|
熊本。熊本城﹑櫻之小路﹑熊本電車﹑SL人吉蒸氣火車
|
|
平凡人
2015-03-16
2451
12
|
分享
收藏
< 福岡﹑熊本﹑小倉﹑長崎5天遊 >
第三天（續） 終於去到熊本最重要既地方熊本城啦！日本三大名城之一點可以錯過！ 熊本城佔地唔細，我由東面「須戶口門」進入熊本城 比500円入場費就可以入去啦 我覺得500円就入到咁重要既地方真係超價丫，以前去得多大陸，好難搵到個地方收咁平入場費 「熊本城是豐臣秀吉旗下大將加藤清正受封為熊本城主後於1601開始動工，1607年完工的城堡。因為城內種有許多銀杏樹，所以又稱為銀杏城。熊本城剛完成時周囲9公里，佔地大約98萬平方公尺，擁有3座天守閣、49座櫓、18座櫓門、29道城門，規模相當壯觀。」 入去啦，建築物起係高地，要一層層行上去 見到石牆之上有建築物啦，係「櫓」建築；櫓通常作為倉庫或者軍械庫，緊急情況之下都可以作為戰鬥用途 熊本城之內有好多間「櫓」 上完一道石牆仲有下一道石牆，城內越係重要既建築物就起得越高同越近城中心 石牆碎左既？ 好多學生黎到熊本城參觀；平時我都成日帶學生去唔同地方參觀，四圍去幾好玩丫^^ 正前方最高個座就係熊本城「天守閣」 石牆起得咁高而且越高越斜係因為保安原因，唔比人咁易爬上去，以前啲忍者咁厲害，唔起得高易咩易比人爬到上去偷襲架 前方係「本丸御殿」，亦都係熊本城其中一個重要地方 去到天守閣下面啦，又高又宏偉；可惜原本既天守閣已經被大火燒毀，而家呢座天守閣係1960年重建出來 有穿著古代裝束既職員同大家影相，好friendly（我見人地啲相係有古裝美女同大家影相，點解今日冇架！） 呢個位置有間小商店，有野食亦都有手信買 呢座係「宇土櫓」，除左兩座天守閣之外最高就係佢，所以亦都被稱為「第三座天守」；而且宇土櫓冇受戰火波及，由古時一直保存到而家，好有歷史價值，係一件真真正正既文物 望返去天守閣，右邊高既係大天守，左邊比較矮就係小天守 上面好似有人bor 穿過本丸御殿之下隧道「闇り通路」就可以去到另一邊 原本既本丸御殿得返遺址咋 呢道好多人 地勢高可以望到好遠 有個休息同飲食既地方 唔知咩黎呢？ 見到有好多人坐左係道，我諗就快有表演睇啦，我都等下有咩睇先 原來係頭先影相既職員黎表演，見佢地走來走去好落力演出，大家都睇到拍晒手！不過我完全唔知佢地講咩，其他人笑咩又唔知，結果坐係道戇居居唔知點好... 睇完之後都唔知發生過咩事 等左咁耐，係時候入去「本丸御殿」參觀；當年1610年建造既本丸御殿已經毀於1877年西南戰爭，後來經過工匠們努力，用傳統技術進行修復，本丸御殿終於係2008年修復完成開放比大家參觀 本丸御殿室內唔可以著鞋，入去時會派發膠袋，大家就係咁拎住膠袋四圍行，唔講仲以為去左街市買餸 入面有文物同好多本丸御殿既資料介紹 本丸御殿大廳「大廣間」，一望上去就有種日本古代大戶人家感覺 「大廣間」之後就到「若松之間」，全間秀都金碧輝煌 再之後就到「昭君之間」，牆上壁畫係昭君出塞圖 指示牌得日文唔識睇，好快就行左一圈出來 跟住就到你啦 天守閣室內有好多關於天守閣相關資料展出，不過室內好似唔比影相所以我都冇影lu，上到頂樓先再拎相機出來影風景 上得高視野特別遠 熊本城種左好多銀杏樹，所以叫「銀杏城」；十月時銀杏樹仲未變黃，只係見到綠色銀杏樹，如果全部銀杏樹都變成金黃色一定好靚 銀杏未變黃，櫻花未開，熊本城依然吸引 係時候離開熊本城啦 由「頰當御門」離開；櫻花季節沿路都會開滿櫻花，一定好靚 行五分鐘去到一個叫「櫻之小路」既地方，成班人圍住有野睇？ 