整個熟食市場一啲都唔細，外圍喺各間食店嘅鋪位，因為通道頗闊落，夠擺啲摺枱。而中間位置更可以放下多張大圓枱，所以，現場所見，有多摺枱、加大木板、膠櫈……等等，冷氣欠奉，但多把牛角扇，樓底又夠高，勝在夠晒通爽，喺唔少人嘅「地踎」回憶，況且地方又幾企理。

從餐牌所知，813可以定性為茶記一間，有早餐、茶餐，其次就喺多款碟頭飯，20、30蚊一餐，極之經濟，主要都喺街坊客及附近學生。結果我同老婆揀咗兩款碟頭飯，已包埋足料靚湯或餐飲。

XO醬雜菌炆米 $32

見到有一欄寫住「自家製XO醬必炒之選」，非常感興趣，十多款選擇，款款都喺賣$32，要咗一碟XO醬雜菌炆米。兩公婆不斷摷吓啲雜菌晌邊，因為唔喺好覺得有「菌」，問問老細會唔會嚟錯，佢即刻解釋佢哋唔喺用一般街外常用嘅乜菇物菇，怕我哋唔識嘢仲拎咗碟嘢出嚟，就喺佢口中嘅白貝木耳（白色大塊）及奏沙耳（淺啡色細塊），用嚟切絲炒，口感喺爽爽脆脆，不過得好少；而自家製XO醬果然真材實料，既惹味，又鹹香，米粉炒得啱啱好，又唔會太腍太爛，好食，真喺一道好「隱世」嘅炆米！

古法椒鹽骨飯 $31

餐牌後有一堆廚師推介碟頭飯，見到有一款古法椒鹽骨飯，真喺想見識吓點古法？古成點？雖話椒鹽骨，其實喺豬扒，再「碎上」，啲豬扒佔滿自創嘅調味粉，入口頗辣，又有點點似七味粉，都幾特別，份量好足，都只喺賣三十零蚊，依個世道真喺抵到爛。

奶茶

叫碟頭飯已餐或餐飲，小弟例叫一杯熱奶茶，飲落唔算好滑，但夠香。

餐湯

喺鹹肉煲老黄瓜，熱辣辣，有份鹹鮮香味，夠晒聚火下氣。

雖然鋪位細細，賣嘅嘢都好街坊，但估唔到有自家製XO醬賣，大嘅賣$98（200g），細嘅賣$58（100g），仲寫明喺送禮裝，雖然未見其真身，至少味道試過都有番咁上下。

餐後同老細鄭生再傾開，最神奇喺原來佢哋仲會做埋私房菜，亦感受到佢做菜嘅用心，大牌檔嘅私房菜，有機會真喺想夜晚嚟一次。

個人評分
味道：8/10
環境：7/10
服務：8/10
抵食：9/10
平均每人消費：HK$32

餐廳資料：
813
葵涌和宜合道24號和宜合道熟食中心C13舖
5401 6807