餐廳環境較一般旺區嘅酒吧餐廳有個性，唔知喺唔喺跟悠閒嘅西環有關。一入門口，頭頂就見唔少舊鐘，而中間水吧位上面就放有更多，有啲鐘款仲有份懷緬味，此外，又掛起一啲舊款電話，不期然，有種時光停頓嘅感覺，叫人都漫活起嚟。

無意中，又發現頭頂附近有啲相片，下面附有簡單介紹，原來喺「香港展能藝術會」嘅學員作品，睇嚟店主應該都幾支持一啲殘疾人士學習及創作藝術。

不過，講到成個場最吸睛、最亮點，相信會喺餐廳尾嘅「半」開放式廚房，點解半開放？因為雖然可清晰睇到廚房一切，但都只喺隔住一層玻璃。而最亮在於內於一大座自家磚砌烤爐，非常有特色，薄餅亦喺餐廳嘅主打菜式。

枱上已有齊食薄餅嘅調味必備：芝士粉、辣椒碎、黑椒碎及辣椒仔，喺時候開餐嘞。

除咗散點餐牌，晌門口掛有一個「是日精選」嘅餐牌，以主菜及薄餅為主。點3款菜式，再加幾杯飲品，已相當足夠。

Pork Milanese $150

依一款炸豬扒令我點想返起以前一款又喺炸豬扒配芝士嘅舊式西餐菜式「哥頓豬扒」，佢喺以兩塊鎚鬆晒嘅無骨豬扒，夾住芝士晌裡面（有啲會加埋火腿），沾麵包糠吉列炸，好懷緬依款菜式架，不過，今次嘅Pork Milanese則將巴馬臣芝士灑晌吉列豬扒之上而已，再配田園沙律。豬扒炸得酥脆甘香，又唔油膩，咬落鬆化富肉汁，刨多少少芝士就更好，所以，小弟唯有糝多少少枱上嘅芝士，哈哈！此外，附上嘅蘑菇茄醬亦太少，唔喺太夠點，事後反映，原來可以問佢哋再添啲架！

Pizza Garlic Prawn $170

餐廳嘅正薄餅都喺直徑11吋大細，即叫即製，個個都喺新鮮出焗，所以一上枱都喺熱烘烘、香噴噴。依個「蒜蝦」薄餅以茄醬加香蒜做汁底，仲加有唔少洋蔥及少少羅勒提味，食落清新味美。批底屬於薄批類型，不過唔喺薄到餅乾脆口嗰隻，仲帶有少少「麵包」口感，香港人一向都喺貪心，所以，略嫌鮮蝦落得較少。

Rosticciana $198

其實，就即喺烤豬肋骨，以自家製嘅醬汁醃過，豬肋骨烤得一身古銅，帶有焦香香氣，配薯角，田園沙律，非常吸引。因為餐牌已經講明喺BB豬肋骨，所以，無一般美式餐廳咁闊咁大條，但肉質鬆軟，夠晒入味，越食越滋味。

因為是日精選唔喺套餐，所以，飲品需要另外再點。雞尾酒、啤酒就一定有供應，不過，有幾款非酒精飲品就啱我哋唔好酒嘅人多啲。

Baby Donna $38

鮮紅色嘅Donna BB，以混合果汁、雪碧、石榴糖漿混合而成，非常簡單，再加點檸檬及藍莓作裝飾。味道？朋友話味道清爽，帶甜，講唔得上好特別，但仍覺得唔錯。

Tropical Ale $38

橙紅色嘅Tropical Ale，主要以鮮菠蘿汁溝雪碧、石榴糖漿做成，感覺菠蘿味天然清甜。

Virgin Mojito $58 

好多酒吧都有依一款薄荷特飲，成份包括新鮮薄荷葉、青檸、糖及梳打水，單睇見都覺得涼快，入口就爽快到不得了。

Ice Chocolate Bubble $32

小弟就只喺要一杯冰凍嘅朱古力就夠喇，雖然只喺一杯凍朱古力，但賣相都幾靚靚仔仔架，以奶泡代替就咁落奶，口感頗柔滑，只喺朱古力味道薄弱咗啲。

臨離開前，店主都走過嚟問問我哋覺得啲食物點呀？啱唔啱食？有無咩意見呀……？仲介紹咗佢哋平日都有做午市套餐（$98），前菜喺餐湯或沙律，主菜有多款9吋薄餅或意粉供選擇，加$30有一客招牌甜品，加$10有一杯餐飲，個人覺得，免費跟埋杯餐飲會俾客人感覺好啲。可惜嘅喺，我話自己一來唔喺住依區，亦唔喺晌依頭返工，個午市套餐只做星期一至五，公眾假除外，真喺幾難幫襯到，佢話唔緊要，灣仔有分店，有機會嚟試吓，俾吓意見囉！

輕輕鬆鬆跟朋友打發咗成個下午，感覺，依區啲人似乎悠閒少少，唔知喺唔喺自己腳步依然太快。西區，相信還會多嚟走走！

個人評分
味道：8/10
環境：7/10
服務：8/10
抵食：7/10
平均每人消費：HK$190

餐廳資料：
Piccolo Pizzeria & Bar
西環堅尼地城爹核士街1E號舖
2824 3000