今餐飯以散叫菜式為主，所以，自助餐方面就無太多留意，翻開餐牌，基本上都離唔開頭盤、沙律、餐湯、三文治、意粉及薄餅、主菜以及多款亞洲特色美食，仲有印晌第一版嘅精選菜式，有圖有相，份外吸引。此外，正跟Haagen-Dazs合作而推出一系列雪糕甜品，同樣引人注目。

晌等候上菜期間，環顧四周，比起之前嚟食自助餐時嘅人數，明確少咗一截。事後隨意跟經理傾開，原來「佔中」都對上、西環嘅中高檔食肆有所影響，因為第一就喺依兩區地鐵未通，交通始終唔及其他區方便，其次區外客過嚟都喺靠巴士或電車，部份路段斷咗，有啲客費事煩就索性唔入嚟食飯。

精選菜式共有8款，包括凱撒沙律、特級三文治、意大利包、藍青口、炸魚薯條、三文魚、燒春雞及烤羊扒，由 $68 – $198，有平有貴，任君選擇。既然喺精選菜式，其他我哋都無多睇，一於晌度揀下幾款心水。

牛油果意大利包 $108

雖然成「舊水」一份意大利包，原來個份量都幾大，真喺圖片唔當得準，仲以為份量唔多，點知又大份，又伴有蕃茄片同沙律菜，加埋炸薯角。牛油果意大利包材料非常豐富，有牛油果、煎蛋、煙肉、雞肉、蕃茄、生菜，一層疊一層，配軟熟帶少少煙韌嘅意大利「拖鞋包」（Ciabatta），滋味無窮，只稍嫌佢啲煙肉過肥；而伴菜嘅薯角，炸得香脆。一個人實在未必食得晒成份牛油果意大利包，幸而有好姊妹分甘同味。

慢煮三文魚柳配菠菜及扁意粉 $188

粉橙色嘅三文魚柳襯青綠色嘅菠菜忌廉汁，個扁意粉賣相好清新。三文魚柳以慢煮方式烹煮，不單保留食材原味，更唔會令肉汁流失，所以，魚柳食起嚟嬌嫩柔滑，並且一口油脂，三大嚿魚柳絕對用足料；而扁意粉柔韌有咬口，跟滑溜嘅菠菜忌廉汁，好相配，再者，醬汁濃稠剛好，令扁意粉好掛汁，實在好睇又好食。

燒紐西蘭羊扒 $198

一餐飯又好少唔點一份肉類，難得幾位朋友都唔介紹食羊，當然一試其羊扒水準。羊扒來自紐西蘭，水準應該有一定保證，一份羊扒有3件，以沙律菜及車厘茄作為配菜，但最驚喜喺伴有南瓜蓉，綿密清甜，啱晒小弟，總比薯蓉嚟得有新鮮感。羊扒煎得恰到好處，不過，唔知何解，有朋友覺得柔嫩，但有朋友覺得有點嚡，歸因喺所食嘅位置定喺個人嘅要求？然則小弟食到又覺得唔錯喎，肉質幼細，羊羶淡雅，唔晒蘸芥辣或薄荷醬都OK。

跟Haagen-Dazs合作嘅甜品，除咗可點個別口味雪糕球之外（每球$35），亦有數款雪糕加生果或窩夫嘅配搭，如紅莓美人、香芒迷情、海鹽之心……等等，定價於$78-$98，份量頗大，適合三幾個人共享。

快樂無限 $98

一班朋友聚餐咁開心，梗喺要個「快樂無限」，色彩燦爛嘅快樂無限，喺以藍莓雪糕、芒果紅桑子雪糕及芒果熱情果雪糕組成，再加入新鮮士多啤梨、紅桑子、芒果粒。雪糕質感軟滑，果味突出，每一啖都滿載酸香清爽，果然有種快樂無限嘅感覺！

嚟到酒店嘅西餐廳，大部份客人心裡都喺只會想到食自助餐，其實，散叫菜式一樣做得有水準，就好似今晚所品嚐嘅幾道菜，叫人稱心滿意；再者，酒店晌服務上亦會做得高妥貼窩心啲。歲月消逝，但友情不變，一餐飯唔單止吃喝，仲喺一份交誼。

個人評分
味道：8/10
環境：8/10
服務：8/10
抵食：7/10
平均每人消費：HK$220

餐廳資料：
薈萃閣 ip cafe
西環干諾道西152號港島太平洋酒店
2131 5908