依個月大家都好忙，預咗唔齊人，所以細胞小組就唔搞咁多活動，簡簡單單飲餐茶，當喺聚一聚，選址喺九龍城廣場嘅佳寧娜，讓小弟有多一個搵食足跡晌九龍城。成語「福至心靈」，意思喺運氣嚟到，人心也變得靈巧，我哋就「福至心寧」，因為一大班組員維繫咗十幾廿年（見其他組都一早散晒），當中由無小朋友，到依家個個都大晒，真喺蒙福，咁多年見大家無病無痛，算喺齊齊整整，心感安寧。
雖然喺食晏，始終晌星期日，訂位喺常識，否則真喺要等位，而餐廳環境其實幾擠逼，一張枱貼另一張枱，只有少許空間作通道。但勝在環境光猛，地方感覺新簇。多謝好姊妹幫手訂位、攞位，安排好晒一切，仲點定多款點心，等小弟一到（因為喺最尾一個到，但咪誤會，我無遲到）就即刻開餐。
今次有啲甩鬚，無記低啲點心價錢，淨喺拎咗張點心單，原來無價錢，所以，都喺憑一眼記憶俾個單價大家參考吓，可能有啲出入。茗茶$12位，小點$20，中點$25，大點$34，特點$36，頂點$40，酸菜$12（1-4人一碟、5-8人兩碟、9人以上三碟），故此，睇落定價唔平。
好多潮州酒家嘅前菜都喺花生、鹹酸菜、菜脯、豆腐乾依幾類，一般都會做得唔錯。
![bowl]() 海蜇牛展 $58
個牛展滷得幾入味，口感又幾腍，不過啲海蜇切得較粗，但咬落都仲喺爽口嘅，可是連一小碟醋都無俾過嚟。
![bowl]() 涼拌雞絲粉皮 $50
粉皮則切得幼條短身，個麻醬調校得唔錯，又放入少少青瓜，柔中有脆。
![bowl]() 潮式炒蘿蔔糕 $40
啲蘿蔔糕蘸咗啲蛋漿煎，不過，因為沾得唔夠平均，或煎到啲蛋甩晒，無咗份蛋香兼脆口感；蘿蔔糕做得挺身，煎起嚟夠實實在在。
![bowl]() XO醬炒腸粉 $40
嘩，估唔到個XO醬都幾勁，入口頗辣，夠晒惹味，腸粉軟腍，唔會太硬太乾。
![bowl]() 鮮蝦菜苗餃（大點）
皮薄透餡，內裡填滿菜苗，蝦肉又幾鮮甜，值得推仲吓。
![bowl]() 潮州蒸粉果（中點）
個菜苗餃認為做得好，但個粉果卻喺好一般，皮厚，又黏牙，口感令整個粉果打咗折扣。
![bowl]() 家鄉糯米卷（中點）
都好耐無食糯米卷喇，一客4件，覺得比起以前，似乎越嚟越細件；糯米煙煙糯糯，不過，外皮比較黐牙。
![bowl]() 蜜汁叉燒包（中點）
個叉燒包好食，除咗包身鬆軟，餡料多，醬濃味香，又無乜肥豬肉。
![bowl]() 蟹籽燒賣皇（大點）
雖然加咗蟹籽，但並未為籠燒賣皇增值，一來叫到燒賣皇，但做得有少少迆，二來味道都只喺覺得普通。
![bowl]() 鴛鴦蛋撻（中點）
兩款蛋撻都喺用酥皮底，還算鬆化，一款喺普通口味，另一款喺蛋白蛋撻，味道上唔會有咩拉驚喜，只喺叫嚟俾幾個小朋友食。由於唔喺晌點心紙之上，只喺侍應捧嚟捧去叫賣，欠缺新鮮熱辣。
![bowl]() 柴魚花生肉碎粥（中點）
啲粥夠晒綿，不過，柴魚少，花生少，肉碎就更少，變成碗有味「白粥」。
![bowl]() 老爺馬拉糕（中點）
馬拉糕以原籠蒸焗，唔喺一大籠蒸好切成小件，馬拉糕質感鬆軟有回彈力，清香味美！
![bowl]() 白灼菜心（大點）
味道就唔多講，都喺菜心一碟，菜心唔太老，灼得唔過火，都已經收貨，唯一想指出白灼菜心竟然喺列為大點，貴過籠功夫多多嘅潮州蒸粉果！
![bowl]() 鹹魚雞粒炒飯 $88
午市嘅特價飯麵，炒得有水準，飯粒夠乾爽，食落又唔太油，鹹鹹香香，討人歡喜。
最後，例牌順道幫埋是月生日嘅組員慶祝，早已預備好英王麵包店（A-1 Bakery）嘅蛋糕，咪以為嚟飲茶順手切個蛋糕食吓就免收切餅費，一樣收你$30一個，當然事前問咗喺要收，到叫店員攞餅時佢都有再次提醒需要收$30切餅費。
嚟到佳寧娜，無特別試佢啲潮州菜式，只喺食吓點心，未必食到其真正水準。但若以午市飲荼計，點心水準只屬不過不失，但定價則屬偏貴。
個人評分
味道：6/10
環境：7/10
服務：7/10
抵食：6/10
平均每人消費：HK$100
餐廳資料：
佳寧娜潮州菜 Carrianna ChiuChow Cuisine Restaurant
九龍城賈炳達道128號九龍城廣場4樓406-410號舖
2718 3033
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
| 
