因為店子走新派路線，所以，店內裝修以型格先行。湖水綠襯白，加上適當嘅射燈，吧位用上高腳櫈，都喺醒目耀眼。由於鋪位窄而修長，入門左側以大玻璃鏡作為牆身一部份，目的都喺想增加空間感。

小店貴精不貴多，雖有小食、沙律、甜品，但每類別都只喺有三數款，而特色嘅亞洲麵食，一共有8款，全部均用上亞洲唔同嘅地方命題，以唔同嘅麵條配搭不同食材，果真八面玲瓏，包括台北（陽春麵）、關西（新鮮烏冬）、杭州（陽春麵）、東京（拉麵）、廈門（米粉）、長崎（冷素麵）、葛尼（油麵夾米粉）及會安（凍魔芋絲），每碗定價於$68-$98。

枱上除放置青檸清水，更備有3小罌麵食配料：蔥花、辣椒碎 及炸蒜片，可按個人喜好再稍作調味。

涼拌香辣豬肉小黄瓜 $35

菜名旁有兩隻辣椒公仔，可想而知有幾辣。豬肉跟青瓜都切成條形，前者肉質軟腍，後者清涼爽脆，但辣度果然唔講得笑，夠刺激。

台北 $68

以陽春麵掛帥，淋上台灣汁，味道醇厚帶甜，似加入咗玉桂、八角嘅肉燥汁咁，由於個醬汁做得厚身，所以啲麵好掛汁。配料有五香豬肉、香菇，豬肉滷得香，又夠軟腍，而當中嘅青瓜絲，令香濃嘅醬汁加添一份清爽。 

關西 $68

以新鮮烏冬配香菇清湯，配料仲有咗一小撮木耳絲，另分開碟上兩件煎豆腐餅。烏冬入口滑溜咬口，清湯散發濃濃菌香，而豆腐餅混入咗菌粒，做得鬆軟，煎得香口，伴埋冬菇片、木耳絲，好適合素食人士，亦喺8個麵款唯一一款全素麵食。

葛尼 $88

麵底喺採用咗馬來西亞常食到嘅「摻摻」，即喺油麵搭米粉，同一時間兩種口感，而餸料亦喺眾麵款中較多，以森巴醬做嘅豬肉、鮮蝦、豆卜、銀芽、白菜仔，好豐富，湯底亦都濃郁鮮香，甚具馬來風味。

自家果茶 $20

飲品選擇來來去去都喺汽水，亦有啤酒，不過自家果茶喺咪更健康呢？一大杯果茶以紅茶混和西柚、蘋果及熱情果，茶味唔算好濃，入口較為清淡、少甜，感覺清新怡人。

雖然喺一間麵店，但經營手法都較西式，亦喜知客人愛以甜品作結，故此，店家亦提供3款甜品：椰絲卷、檸檬蛋糕及合桃蛋糕配焦糖，份量大，定價亦唔算貴，值得一試。

椰絲卷 $30
曾經晌其他馬來西亞食店試過，亦都好喜歡依款椰絲卷。以班戟捲住大量黑糖椰絲，青綠嘅班戟皮加入班蘭葉汁所做，滲出淡淡嘅班蘭味，喺略嫌個皮有點兒韌，黑糖椰絲亦都略甜，減低少少個甜度就更合小弟口味。

合桃蛋糕配焦糖 $45

蛋糕底內藏有好多合桃，合桃落得一啲都無手軟，有相為證呀，最緊要喺夠香脆嘛；蛋糕入口濕潤，質感比較粗疏，有少少原始風味，淋晌面層嘅海鹽焦糖漿，令件蛋糕提升甜品層次。

從餐牌中店家嘅概念一欄，標榜原味、健康，又支持社區內小商戶，部入食材購自附近街市，而且，難得小店唔收加一服務費，俾人一種無賺到盡嘅感覺，亦有份對社區嘅關愛。

以上幾款麵食都喺小弟曾去過嘅地方，下一站會喺杭州定東京呢？廈門、長崎都未去過，一樣好有興趣。

個人評分

味道：8/10
環境：7/10
服務：8/10
抵食：7/10
平均每人消費：HK$125

餐廳資料：
Foxtail & Broomcorn
上環蘇杭街84號地下
2415 2555