錯，用嚟送飯一流！就咁食就鹹咗少少……紅燒肉水準不一，肥膏部份當然冇問題，但媽媽發現層表仲有毛，處理得唔夠乾淨……瘦肉部份就睇彩數，食到有鬆化嘅，亦有嚡口嘅……

鹹蛋黃蝦仁豆腐 ($98)﹕爸爸同奶奶一致讚好！爸爸話覺得啲豆腐好滑！而我，只覺得滑，並未去到好滑。呢道令人膽固醇超標嘅菜式，用嚟送飯又係幾唔錯架！


砂鍋餛飩雞 ($180/例)﹕爸媽都讚餛飩夠滑，我反而注重湯底，雞味唔夠……

蜀府掛爐烤鴨 ($148/半隻)﹕爸爸以為烤鴨係脆皮，點知所有鴨肉都被浸入辣汁內，皮就唔脆，肉都唔嫩，但個汁幾惹味。

高力豆沙 ($44/4件)﹕外層好厚，我prefer薄番少少，面層嘅砂糖唔夠多，亦鋪得唔勻……但個豆沙餡幾好味。

其實我哋本來仲叫咗個成都雜醬麵，但原來帶有麻辣，睇menu時又冇顯示係辣嘅，所以向餐廳反映後就取消咗(媽媽本想就咁算，但我覺得自己唔係無理取鬧，事實上我哋真係以為呢個麵唔辣先點佢嘛！所以堅持要同餐廳反映。)。爸爸之前都食得辣，但化療之後已經唔可以再食辣，麻辣更係受不了。拾爺得知個麵帶辣，食咗一啖都表示太辣，後尾佢仲話個人都麻麻哋添。

成都雜醬麵 ($50/碗)﹕冇食到，但拾爺話好辣。

食完甜品，我哋都未叫埋單，經理就走嚟俾張單我哋……不過，我哋之前明明聽到隔離枱埋單時，經理表示今日係中秋，所以所有visa cards都冇折扣優惠，但佢遞上帳單時，卻表示已經幫我哋計咗個8折！原來今日係乜card都冇discount，但through Openrice訂位就有8折，lucky！

埋單$886，茶錢都收咗成$90，但以五個人喺節日去到酒店餐廳到食嘢嚟講，呢個價錢抵到爛！

食完飯，坐多陣，落去搭酒店shuttle bus落銅鑼灣，早知呢到有shuttle bus，嚟嘅時候知就唔駛搞到咁煩啦。

============================================

感謝 honeyhinbaby 提供以上資料

honeyhinbaby的網誌: http://honeyhinbaby.wordpress.com/

============================================