同老婆一齊行山最好就喺佢幾捱得，上上落落幾粒鐘都閒事，趁周六，兩公婆又「自由」行，無特定路線，由川龍起步，晌山上「響石」兜個圈當熱身（原來山頂上有個好大嘅墳場「響石墳場」），跟住去端記嘆完茶，再晌附近啲菜田行吓，最後就經城門引水道、老圍一直行落荃灣市中心，慳番程小巴車錢，都唔喺第一次行，所以，都知道無乜難度，亦無乜危險性。
端記，你話佢懷舊又得，話佢地踎都得，總之，晌度食情懷、風味，多過環境同味道。地下一層室內加啲戶外位，地方企理少少，二樓就較多人鍾意，因為景觀開揚啲，一邊喺有瓦遮頭，另一邊就全露天，不過，膠櫈一地散亂，依度無人特別招呼你，想坐邊就坐邊，一切隨意，當然，二樓近欄杆邊喺熱門位；除非你夠人多坐得晒成枱，搭枱喺必然規矩。
地下室內位
喺度食嘢，比食自助餐更自助，你去酒店食自助餐，自己去拎食物，但點都有人斟茶遞水俾你；端記，基本上無服務可言，洗壺、沖茶、攞點心，全自動，自已自動自覺搞掂。
所有點心就晌樓下廚房，無點心紙，無介紹，亦搵唔到價目表（喺我無刻意搵，亦費事問），有啲包款唔知喺乜，你問到，阿姐都會答你；個籠裡面有咩點心，唔使問，自行打開睇睇就可以；捧住一盤點上，行番上二樓要認真小心，因為路窄地濕。
![bowl]() 金錢肚
金錢肚炆得軟腍入味，充滿柱候醬香，金錢肚下底唔喺慣常見到嘅蘿蔔，而喺鹹酸菜，撈埋啲汁，又幾好食。
![bowl]() 菜肉包
成個叉燒包咁樣，一客3個，包身都發得鬆軟，內裡主要有豬肉同木耳絲，味道，OK啦。
![bowl]() 馬拉糕
做得高身大件，口感鬆軟，有彈力，味道就清啲，只帶少少蛋香，可謂還原基本功。
![bowl]() 排骨
排骨、鳳爪做得細細碟，排骨嘅豆豉及辣椒味都好輕，少有咁清嘅蒸排骨，好就好在無乜肥肉，啱晒我老婆。
![bowl]() 鳳爪
佢無鳳爪排骨，老婆又想食，唯有每樣一碟，鳳爪就較排骨惹味，滿有豉香。
![bowl]() 灼菜心
夠大碟以外，就喺咁多樣嘢最好食，菜心青翠嫩綠，有菜味，菜梗爽口，感覺鮮嫩如即摘即食咁。
全店唯一服務，就喺收錢同執枱，食完嘢，搵個阿叔埋單，佢唸兩唸就噏個數你知，信不信由你，所以成餐茶埋單齊頭$90，細數喺點？唔好問，覺得合理，唔貴，就走得！
個人評分
味道：6/10
環境：6/10
服務：5/10
抵食：8/10
平均每人消費：HK$45
餐廳資料：
端記茶樓 Duen Kee Chinese Restaurant
荃灣荃錦公路川龍村57-58號
2490 5246
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
| 
