好喜歡三幾個朋友圍埋食吓飯，傾吓偈，講講近況，談談軼日。餐廳環境幾有新色，古雅盎然，處處滲出老中國嘅風貌，事後先知原來好多擺設，掛畫都喺晌大陸上面搜羅，怪不得甚有古蹟氣息。

餐廳設有貴賓廂房，每間都各有特色，個人較喜歡餐廳近尾嘅一間，裝修較平實，加少少中式擺設，牆上掛有一幅竹簡，舒適自在。

打開餐牌，就有一整頁介紹九龍城寨嘅少少歷史及餐廳嘅背景、經營理念，翻閱餐牌一次，你就會發覺菜式集多個地方之大成，有粵菜，有川菜，亦有杭州菜，由冷盤、燒味、特色菜、燕窩、海參、湯羹、鮑魚、羔蟹、海鮮、小菜、煲仔菜、素菜，至飯麵，就連生滾粥、四季盆菜都有。

除咗散點，原來亦有私房菜供應，我問店員只喺個列咗好多特色菜嘅私房菜菜牌咋喎，但其實都可以俾個「筆直」佢哋度個菜單，當然，有幾道撚手招牌小菜多數會推薦晌個人化嘅私房菜菜單之上。

麻辣海參絲 $128

以海參切絲做涼拌，感覺上比較少，不過，海參食落好爽口，而一客麻辣海參絲滿滿都喺海參，配以少量青瓜及紅椒，味道方面，麻辣得幾刺激，少食辣嘅人應該會覺得頗辣。伴碟裝飾嘅麵粉金魚固然搓得唯妙唯肖，不過，圍碟嘅青瓜片，一塊疊一塊都喺心機嚟。

即燒乳豬 $328（半隻）

一上二樓，就會見到有張橫額「十大必食推介」，當中就喺依道「即燒乳豬」排頭位，除半隻，人多可以叫全隻（$638），人少則可考慮1/4（$168）或例牌（$118）。其實即燒乳豬好多地方都食到，但去晒肥膏嘅乳豬就第一次食，乳豬皮脆到咔嚓聲，好似食威化餅咁，無晒皮下脂肪，唔會一口油，再點少少乳豬醬，感覺比平時食乳豬輕怡好多。食完皮，再食肉，多食幾件都唔覺「漏」！

秘製黑胡椒燒鴨 $158（半隻）

跟個即燒乳豬一樣，有分為全隻（$278）、半隻（$158）或例牌（$118），亦喺店家十大必食推介之一。單睇外觀，燒鴨油光亮澤，外皮甘香脆口，鴨肉羶味唔重，入口嫩滑油香，沾上秘製黑胡椒醬，惹味度更上一層樓。

盤古香妃雞 $148

俗語有話「盤古初開」，「盤古」喺天地初開後第一個巨人，不過，依道菜嘅「盤古」純粹攞個諧音，以木盤盛着香妃雞而已。原隻香妃雞上枱，原來喺以手撕食法，店方預備咗膠手套俾各位，鍾意食邊截就撕邊截，不過，友人好窩心，幫大家一次過手撕好晒，慢慢夾嚟食。店員話佢哋個香妃雞做法喺煮好一大煲湯汁，用低溫慢浸形式，怪唔之得雞肉非常嫩滑，而且好入味，個湯汁仲有少少藥材味，唔重，點到即止，唔似肉骨茶嗰類咁重。

不是粟米 $328

就喺見過食友寫依道菜，先令人印象深刻，既然「不是粟米」，究竟喺乜，當然睇過食友嘅食評己知道喺「炸魚」，做法類似松子魚，鎅花炸過後做成「粟米粒」形態，再配合小棠菜及髮菜嘅裝飾，不得不佩服大廚嘅心思及手藝。由於去晒骨，所以，安心享用，唔怕骾到魚骨，真喺細節位都好用心，配酸汁，有啲橙味，幾清新。

米蘭野菌焗蝦仁 $148

除蝦仁，亦有焗帶子，適合對蝦有敏感嘅人。用上意大利米蘭野菌，配合中式蝦仁食材，加上雜香草，一道帶有意式風情嘅蝦仁，菌香四散，蝦仁爽口，喺一道濃香口味嘅菜式。

南瓜西米露（免費）

惠顧晚飯而奉送嘅甜品，質素不錯，南瓜味唔算好強，但仍滲出絲絲南瓜嘅清甜味，質感再做番稀少少就更啱小弟個人心水。

古色古雅嘅環境，品嚐特色而富創意及心思嘅菜式，讓大家有個愉快嘅一晚。唔包酒水，平均大概$250一個人，試到好幾款招牌菜，以及講心思及刀功嘅特色菜，真喺食得過。

個人評分
味道：8/10
環境：7/10
服務：8/10
抵食：7/10
平均每人消費：HK$250

餐廳資料：
城寨風味 Wall City Flavor
九龍城南角道6-6A地下
2718 0801