以前去沙田踏單車，一般都會去大圍火車站附近幾間單車店租單車，但經常要先付錢，後取(爛)車。今次我忍夠啦，小龍女想踩單車，我地就試下轉移陣地，去大水坑單車公園租單車。

我覺得大水坑單車公園好唔錯，一來好容易去(大水坑站B出口一出，沿單車徑行5分鐘就到)，二來單車新，三來店員普遍態度都好友善，四來價錢較便宜，相比起大圍既單車店，實在好太多啦～

公園內，大大話話有四、五間不同既單車店

可能有競爭，價錢同服務間間都唔錯～

單車價錢由$30-$50不等，視乎新舊及型號，精明既小龍女，當然二話不說，我要$50既...加多$30就可以係大尾篤還車。

終於揀定我地兩駕戰車～

出發前，補給一下。方圓十里得一間舖頭，心諗會唔會又係海洋公園價？原來係屋村街坊價，$5一枝水，真係好平呀！

當日天氣炎熱，貼心既店主，仲俾左兩支結左冰既水我，超級清涼