室內環境屬港式西餐廳格局，一旁有啲卡位，其他都喺活動式4人枱，晌門口仲有幾個「自閉」位，白木為主，配以白椅，但樓底高，總有點點優點，可是始終環境唔喺好有太多話題性。唯一吸引人去多留意幾眼喺餐廳兩邊牆身嘅巨型恐龍壁畫，據講喺本土壁畫師作品，畫得栩栩如生、生動鬼馬。

正值聖誕，店內外都有唔少聖誕裝飾，增添多點聖誕氣氛。

從壁畫所見，一隻恐龍追食漢堡，另一隻飽食意粉，隱喻著漢堡及意粉都喺店家嘅主打，所以，餐牌頁面就喺漢堡及三文治，此外，仲有餐湯、沙律、小食、意大利飯 / 粉及多款全日早餐。 

散叫一向相對貴少少，所以，套餐不其然好易成為客人選擇。晚市套餐，包特色麵包、是日餐湯、自選主菜、精選甜品、咖啡或茶，定價於$198-$258 +10%。平貴與否，見仁見智，但從主菜嘅食材選料及定價，睇得出店主都想走上高少少檔次嘅路線。

因為試菜期間，適逢聖誕、新年，所以，餐廳亦推出咗兩款二人節日套餐應節，分別喺聖誕大餐（$550 +10%）和除夕夜套餐（$538 +10%），我哋有幸亦試咗部份菜式。

脆香煙肉西蘭花芝士球 $48

小食類絕多數都喺煎炸烤焗嘅香口小食，9款選擇都各有特色。脆香煙肉西蘭花芝士球，一客有8球，炸得金黃香脆，入口火燙熱辣，叫芝士球可能唔貼切，叫薯仔波我就確得啱啲。混入煙肉碎、西蘭花粒、芝士做成嘅薯仔波，鹹香滋味，最鍾意佢薯仔無壓得太蓉，有啲薯粒，好有口感層次。

濃芝士黑松露薯條 $68

相信依道小食唔使多介紹，最緊喺薯條新鮮炸起，又要趁快食。薯條混入咗少少黑松露，以及兩種芝士：車打及馬蘇里拉，前者香，後者輕易拉出一絲絲，濃香惹味，唔少得一份「熱氣」啦！

蘑菇忌廉湯 $38

散叫餐牌中，除法式龍蝦湯（$68）及意大利菜湯（$38）之外，仲有依個蘑菇忌廉湯。湯碗外形頗特別，而忌廉湯菌味濃郁，入口順滑細膩，意外地唔錯喎，而且，一碗嘅份量頗多。

蕃茄忌廉湯

餐牌唔見蕃茄湯蹤影，因為佢喺晚餐嘅是日餐湯，跟蘑菇湯一樣，質感滑溜，酸甜醒胃，色紅誘人，兩款湯都覺得喺有水準之作。

牛油果三文魚他他

屬於除夕夜套餐嘅前菜，雖然牛油果配三文魚他他唔算好特色嘅配搭，但從整個賣相，都見到廚師花過心思，尤其旁邊嘅檸檬皮山葵泡泡及黑椒粒檸檬肉，豈止裝飾咁簡單。三文魚他他已作調味，肥美而油脂足，加埋牛油果粒，好清新嘅一道前菜。

安格斯牛柳鵝肝

個牛柳鵝肝喺聖誕日大餐嘅主菜之一， 單睇賣相絕對有高級餐廳嘅感覺，好多細節位都做得一絲不苟，仲處處驚喜。主角安格斯牛柳煎得恰到好處，粉嫩而富肉香，肉質軟腍，而鵝肝切粒隨意擺放，既品嚐到鵝肝嘅豐膩，又唔太過「漏」；而最有趣，又驚喜喺所配嘅燒汁，以分子料理做成橄欖，一篤爆開流出濃香燒汁；至於所配嘅「薯菜」亦有一手，幼滑嘅薯蓉，清脆嘅椰菜仔及露筍，仲有烤串茄，串茄烘焗過，水份減少咗，茄味更濃郁，整道菜做得出色。

波士頓龍蝦燴意大利飯 $198

跟住，又回歸晚市嘅其中一款主菜「波士頓龍蝦燴意大利飯」，以別緻嘅貝殼形白瓷碟盛載登場。意大利飯煮得火喉啱啱好，煙韌有咬口，粒粒飯都包住龍蝦汁，又刨上薄片巴馬臣芝士，份外幽香；龍蝦肉爽彈，飯內有點蘑菇及菜粒，唯可惜龍蝦肉實在得好少。

Foie Gras黑安格斯牛肉漢堡無花果黑醋汁 $148

上文都提及過漢堡喺店家主打，臨尾以招牌漢堡作結，實在滿足晒。「安格斯牛柳鵝肝」嘅鵝肝有啲點到即止，而依個漢堡嘅鵝肝相對喺邪惡化身，睇睇將佢橫切出嚟就知有幾邪惡，鵝肝豐膩甘香，黑安格斯牛肉鬆化肉味濃，夾著火箭菜、紅酒燴洋蔥絲、蕃茄，唧上花果黑醋汁，味道酸香細膩，再者，配合埋外脆內軟嘅黑白芝麻漢堡包，啖啖回味。伴菜仲有酸椰菜甘筍絲、薯條及1/4邊酸青瓜，實在教人心滿意足。

相信今晚所試嘅都喺餐廳得意之作，不過餐廳座落於廠廈區內，近牛頭角多過觀塘，離人氣熱點apm有段距離，又屈晌內街，就算附近有間如心艾朗酒店，人流都喺明顯輸蝕咗啲。不過，依家唔少人都「專燈」嚟工廠區搵食，就算上樓鋪都不乏客源，重點還是落晌食物質素，有口皆碑自然吸引到客人，小弟覺得喺做飲食嘅不二法門。

個人評分

味道：8/10
環境：7/10
服務：8/10
抵食：7/10
平均每人消費：HK$0（試食邀請）

餐廳資料：

BV Kitchen
觀塘鴻圖道23號利登中心地舖
2673 0498