|
大帽山之旅 + 看月蝕
|
|
helenhlblog
2015-04-23
2283
1
|
分享
收藏
| 整完野餐的食物之後, 我們就出發去大帽山~~ 平時大家坐公共交通工具, 可以坐51號九巴 (荃灣西站至錦上路西鐵站) 到大帽山郊野公園附近下車, 或者坐80號綠色小巴, 由荃灣去川龍, 再行上去~ 不過我們就是駕車上到山腰, 泊低架車再行上去~ 正常來說應該泊在扶輪公園, 但因為太多人又太多車, 結果就一路駛上山找位~ 假期時其實個個郊野公園多車又多人, 大家都要小心呀~~ 
其實唔駛上到山頂, 山腰已經可以飽覽香港各地的風光~ 這邊看到荃灣、葵涌及青衣~~ 
昂船洲大橋~~ 
青馬大橋都看到~~ 
荃灣同青衣都好多樓, 密密麻麻~~ 
山中有幾座建築物, 是青年協會的施樂園~~ 
這天山上霧氣較多, 但都看到不少樹木~~ 
另一邊就是元朗、八鄉等地的景色~~ 
建築物都變得細小~~ 
個個遊人見到如此美景, 唯一節目就是不停影相~~ 山上比想像中大風, 行路時都要小心翼翼~~ 
影吓山中的路~~ 就是沿這條車路上山~~ 
這個也是必影的, 證明到此一遊~~ 另外可以知道自己看到什麼地方~~ 
突然看到雲中的空隙露出一點藍天, 又來拍一下~~ 
很壯觀的景色, 聽到有人話, 風景咁靚, 都唔駛去其他地方旅行, 香港都有靚景~~ 我就覺得各有特色啦~~ 
山頂今日好大霧, 不過當然要上到山頂才算來過大帽山啦~~ 
廢屋又影吓~~ 
車路去到"盡頭", 一邊去施樂園, 另一邊就是去山頂之路了~~ 
上斜當然要慢慢行~~ 由頭先綠色更亭開始行上山頂大約45分鐘至1小時, 如果由扶輪公園行起, 起碼要2.5-3小時上山, 大家要有心理準備~~ 有些人會不行車路, 在車路與車路之間抄捷徑上山頂, 不過個人覺得比較危險, 都係唔好咁做啦~~ 
綠色樹上有不同顏色的樹葉, 很不錯~~ 
單看樹木, 感覺有點似台灣、日本的山林~~ 
有時霧氣突然散去, 抬頭就可以見到兩座雷達塔, 不過好快它們又被霧遮住了~~ 
行得愈來愈高, 霧就愈來愈大, 風有時都幾大, 可以吹一吹, 冇咁熱~~ 
山下的風景已經看不到了~~ 
竟然遇上蒲公英~~ 真係好耐冇見過~~ 以前公園、學校的花叢可能都有, 依家真係好少見~~ 
又見到霧中的巨塔~~ 
另有一些建築物~~ 
見到"波波"愈來愈大, 即是快到山頂~~ 
當你在斜路上見到M147這個牌, 即是山頂在望了~~ 
終於到"山頂"啦~ 好累~~ 另一邊仲有路, 是麥理浩徑的路線~~ 
這裡是天文台的設施~ 影入去冇人, 只見到保安員~ 
唯一諗唔明, 點解要起個籃球場喺山頂?......印象中記得以前來的時候係冇架...而且真係咁多職員鍾意打籃球?... 
