翠河餐廳 Green River Restaurant：我的星期六美孚早餐 ~ 乾翠俐落 SeeWide

其實，嚟過依間「翠河」食早餐，不過，嗰次無帶相機，個食評就費事寫，除非好差，反正總有機會再嚟。以早餐而言，晌美孚區咁多間快餐店、茶餐廳嚟講，小弟覺得翠河嘅質素可算中上，值得翻兜嘅食肆。不過，補充多句，午餐嘅水準就飄忽啲，前後嚟過幾次，有好有唔好。

今早兩公婆行遠少少過到嚟翠河，都喺想食好少少個早餐。對比起區內其他茶記，以及附近嘅太興，翠河嘅環境喺最好，樓底高，又光猛闊落。

早餐一個餐牌A-I共9款前後睇晒，點配點選，乾脆俐落顯示清楚，仲供應到去12:00pm先完，定價為$24-$30，其他店嘅早餐都喺咁上下價錢，至多都喺差幾蚊，所以，翠河都唔算點貴。

早餐B $29

老婆要米粉，配料選煎蛋、雪菜肉絲及美式蘑菇腸。米粉跟配料都鋪得滿滿，初時仲以為啲美式蘑菇腸喺一條條，原來喺一片片，老婆最欣賞啲雪菜肉絲，因為無過鹹嘅通病，而湯底只喺一般嘅雞湯底，無話好好，亦無話差。

早餐I $29

小弟嘅意大利蕃茄濃湯薯仔早餐通粉亦可以揀兩款配料，卒之點咗美式蘑菇腸及豬柳漢堡。蕃茄濃湯好濃郁酸香，內有唔少薯仔同蕃茄，豬柳漢堡雖然細塊咗啲，但感覺又唔會得嚿粉咁，清晒成碗喺非常飽肚。

蒜香牛油多士

由於翠河隔離個鋪位兼做埋麵包零售，所以，佢啲包嘅新鮮度絕無懸念。我哋兩個嘅早餐都包半件蒜香牛油多士，厚切嘅多士，除蒜香，亦加咗少少香草，比起次次都牛油餐包或牛油多士點都多少少心思。

熱奶茶、熱檸水

茶餐廳嘅穩膽選擇都喺揀番熱奶茶，正如之前嘅食評所講，茶底醇香，絲滑幼細，好嘅奶茶只有晌茶記搵到。

食完早餐，又喺順道逛逛街市嘅時候，買啲料煲啖湯俾一家人飲，喺周六常做嘅指定項目。

個人評分
味道：8/10
環境：8/10
服務：7/10
抵食：8/10
平均每人消費：HK$29

餐廳資料：
翠河餐廳 Green River Restaurant
美孚美孚新村4期百老匯街69-119號地下101A舖
2370 2908

=============================================

感謝山區麵包王提供以上資料

山區麵包王的網誌: http://garycwm.blogspot.hk/

=============================================

~END~

商店	翠河餐廳 (美孚店)


(0)	(0)	(0)