一年有幾個大節日，總會同一大班親戚筵開兩席食番餐，正所謂做冬大過年，冬至飯一定唔少得走埋一齊，以前通常貪方便，嚟嚟去去都喺嗰一、兩間，不過，近年竟轉嚟轉去，無他嘅，一班親戚對食無咩要求，邊間做得抵咪去邊間囉，當然，區域都喺圍繞番深水埗，就好似之前多彩、德興、百樂門都幫襯過，今次就揀咗李鄭屋村嘅稻香。
同大棚親戚食飯，唔喺次次都會寫食評，今次算喺興之所致啦。因為大時大節，我哋只有訂到食第二輪，都只不過喺食8:00pm，其實跟平時食飯時間差唔多。雖然開晌舊型屋村裡面，但內部裝修都算幾富麗堂煌，我哋更被安排坐房，房內仲有其他食客，但比起坐大堂已好有自成一角嘅感覺。
全包宴嘅「冬至宴」喺平靚正心水，包茶芥連加一服務費，一席包汽水6罐及指定啤酒2支，定價$2,388，仲有提前落訂每席減$200，依啲著數幾位師奶親友一定自動搞掂。以下菜式分享，跟番菜牌次序，查實可能過節客多關係，啲菜出到亂晒籠。
![bowl]() 橙汁
汽水就唔要喇，無咁健康，一般酒樓都可以改為2渣橙汁。不過，啲橙汁麻麻哋，以「果汁先生」作比較，味道似乎淡咗啲。
![bowl]() 紅灼海生蝦
第一道上場嘅喺兩斤灼海蝦，大隻又足秤，而且幾鮮甜，灼得爽口，只喺少咗碗「檸茶」洗手，環保啲唔想嘥張濕紙巾嘛！
![bowl]() 乳豬全體
雖則燒得有少少過火，有好多燶位，不過，大體上隻乳豬仔好少皮下脂方，外皮亦脆卜卜。
![bowl]() 翡翠珊瑚象拔蚌
「翡翠」以蜜糖豆入饌，炒得爽脆，味道清甜，而珊瑚蚌幾爽口，只喺象拔蚌口感有點韌。
![bowl]() 黃金花姿丸
炸花姿丸一共有20粒，感覺喺一個奇怪嘅數字，至少一人一粒，但又分唔夠兩粒喎。花姿丸炸得金黃，入口幾彈牙，唔會太一口粉。
![bowl]() 蠔皇金錢扣玉掌
金錢即喺冬菇，身大肉厚，而鵝掌扣得好腍，個蠔汁茨亦都好濃郁，只喺唔太鍾意茨汁太多同太杰啫。
![bowl]() 紅燒雞絲翅
眼下所見，魚翅嘅份量唔多，大部份都喺切得幼細嘅雞絲。成為咗「無翅」之徒，碗雞絲翅就益吓其他親友啦。
![bowl]() 清蒸珍珠龍躉
條龍躉仔應有成3斤重，魚鮮就最好清蒸，最能體驗其鮮味，確實條魚好鮮甜，又蒸得火喉剛好，肉質細嫩。
![bowl]() 脆皮燒雞
隻雞睇起嚟細隻咗啲，但炸得仍然唔錯，外皮香脆，而雞肉唔太嚡。
![bowl]() 臘味糯米飯
平時去到尾啲炒飯都無乜人吼，難得今次個臘味糯米飯咁搶手，首先飯粒炒得分明已俾人有個好印象，入口煙糯討好，當中加入唔少臘味，令個飯又香又好味。
![bowl]() 南山桃包
甜點喺蟠桃包，熱辣辣送上枱，比起啲乜糕物糕反而更啱佢哋，包身鬆軟唔黏牙，裡面嘅白蓮蓉軟滑少甜，好味！
無論早茶定晚飯，近年都少咗幫襯稻香，因為感覺麻麻哋，水準有下跌表現。可是，唔知喺食物水準改善咗，抑或個別分店啲師傅有心機做菜，今晚又難得所有菜式都做得頭頭是道，直頭以稻香一貫水平計喺超水準表現，故此，將來親戚做節食飯再翻兜稻香嘅機會應該大咗唔少。
個人評分
味道：8/10
環境：7/10
服務：7/10
抵食：8/10
平均每人消費：HK$200
餐廳資料：
稻香超級漁港 Pier 88
長沙灣發祥街10號李鄭屋商場301號舖
8300 8171
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
| 
