年三十晚入屯門, 我問朋友W有否好介紹, 她答:「試下屯門維記豬大王吖!」維記豬潤麵屯門版?? 正喎!!

原來「豬大王」就在青山公路「景峰」輕鐵站對面, 尋覓時不知道, 在青翠徑多寶大廈左找右找, 完全找不到大王位置, 原來要穿過大廈, 上一層就別有洞天.

中午「都市閒情」時段, 全店滿坐, 女店員Irene「忙過不停」, 我問:「嘩!你哋真係好好生意」, 抹枱執碗傳餸一腳踢的Irene:「咁啱架咋! 啱啱咁橋忙一轉」

我查詢有何推介食物呢? Irene熟練的回答:「豬扒, 豬潤, 雞翼」是不是有豬肺湯飲呢? 她皺皺眉:「有豬肺麵, 做餸就有, 但如果你指例湯的那一種就無喎」(少少失望, 因為我好鬼鍾意飲豬肺湯)

期待的豬潤來了, 質素及嫩滑程度絕對是深水埗維記級數, 不過底湯是胡椒味的豬骨湯, 個人就麻麻地.

始終認為維記的湯底, 保留原有豬潤血水遇熱變出來的泡泡, 才是化境. 情有獨鍾的程度, 就如看衝上雲宵, 但不是陳奕迅唱主題曲一樣, 欠了少少原汁原味.

這裡的豬扒, 一上台已經好似在呼喚:「食我啦!!食我啦!!食我啦!!」, 相機食完, 忍不住即時大口一咬, 熱辣辣, 外層輕脆, 內層又鬆又夠味, 真的沒有介紹錯, 絕對大王級.

即是咁的... 灣仔"新景園”的豬扒我一直認為最最最好食, 如果他是李綿聯, 這裡的質素就是安德尊, 互相輝映, 而且豬大王更便宜, 更多汁. ($29咋, 街坊價錢, 5星級質素啦)

炸雞翼同樣香脆熱辣辣, 有水準, 好味道, 雖然好食, 但可能之前的豬扒來得太誘人, 有少少被比下去的感覺. (連平時勁愛雞翼的小朋友, 今日都揀添食豬扒, 有時同一時間對條脷太好, 都會係一種浪費.)

我八卦走到廚房請教黎老闆何以斗瞻以大王自居呢? 黎老闆:「我之前係尖沙嘴賣牛賣咗十幾年架啦, 玩到好悶, 牛無豬咁多野玩到麻, 於是米轉行尊一賣豬」

我告訴老闆的豬扒超水準, 黎老闆指住煎爐說:「我哋唔係炸定架, 有客人叫, 我哋先即係整, 所以一定新鮮熱辣」

哦!不得了, 走入廚房聞到炸雞翼, 煎豬扒的香味, 原來香到可以殺死仁, 我想下次再來, 就坐正面向黎老闆的上菜位進食喎. (唔知得唔得呢老闆??)

味道: ★★★★

環境: ★★★

服務: ★★★★

抵食: ★★★★★

推介度: ★★★★

大仁生活facebook

http://dayanlife.blogspot.hk/2015/02/blog-post_20.html