真正的山頂當然在入面, 不過行人止步了~~ 
行了去山徑一邊的一小段, 有個位置又可以看到山下的風景~~ 
又影多次雷達~~ 不過這裡除了天文台的雷達, 仲有電視發射塔, 電磁波一定不少, 不便久留, 於是行原路落山去了~~ 
行到返去綠色更亭, 就可以高處見到停車場好多車~~ 所以話駕車上來要好小心~~ 
行完一輪, 終於覺得肚餓, 於是開餐~~ 不過山上的枱椅不太多, 都俾人坐哂, 唯一找到有個亭子冇人坐, 於是坐在亭裡吃"下午茶"~~ 這些就是早上整的吞拿魚碎蛋沙律蕃茄杯~~ 
當然食埋兩款三文治同啲菠蘿腸仔~~ 飽哂又可以繼續行~~ 
之後我們沿車路行落去, 想去遊客中心看看~~ 用了45分鐘~~ 沿路可以看到山景, 不過不時有車經過, 小心~~ 
落到去山腰的遊客中心~~ 
這個停車場只可以泊到4:30, 所以很多車都走了~~ 
唔記得自己有冇嚟過~~ 不過郊野公園的遊客中心都係大同小異, 最緊要都是給遊客休息、去廁所、及了解郊野公園資訊的地方~~ 
這裡的其中一個主題是氣候變化~~ 
都有介紹大帽山郊野公園的資料板~~~ 接待處仲有好多單張, 又可以買到部份漁農處出版的書籍~~ 
展板就唔影了, 影吓地球仔~~ 大家想它健健康康, 就要好好保護環境~~ 
另一個有興趣的展品就是這個測量天氣的氣球~~ 不知是否1:1大小?~~~ 
展覽館另一個主題是極地探險, 有關於香港及中國探險家去南北二極的介紹, 又有介紹雪龍號, 不同時段仲有關於生態/氣候變化/探險的短片觀賞, 有興趣的朋友可以消磨好多時間~ 我們就匆匆一看~~ 
再行多一會, 就去到扶輪公園~~ 雖然已經冇哂櫻花, 不過都有好多人在燒烤、野餐、玩樂和行來行去~~ 公園隔離有條約1km長的遠足研習徑, 不過我們要留力上山, 所以唔行了, 看看展品就算~~ 
又要捕捉一下突如其來的藍天~~ 
在遊客中心後面有條山路, 如果大家唔想行斜路上山, 可以行樓梯上山, 不過有成幾百級, 而且都要行1-1.5小時先上到山腰 (就是頭先我們野餐的地方), 好似同行斜路一樣咁辛苦......不過個人覺得行樓梯上山比較容易, 落山就當然行斜路容易, 小心唔好整親腳, 慢慢行就ok~~ 
中途又可以看到美景, 稍稍舒緩一下行山的疲乏~~ 
又係捕捉藍天的時候~~ 其實山上咁多雲霧, 真係可以睇到月蝕嗎?...... 
沿途都是樓梯同沙路, 一邊行一邊要小心~~ 
就是這個牌子~~ 在山腰見到它, 就可以選擇這裡下山, 或行車路落山~~ 
其實仲未到夜晚, 於是又周圍行吓~~ 又去觀景台看看~~ 不過隨住太陽落山, 山上愈來愈大霧, 有不少人都走了, 但仍有不少人駕車或坐的士上山, 於是令到車路大塞車......老公話想等到7點, 到時咩都睇唔到就走...... 當然就係咩都睇唔到, 因為山腰已經好大霧...... 
就係咁, 連影相都睇唔到自己影咩......於是趁條車路通了少少, 我們就下山了......不過繼續有好多車上來, 條車路又細, 好辛苦慢慢先冇撞車成功下山...... 結果睇唔睇到月蝕呢?......其實可以看到月蝕的地方就在屋企附近~~ 剛好趕上了食甚的時候~ 
其實屋企附近根本就是看月光的好地方, 平時、中秋節都看到大大的月亮~ 不過既然有假期, 就想行吓山兼看天文奇觀~ 結果都係回來這裡有得睇~~ 老公即係set腳架影相~~ 上下圖都是老公的作品~~ 真係見到月亮變成淡淡的紅色~~ 
雖然時間不長, 但見到都已經好開心, 比起上年10月那次看得更清楚~~ 很感恩我們看到了~~ 其實這天都有不少要感恩的事, 例如可以上山看到美麗的風景, 又可以安全下山~~ 希望下一次去冇咁多人啦~ 不過香港真係唔會再有唔多人的郊野公園了~ (後記: 後來見到有新聞報導話, 今次唔係月全蝕, 而係月偏食, 因為月球不是100%被地球遮蓋......不過無論是全蝕還是偏蝕, 見到難得的天文現象已經好開心~~~) 關於大帽山的資料: http://www.afcd.gov.hk/tc_chi/country/cou_vis/cou_vis_cou/cou_vis_cou_tms/cou_vis_cou_tms.html http://www.oasistrek.com/tai_mo_shan.php http://www.fotobeginner.com/11587/%E6%B5%B7%E5%B8%82%E6%99%A8%E6%B5%81%E5%A4%A7%E5%B8%BD%E5%B1%B1/ http://www.lcsd.gov.hk/healthy/hiking/b5/road_nature2.php
感謝 helenhlblog 提供以上資料 helenhlblog的網誌: http://helenhlblog.blogspot.hk/
|
~END~
| 商店 | 大帽山郊野公園遊客中心 |