睇嚟小店做出到啲成績，我哋約7:15pm左右到，客人唔太多，之後，未夠8:00pm已全院滿座，門外有少量人等位，隔鄰兩張枱都見翻咗兩轉枱，有啲人真喺當食快餐咁食，食完就走，尤其外國客，喺我依啲「磨爛蓆」先掗人大半個鐘枱。睇嚟招財有方，但新包款又掂唔掂呢？

餐牌就印晌枱上嘅餐墊，亦可以睇睇收銀機位上嘅大電視。食物類別都喺小食、沙律、漢堡、意粉、特別推介……等等無變，但每個類別中就見多咗唔少款式，既然嚟試新款式，所以我哋都費事諗，新款先行。

餐廳採用先落單、付款，後送上食物。由於落單後都要等段時間，所以揀咗嘢飲先，因為我哋只點兩個漢堡，同時轉餐，故此額外揀多支飲品。嘢飲就晌收銀旁雪櫃，俾咗錢就可以自己埋去拎。

意大利San Pellegrino西柚汁 $22

女士喜歡飲啲天然嘢，所以介紹佢試吓San Pellegrino嘅果汁，除西柚味（Pompelmo），仲有血橙（Aranciata Rossa）及柑味（Mandarino）可供選擇。不過，佢話雖然西柚味幾香，但總體感覺只喺不過不失。（註：+$33轉餐，有埋炸薯條、芥末酸瓜及卷心菜沙律）

Guava Soda $35
較少飲嘅味道，所以，小弟揀咗支番石榴味汽水，簡單嚟講，番石榴味好突出吓，冰凍涼快，食住炸嘢、漢堡，感覺超爽。（註：+$50轉餐）

Root Beer $35

朋友揀話未飲過咩叫Root Beer，所以揀支試試，佢話個味道似沙士多過似啤酒，小弟對啤酒認識唔深，當喺得個知字。

炸蝦釀秋葵 $42

感覺好新奇，一客有6條，真喺將蝦膠釀入秋葵裡面，沾粉漿脆炸，再佐以煙椒燒烤醬。滑潺潺爽口嘅秋葵，加味鮮彈牙嘅蝦膠，口感幾得意，不過，個燒烤醬味濃，較搶個蝦鮮味，如果配個帶點清新酸味嘅醬汁又如何呢？

野菌沙律 $62

賣相平平，但材料好豐富，有沙律菜、烤雜錦香菌、燒南瓜、小紅蘿蔔、炸洋蔥絲，淋上芝麻醋沙律汁。感覺健康清新，食材各有不同口感，而醬汁酸酸哋帶芝麻香，喺一道挺開胃嘅沙律菜式。

試過小食及沙律，都要分享一下餐廳嘅主打「漢堡」，一共有7款選擇，招牌嘅喺德洲燒烤漢堡，廚師捱介嘅喺煙燻鵝肝漢堡，而我哋就試咗兩款新出品「史刁頓藍芝士漢堡」及「香脆鱈魚漢堡」。

史刁頓藍芝士漢堡 $88

嘩！個史刁頓藍芝士漢堡超大個，一口過咬落去真喺無可能，多得老友手勢，120°角分平均分開3份，嚿6安士煙燻牛肉厚到差啲跌晒出嚟，之後食嘅時候都有啲「嗱搞」；從餐枱墊所知，內裡仲有脆煙肉、醃果醋紅菜頭、炸洋蔥絲、生菜、史刁頓藍芝士，煙燻牛肉又香又鬆軟，醃果醋紅菜頭亦好好食，不過，稍嫌汁醬偏少，脆煙肉做得夠碎唔明顯，而藍芝士再加多啲就更好嘞。

香脆鱈魚漢堡 $83

個香脆鱈魚漢堡同樣份量十足，以冰島鱈魚柳、車打芝士、生菜、烤菠蘿他他醬及白酒醋脆片組合而成，芝麻包好鬆軟，啲鱈魚柳又真喺幾嫩滑，個菠蘿醬他他亦幾好食，不過，芝士的確喺少咗啲，白酒醋脆片亦唔喺好食到晌邊。兩個漢堡都轉套開係，伴上炸薯條、芥末酸瓜及卷心菜沙律，薯角炸得甘香脆口，爽脆嘅酸瓜同埋醒胃嘅卷心菜沙律可以中和一下油膩感。

牛肝菌菠菜寬蛋麵 $86

食完以上幾樣嘢，老友話想追加多一客意粉，問我食唔食得落，我依啲克苦耐勞山區人當然OK啦，同樣揀咗新出品嘅牛肝菌菠菜寬蛋麵。一上枱，菌香四溢，因為除用上牛肝菌，更加入黑松露忌廉醬汁，所以，入口都一樣菌味濃香，而寬蛋麵煮得咬口，配合埋洋蔥、菠菜、即刨巴馬芝士片，鹹香清爽，濃而不膩，值得捱介。配一小件蒜蓉法包，最好夾件牛肝菌落去一齊食。

我同個朋友都算喺甜品迷，其實大家都飽飽哋，但最後都喺忍唔住，多點兩客甜品共享，估唔到兩款甜品都好得，朋友兩公婆都好滿意，讓我哋有個圓滿嘅結束。溫馨提示，兩款甜品都喺即叫即焗，製作需時，所以，最好預早15min叫定。

鄉村蘋果批 $56

一客蘋果批大概有直徑6吋大細，賣相幾唔錯，烘得金黃。果然新鮮焗製，入口熱辣辣，外表酥脆，蘋果甜中帶點酸，有別常食到嘅蘋果批，肉桂味極之輕，換嚟喺以海鹽拖肥醬作調和，更加啱晒我，再者，加咗啲蜜餞合桃粒，添加多幾分口感。

朱古力軟蛋糕 $52

外觀有點似班尼士，但一篤落去超軟熟，軟綿綿嘅口感，加上濃郁非常嘅朱古力味，意外哋咁好食；而雲呢嗱雪糕球取自Movenpick品牌，品質當然有保證，對整個甜品嚟講，喺錦上添花。

朋友話啲漢堡雖然唔錯，食得出用料有質素，但仍有少少改善空間，反而，估唔到甜品為大家帶嚟驚喜，整體而言，朋友都覺得值得再嚟光顧。

個人評分

味道：8/10
環境：7/10
服務：8/10
抵食：7/10
平均每人消費：HK$195

餐廳資料：
Texas Burger
天后電氣道109號地舖
2805 7811