有類似木偶戲演出，不過造型有啲恐怖，而且音樂聲都好恐怖，唔岩我睇 有人排隊食好出名既阿蘇牛乳雪糕，但我去到阿蘇都冇食，唔諗住係道食啦 櫻之小路睇落只係一條普通仿古商店街，來買野食野買手信ok既，不過我就對呢道興趣不大，好快行一轉就走lu 出返去大馬路，不過仲未走住，係熊本行多一陣先 Halloween快到啦 又再返到下通商店街想搵間鋪頭，不過行左一轉都係搵唔到，咁就算啦可以走lu 日本啲碟好平囉 旅遊書好colourful 超多mt款式 出到路口見到有人表演緊bor，今次係男表演者，不過圍住佢個堆全部都係女fans！為免惹人懷疑都係唔好行咁近！ 冇特別野做lu所以準備坐電車離開，個時唔知道呢道有間Kumamon Office可以參觀，冇得見得意熊仔啦... 好多人等電車，差少少就排到出馬路 有新款電車行走，不過舊式電車比較常見 咁岩我坐中新款電車，車箱有兩卡可以載多啲乘客，行車時新舊款電車分別唔大，當然新車就咩都新啲啦 好快又返到熊本站，兩日熊本旅程都差唔多結束啦，有少少可惜既係來到熊本竟然見唔到熊本熊真身，話晒我咁鐘意佢！ 係熊本站行左陣，見到好多好靚既熊本熊商品，但我又唔係特別想買野，最後只係買左枝筆同盒餅就算（每次去日本唔同地方都會盡量買呢系列地區限定Hello Kitty筆，屋企已經收埋幾枝未用） 係火車站入面竟然見到今晚熊本有煙花大會，地點係八代！以前都睇過有關日本煙花大會既電影同影片，知道日本煙花係超靚，個心即時飛左去八代！打開地圖睇睇八代係邊先，原來八代係熊本市南面，坐車要成40分鐘先到，咁就麻煩啦如果今晚冇車去小倉咪大獲（我終於知道點解今晚熊本博多所有hostel都full晒，原來兩個地方都有大活動，迫到我要走去小倉咁遠住）！諗左好耐，都係唔想今晚要流落街頭，更加唔想麻煩到其他人，我既煙花夢都係時候發完啦...就當冇知過呢件事（唔知好過知） 正當失望之時，突然比我見到遠處火車路軌噴緊煙，我即刻係背囊入面搵張pass出來再衝入閘去月台，果然冇比我估錯佢就係傳說中既蒸氣火車「SL人吉」 拿拿聲走去對面月台近距離親近一下SL人吉；SL人吉行走熊本站至人吉站，今次九州之旅時間所限唔可以體驗蒸氣火車既樂趣，難得有緣相會就影多幾張相留念，如果冇記錯我係第一次見到活生生既蒸氣火車，係一部真真正正會噴煙會行走既蒸氣火車！ 唔只煙囪會噴煙，車底都一樣不停出煙 只係掂一掂車頭，手掌即刻黑晒，可想而知駕駛蒸氣火車又污漕又辛苦 後面車箱有種復古味道 車轆都特別型 職員都已經落車，部車準備走啦 去返對面月台，目送SL人吉離開 我一路都想坐蒸氣火車架，話晒未試過ma，可惜暫時仲未有機會...日本在來線係窄軌鐵路，軌道距離只有1067mm，比標準軌1435mm少，因此車輛唔可以太大，所以SL人吉睇上去唔會好大部；我見過一啲標準軌蒸氣火車相片，火車頭係好大好霸氣架，如果有一日可以見到呢啲大型蒸氣火車頭就正啦^^不過世界上蒸氣火車已經越來越少，唔知將來我有冇機會見到呢？
|
~END~
| 商店 | 熊本「紅」宣傳大使～熊本香港事務所～ |